2 Tham 13 - RUAC KUƆTH IN RƐL RƆ

Ɛ̈m-non kɛnɛ Ta-mar

¹ Täämɛ te Ɛ̈b-ca-lom gat Dee-bid kɛ nyiman mi gɔaa ɛlɔ̱ŋ, mi cɔal i̱ Ta-mar. Kɛ kɔr gua̱th mi tɔt cu Ɛ̈m-non gat Dee-bid mi te man gölä, jɛ nhɔk.

² Kä cu Ɛ̈m-non ɛ nhɔk ɛlɔ̱ŋ a bɛ rɔ lɛl ciɛ tëë kɛ juey kɛ kui̱ nyiman ni Ta-mar. Kɛ ɣöö ɛ nya mi /ken met tɔ̱ɔ̱c kɛ wut, kä ce̱tdɛ kɛ mi thilɛ mi dëë Ɛ̈m-non ɛ lät kä jɛ.

³ Kä Ɛ̈m-non tekɛ määthdɛ mi cɔali Yo-na-dab gat Cimaa däman Dee-bid. Kä Yo-na-dab pɛlɛ ɛlɔ̱ŋ.

⁴ Kä cuɛ Ɛ̈m-non jiök i̱, “Ma̱th gat kua̱r ɛŋu la gaki mɔ ni ciaŋ? Ɛŋu ciɛ lärä mɔ?” Kä cu Ɛ̈m-non ɛ jiök i̱, “Ɣän nhɔakä Ta-mar, nyiman dämaar ni Ɛ̈b-ca-lom.”

⁵ Kä cu Yo-na-dab ɛ jiök i̱, “Pɛl rɔ ce̱t ti juey rɛy köliku. Mi wä guur ji̱ ben gui̱l, jiök ni jɛ i̱, ‘Ɛ nyimaar ni Ta-mar ɣä ben moc kɛ mi̱eth mi bä cam, a jɛ bëë ben la̱t a guɛcä, dɔ̱ŋ dëë jɛ cam tetädɛ.’ ”

⁶ Kä cu Ɛ̈m-non tɔ̱ɔ̱c, pɛɛlɛ rɔ te juey. Kä min ci kuäär ɛ ben gui̱l cuɛ kuäär jiök i̱, “Ɛ nyimaar ni Ta-mar Ɣä ben lät kä mi̱eth a guɛcä, dɔ̱ŋ dëë jɛ cam tetädɛ.”

⁷ Kä cu Dee-bid raan jäk kä Ta-mar cieŋ wee i̱, “Wër dhɔr dämuɔɔr ni Ɛ̈m-non, bi jɛ wä lät kä mi̱eth.”

⁸ Kä cu Ta-mar wä dhɔr däman ni Ɛ̈m-non, kä tëë tɔ̱ɔ̱cä. Cuɛ nup ka̱n kä cuɛ läny, kä cuɛ mi̱eth la̱t a guicɛ.

⁹ Kä cuɛ jɛ la̱th rɛy tokä a guicɛ, duundɛ ɣöö cu Ɛ̈m-non mi̱eth lo̱k. Kä cuɛ wee i̱, “A nɛy diaal jiɛɛn kutdä.” Kä cu nɛy diaal jiɛɛn kutdɛ.

¹⁰ Kä cuɛ Ta-mar jiök i̱, “No̱o̱ŋni mi̱eth duëël, dëë ben cam tetädu.” Kä cu Ta-mar mi̱eth in cɛ la̱t naŋ duëël kä Ɛ̈m-non däman.

¹¹ Kä min cɛ nöŋ jɛ thiekä kɛ ɣöö derɛ mi̱th, cuɛ jɛ käp kä jiökɛ jɛ i̱, “Bër tɔ̱a̱cnɛ nyimaar.”

¹² Kä cuɛ Ɛ̈m-non loc i̱, “/Ciɛ jɛn dämaar, /cu ɣä käp kɛ buɔ̱m. Kɛ ɣöö mi ce̱tkɛ nɔmɔ /kenɛ kɔn tuɔ̱k kä I-thɛ-rɛl. Cu mi jiääk lät.

