2 Tham 15 - RUAC KUƆTH IN RƐL RƆ

Go̱r Ɛ̈b-ca-lom kɛ ca̱p kä mi jiääk

¹ Kɛ kɔr kä nɔmɔ cu Ɛ̈b-ca-lom rɔ jëk thurbiɛɛli kɛnɛ jio̱o̱k tuɔ̱ruɔ̱k, kɛ nɛy ti jiɛɛn dhieec ti wur nhiamdɛ.

² Kä la Ɛ̈b-ca-lom a ker nikɛ runwaŋ bɛ wä cuɔ̱ŋ gekä duɔ̱p thuɔk wec. Kä mɔ tëë kɛ ram mi tëë luk mi no̱o̱ŋɛ nhiam kua̱r ɔ, la Ɛ̈b-ca-lom jɛ a cɔl, kä bɛ jɛ thiec i̱, “Ɛ ji̱n raan wec in mi̱th?” Kä mi cɛ loc i̱, “Ɛ ɣän raan thuɔk duëël ɛmɛ kä I-thɛ-rɛl.”

³ La Ɛ̈b-ca-lom jɛ a jiök i̱, “Nɛnɛ, go̱o̱nydu ɛ cuɔ̱ŋ kä ɛ thuɔ̱k. Duundɛ ɣöö thilɛ ram mi te guäth kua̱r mi bi lukdu liŋ.”

⁴ Kä bi Ɛ̈b-ca-lom wee i̱, “Duŋ mi lapä kuäär ɛn wi̱c! Dëë nɛy diaal tin tekɛ go̱o̱nyni cua̱ bä kä ɣä, kä dëë kɛ cu ka̱m cuɔ̱ɔ̱ŋ.”

⁵ Kä mɔ ci raan wee goŋɛ rɔ mɔ kɛ luth, la ja kääpɛ, kä bɛ jɛ cim.

⁶ Cu Ɛ̈b-ca-lom nɔmɔ lät kä ji̱ I-thɛ-rɛl diaal tin la bä kä kuäär kɛ luɔ̱ɔ̱k. Inɔ cu Ɛ̈b-ca-lom lɔc ji̱ I-thɛ-rɛl cu ka̱n.

⁷ Kɛ thuɔ̱k runi da̱ŋ ŋuaan cu Ɛ̈b-ca-lom kuäär jiök i̱, “Jak ni ɣä kä wä, bä ya̱cdä wä thöp, mëë cä ya̱c Kuoth Nhial, kä Ɣɛb-ron.

⁸ Kɛ ɣöö cä ya̱c yac mëë cieŋä kä Gɛ-cur kä Thi-ri-ya i̱, ‘Mi wä Kuoth Nhial ɣä luɔc kä Jɛ-ru-tha-lɛm, bä wä pal ɛn Kuoth Nhial.’ ”

⁹ Kä cu kuäär ɛ jiök i̱, “Wër kɛ mal.” Kä cuɛ wä kä Ɣɛb-ron.

¹⁰ Duundɛ ɣöö cu Ɛ̈b-ca-lom thok jäk kä thuk duëli ji̱ I-thɛ-rɛl diaal kɛ tɛ̱̈ɛ̱̈ wee i̱, “Niɛ mɔ bia jɔw kaaŋä liŋ ɔ, kua wee ‘Ɛ̈b-ca-lom ɛ kuäär kä Ɣɛb-ron!’ ”

¹¹ Kä cu Ɛ̈b-ca-lom wä kɛ nɛy ti kur da̱ŋ rɛw ti cɛ cɔl ala ja̱a̱l, cukɛ wä ɛn wi̱ni kä thilɛ mi ŋäc kɛn ɛ.

¹² Kä min thöp Ɛ̈b-ca-lom muc, cuɛ raan jäk kä Ä-ɣi-tho-pɛl raan ji̱ Gilo, min la luek Dee-bid, wi̱i̱dɛ kä Giloo. Kä cu lo̱kdɛ wee mi reepɛ rɔ, kä cu nɛɛ Ɛ̈b-ca-lom wee mi repkɛ rɔ.