¹³ Kä ɣän dëë pöcdä ku lɛ lɛ̱̈ny nikä? Cu ji̱n bi cua̱ ram mi dɔ̱a̱r kä I-thɛ-rɛl. Kɛ kui̱c ɛmɔ täämɛ, kua̱ läŋ ni ji̱, ruacni kɛ kuäär. Dɔ̱ŋ /cɛ ɣä bi ka̱n kä ji̱.”

¹⁴ Duundɛ ɣöö bum ni Ɛ̈m-non kä jɛ, cuɛ jɛ ka̱n kɛ buɔ̱m.

¹⁵ Kä cu Ɛ̈m-non ɛ lo̱k nikɛ lo̱k mi di̱i̱t. Kä lo̱k in cɛ lo̱k ni jɛ cu di̱t ni jɛn kä nhök ëë cɛ nhɔk ni jɛ, kä cu Ɛ̈m-non jɛ jiök i̱, “Jiɛc rɔ, wërɛ.”

¹⁶ Kä cuɛ Ɛ̈m-non loc i̱, “/Ciɛ jɛn, dämaar. Ɛn tukdu kɛ ɣä raar ɛ jɛn bia̱ duer in di̱t ni jɛn kä mi payi lät kä ɣä mi.” Kä duundɛ ɣöö /kenɛ jɛ liŋ.

¹⁷ Kä cu Ɛ̈m-non ŋuɛ̈tni tin la̱t jɛ ikä cɔl wee i̱, “Yuɔrɛ jɛ raar kutdä, kä lëkɛ thi̱i̱k kɔɔrɛ.”

¹⁸ Kä jɛn ciɛŋɛ bi̱i̱ mi bäär mi tekɛ biɛɛl. Ɛ jɛn min la nyiee kua̱r tin /ka̱n kuɛn kɛ a ciɛŋ. Kä cu ja̱a̱ŋkɛ jɛ yuɔr raar kä cua thi̱i̱k lëk thi̱n kɔɔrɛ.

¹⁹ Kä cuɛ wi̱cdɛ moc ŋɛ̈th, kä cuɛ bi̱i̱ in bäär in ciɛŋɛ rɛ̈t. Kä cuɛ tetkɛ la̱th wi̱i̱dɛ, cuɛ wä kɛ wiee.

²⁰ Kä cu däman ni Ɛ̈b-ca-lom ɛ thiec i̱, “Aku dämuɔɔr ni Ɛ̈m-non te kɛɛl kɛ ji̱? Kap ni waŋdu nhial nyimaar. Jɛn ɛ dämuɔɔr. /Cu jɛ käp ala mi di̱i̱t.” Inɔ cu Ta-mar a ciek mi cieŋ kä rɔa dhɔr däman ni Ɛ̈b-ca-lom.

²¹ Kä mëë ci kuäär ni Dee-bid ɛ liŋ cuɛ gaak ɛlɔ̱ŋ.

²² Kä cuɛ thil mi cu Ɛ̈b-ca-lom ɛ la̱r Ɛ̈m-non, lökɛ Ɛ̈m-non. Kɛ ɣöö cɛ nyiman ni Ta-mar ka̱n kɛ buɔ̱m.

Näk Ɛ̈b-ca-lom kɛ Ɛ̈m-non

²³ Kɛ kɔr runi da̱ŋ rɛw cu Ɛ̈b-ca-lom detkɛ miemkiɛn ŋuɔ̱k kä Baal-ɣa-dhor, min thieek kɛ Ɛ-pa-rim, kä cuɛ gaat kua̱r diaal cɔal ɛn wi̱ni.

²⁴ Kä cuɛ ben kä kuäär jiökɛ jɛ i̱, “Nɛnɛ, ja̱ŋdu ŋuɔ̱kɛ miem deetkɛ. Ɛŋu /canɛ wä, kɛɛl ɔ yɛnɛ ji̱ kɔaru?”

²⁵ Kä cu kuäärɛ loc i̱, “Ëëy, gatdä, a kɔ /ca̱kɛ wä kɔn diaal, bi nɛy lɛ wa̱a̱ riɛk kä ji̱.” Cuɛ gua̱n läŋ, duundɛ ɣöö /kenɛ wä cuɛ poth ni gatdɛ.

²⁶ Kä cu Ɛ̈b-ca-lom wee i̱, “Kä mi /ci wä, ɛ dämaar ni Ɛ̈m-non wä kɛɛl kɛ kɔ.” Kä cu kuäär ɛ loc i̱, “Ɛŋu bɛ wä kɛɛl kɛ ji̱ mɔ?”

²⁷ Kä cu Ɛ̈b-ca-lom ɛ läŋ mäni min cɛ Ɛ̈m-non kɛnɛ gaat kua̱r diaal nhök wä. Kɛɛl kɛ jɛ.

²⁸ Kä cu Ɛ̈b-ca-lom ja̱a̱ŋkɛ la̱t lat i̱, “Ŋa̱cɛ jɛ mi wä Ɛ̈m-non wä Yɔ̱ŋ kɛ kɔaŋ, kɛnɛ mi wa̱a̱ yɛ jiök i̱, ‘Na̱kɛ jɛ,’ /cuarɛ dual. Na̱kɛ jɛ ɛ ɣän laarɛ mɔ. Buɔ̱mɛ rɔ kä /cuarɛ gal.”

²⁹ Kä cu ja̱a̱ŋ Ɛ̈b-ca-lom ɛ lät kä Ɛ̈m-non ce̱tnikɛ min ca la̱r kɛ ɛ Ɛ̈b-ca-lom. Kä cu gaat kua̱r diaal rɔ jiɛc, cu ramɔ muulɛ kɔt barɛ rɔ.

³⁰ Kä min tekɛ dup, cu thok cop kä Dee-bid i̱, “Ci Ɛ̈b-ca-lom gaatku diaal näk, a thilɛ ram mi ci duɔth.”

³¹ Kä cu kuäär rɔ jiɛc, cuɛ bi̱i̱dɛ rɛ̈t, kä cuɛ rɔ yuɔr piny. Kä cu ji̱ kɔarɛ tin te gekädɛ bieynikiɛn rɛ̈t.

³² Duundɛ ɣöö cu Yo-na-dab gat Cimi däman Dee-bid wee i̱, “Kuäär /ka̱n kɛ näk kɛn diaal kɛn gaatku. Ci li̱w ni Ɛ̈m-non kä rɔa. Kä nɛmɛ tuɔɔkɛ kɛ ruac Ɛ̈b-ca-lom nikɛ gua̱a̱th ëë käp Ɛ̈m-non nyiman ni Ta-mar kɛ buɔ̱m.

³³ Kɛ kui̱c ɛmɔ täämɛ kuäär cu jɛ cari ca gaatku diaal näk. Ci li̱w ni Ɛ̈m-non kä rɔa.”

³⁴ Duundɛ ɣöö ci Ɛ̈b-ca-lom rɔ bar. Kä cu ram in gui̱c waŋdɛ kap nhial gui̱cɛ, cuɛ nɛy ti ŋuan nɛn bäkɛ dup in te jɔkdɛ gekä pa̱a̱m.

³⁵ Kä cu Yo-na-dab kuäär jiök i̱, “Nɛnɛ, ci gaatku ben. Ce̱tnikɛ min cä la̱r ji̱, kɛn ci ben ti.”

³⁶ Kä niɛ min thukɛ kɛ ruac, cu gaat kua̱r cop, kä cukɛ wiee. Kä cu kuäär kɛnɛ ji̱ kɔarɛ wiee bä ɛlɔ̱ŋ.

³⁷ Kä duundɛ ɣöö ci Ɛ̈b-ca-lom rɔ bar, cuɛ wä kä Tɛ̈l-may gat A-mi-ɣud kuäär Gɛ-cur, kä cu Dee-bid gatdɛ par kɛ ni̱n.

³⁸ Cu Ɛ̈b-ca-lom rɔ bar kä Gɛ-cur, cuɛ te thi̱n kɛ run diɔ̱k.

³⁹ Kä cu lɔc kua̱r Ɛ̈b-ca-lom lɛ go̱r. Kɛ ɣöö cɛ ŋa̱c i̱ ci Ɛ̈m-non li̱w.