Ba̱r Dee-bid kɛ rɔ kä Jɛ-ru-tha-lɛm

¹³ Kä cu jääk ben kä Dee-bid wee i̱, “Ci ji̱ I-thɛ-rɛl nhɔk ni Ɛ̈b-ca-lom.”

¹⁴ Kä cu Dee-bid ji̱ kɔarɛ diaal tin te kɛɛl kɛ jɛ kä Jɛ-ru-tha-lɛm jiök i̱, “Bar nɛ rɔ̱, kiɛ /canɛ rɔ bilɛ luäŋ kɛ ba̱r kä Ɛ̈b-ca-lom. Mal nɛ wä, kiɛ bɛ kɔn cop niɛ täämɛ kɛ pɛ̈th, ɛ bɛ kɔn lät kä mi jiäk, a bɛ wec mak kɛ ko̱r.”

¹⁵ Kä cu ji̱ kɔarɛ jɛ jiök i̱, “Nɛnɛ, kuäär, kɔn ba̱kɔ la̱t ni mɔ ci larɔ.”

¹⁶ Kä cu kuäär tɛth piny, kä cu ji̱ dhɔaarɛ jɛ guɔ̱ɔ̱r. Kä cu kuäär luɔɔmkɛ da̱ŋ wäl ba̱ny piny ba cieŋ lɔ̱ gaŋ.

¹⁷ Kä cu kuäär wä, kä guɔ̱ɔ̱r kɛ jɛ ɛ nɛy diaal. Kä cukɛ cuɔ̱ŋ dhɔr in te pëëk.

¹⁸ Kä cu ji̱ kɔarɛ diaal cuɔ̱ŋ gekädɛ. Kä cu ji̱ Kɛ-reth diaal kɛnɛ ji̱ Pɛ-lɛth diaal, kɛ ji̱ Gɛ̈th diaal ti kur bäkɛl tëë guɔ̱ɔ̱r kɛ jɛ ni kä Gɛ̈th, wä nhiam kua̱r.

¹⁹ Kä cu kuäär Itay raan Gɛ̈th jiök i̱, “Ɛŋu wi̱i̱ kɛ kɔ kɛɛl ɔ? Locni jɔk, wiaa cieŋɛ kɛɛl kɛ kuäär. Kɛ ɣöö ɛ ji̱n juɔ̱r, kä ɛ ji̱n ro̱l /ci cieŋ wi̱i̱dun.

²⁰ Kä ci cieŋ ɛn wa̱nɛ kɛ pek mi tɔt, ɛŋu dëë ji̱ ben jak kä yi̱ci mɔ kɛ kɔ kɛɛl, nɛnɛ ɣän wa̱a̱kɛ guäth mi kuecä? Wër jɔk, kä naŋ gaat muɔɔr kɛ ji̱ kɛɛl. Ɛ Kuoth Nhial nyuth ji̱ nhök kɛnɛ ŋa̱th mi thil pek.”

²¹ Duundɛ ɣöö cu Itay kuäär loc i̱, “Ce̱tkɛ ciöt Kuɔth Nhial in tëk, kä ce̱tnikɛ tëkdu kuäärä, gua̱a̱th ɔ bi wä thi̱n ɔ, mi ɛ lia̱a̱ kiɛ ɛ tëk, ɛ jɛn bä wä thi̱n ɔ.”

²² Kä cu Dee-bid ɛ jiök i̱, “Gɔaaɛ, ku wä.” Inɔ cu Itay raan Gɛ̈th cu wä, kɛnɛ nɛɛkɛ diaal amäni nyin tiɛtni tin tëë jɛ.

²³ Kä cu wec kɛɛliw wiee min wä naath, kä cu kuäär yier Kid-ron jiath kui̱c, kä cu nɛy diaal lat ni därdɔaar.

²⁴ Kä te Dha-dok bo̱o̱th palä ɛn wi̱ni, kɛɛl kɛ ji̱ Lii-bay diaal, kapkɛ thanduk matdä ruac Kuɔth. Kä cukɛ thanduk matdä ruac Kuɔth la̱th piny, amäni min ci nɛy diaal thuɔ̱k kɛ wä raar rɛy wec. Kä te bo̱o̱th palä ni Ɛb-ya-thar thi̱n bä.

²⁵ Kä cu kuäär Dha-dok jiök i̱, “Kap ni thanduk matdä ruac Kuɔth jɔk, naŋ ni jɛ wi̱c. Kä mi nhɔk Kuoth Nhial ɛ, bɛ ɣä luɔ̱c jɔk, kä bä ben jek guäth ciɛŋädɛ.

²⁶ Kä mi bɛ wee i̱, ‘/Ci lɔcdɛ tɛth kɛ jɛ,’ nɛnɛ, ɣän ɛn, a jɛ lät ɣä kä mɔ gɔaa kɛ jɛ mɔ.”

²⁷ Kä cu kuäär bo̱o̱th palä ni Dha-dok lɛni jiök i̱, “Nɛnɛ loc ni wi̱c kɛ mal. Ji̱n yɛnɛ Ɛb-ya-thar, kɛ gaatkun da̱ŋ rɛw, Ä-ɣi-madh gatdu kɛnɛ Jo-na-than gat Ɛb-ya-thar.

²⁸ Kä nɛnɛ ɣän bä li̱ep wi̱i̱ puɔ̱l rɛy dɔaar, mäni mi ci ɣä la̱r thok.”

²⁹ Kä cu Dha-dok kɛnɛ Ɛb-ya-thar thanduk matdä ruac Kuɔth kap jɔk kä Jɛ-ru-tha-lɛm, kä cukɛ duɔth ɛn wi̱ni.

³⁰ Kä cu Dee-bid wä wi̱i̱ pa̱a̱m Ɔ-lip, kä wieeɛ min wee kɛ, jälɛ kɛ pa̱a̱tkɛ kä cɛ wi̱cdɛ kum. Kä nɛy diaal tin te kɛɛl kɛ jɛ ca wuɔ̱thkiɛn kum. Kä cukɛ wä kɛ wiee min wäkɛ.

³¹ Cua Dee-bid jiök i̱, “Ä-ɣi-tho-pɛl a kɛɛl kɛnɛ Ɛ̈b-ca-lom.” Kä cu Dee-bid wee i̱, “Aɣ Kuoth Nhial, ɣän palä ni ji̱, jak ni luek Ä-ɣi-tho-pɛl kä dɔ̱ɔ̱r.”

³² Kä min ci Dee-bid cop bi̱i̱kä pa̱a̱m, min tekɛ gua̱a̱th palä Kuɔth, nɛn ɛ, cu Ɣu-cay raan A-rɛk jɛ ben lor ɛ ci bieynikɛ rɛ̈t kä te wi̱cdɛ kɛ tur.

³³ Kä cu Dee-bid ɛ jiök i̱, “Mi wi̱i̱ wä kɛɛl kɛ ɣä, bia̱ riɛk kä ɣä.

³⁴ Duundɛ ɣöö mi wi̱i̱ wä loc wi̱c, kä bi Ɛ̈b-ca-lom jiök i̱, ‘Bi ɣän a ja̱ŋdu, lö kuäär. Ce̱tkɛ mëë ci ɣän kɔn ɛ ja̱ŋ guur kɛ pek ëë ci wä, täämɛ bi ɣän ɛ ja̱ŋdu,’ inɔ bi luek Ä-ɣi-tho-pɛl jak kä thil luɔt.

³⁵ A /ci Dha-dok kɛnɛ Ɛb-ya-thar bööth palä ku tëë wi̱ni kɛɛl kɛ ji̱? Kä mɔ ci liŋɔ dhɔr kua̱r biɛ la̱t Dha-dok kɛnɛ Ɛb-ya-thar bööth palä.

³⁶ Kä nɛnɛ gaatkiɛn da̱ŋ rɛw a kɛɛl kɛ kɛ ɛn wi̱ni, Ä-ɣi-madh gat Dha-dok, kɛnɛ Jo-na-than gat Ɛb-ya-thar. Kɛ kɛ bi ɣä jäk kä min ci liŋ.”

³⁷ Inɔ cu Ɣu-cay määth Dee-bid ben wi̱c, min wä Ɛ̈b-ca-lom kä Jɛ-ru-tha-lɛm.