2 Tham 12 - RUAC KUƆTH IN RƐL RƆ

Ruac Na-than kɛ Dee-bid

¹ Kä cu Kuoth Nhial Na-than jäk kä Dee-bid cuɛ ben kä jɛ kä cuɛ jɛ jiök i̱, “Tëë kɛ wutni da̱ŋ rɛw ti te wi̱c kɛl, kɛl riäŋɛ kä min dɔ̱ŋ ɛ can.

² Ɛn wut in riäŋ te det ti ŋuan kɛnɛ ɣɔ̱k.

³ Kä wut in can thilɛ jɛ ŋɔak te ni jɛn kɛ nac dɛ̈ɛ̈l rɔmä, mi cɛ kɔk. Cuɛ jɛ nööŋ kä cukɛ jɛ rɔm kɛnɛ gaatkɛ. La mi̱thɛ kä kuändɛ, kä mäthɛ rɛy buɔ̱lɛ, kä la tɔ̱ɔ̱cɛ, baapdɛ ce̱tdɛ kɛ nyaadɛ.

⁴ Kä cu ja̱a̱l ben kä wut in riäŋ, kä /kenɛ jɛ luäŋ kɛ ɣöö bɛ dɛl näk rɛy deetkɛ kiɛ yaŋ kɛ ɣöö bɛ tha̱l ja̱a̱l tin ci ben kä jɛ, duundɛ ɣöö cuɛ wä ka̱n ni dɛl wutdä min can, ɛ jɛn cuɛ na̱k ja̱a̱lkɛ mɔ.”

⁵ Inɔ cu Dee-bid gaak ɛlɔ̱ŋ kɛ wut ɛ mɔ. Kä cuɛ Na-than jiök i̱, “Ce̱tnikɛ ciöt Kuɔth Nhial, ɛn ramɔ ci nɔmɔ la̱t ɔ, ro̱ŋɛ nikɛ lia̱a̱.

⁶ Kä bɛ dɛl ɛmɔ col nikä ŋuaan, kɛ ɣöö cɛ nɔmɔ la̱t, kɛnɛ ɣöö thilɛ jɛ ca̱r.”

⁷ Kä cu Na-than Dee-bid jiök i̱, “Ɛ ji̱n. Kä nɛmɛ ɛ min laar Kuoth Nhial ɛ, Kuoth I-thɛ-rɛl i̱, ‘Ɣän cä ji̱ kuany ala kuäär, kä cä ji̱ kän kä Thɔɔl.

⁸ Ɣän cä ji̱ ka̱m kuäärɛ, kɛnɛ mänkɛ. Kä cä ji̱ jak kä kuäär kä I-thɛ-rɛl kɛnɛ Juda. Mi kuiyɛ ɛn nɛmɛ, dëë ji̱ rep kɛ rɛw ti kɔ̱ŋ.

⁹ Kuɛ la ŋu ci ruacdä lo̱k ɔ, curi ku lɛ wä la̱t ni mi jiäk ɔ? Ci U-ri-yaa raan Ɣɛ̈th näk ko̱o̱r, kä ci ciekdɛ ka̱n ala ciekdu. Ciɛ jak kä na̱kɛ ɛ ji̱ Am-on.

¹⁰ Kɛ kui̱c ɛ mɔ täämɛ bi raan a li̱w ko̱o̱r kä kuayku kɛ ɣöö /keni ɣä luɔ̱th, kɛnɛ ɣöö ci ciek U-ri-yaa raan Ɣɛ̈th ka̱n ala ciekdu.’

¹¹ Kä ci Kuoth Nhial wee i̱, ‘Nɛnɛ, ɣän bä mi jiääk jak kä tuɔ̱k ni dhɔru pa̱ny. Kä ba mänku ka̱n ni waaŋdu, kä bäkɛ ka̱m gua̱n thieekädu, kä bɛ tɔ̱ɔ̱c kɛ kɛ waaŋ nɛɛni diaal.

¹² Kɛ ɣöö ci duer la̱t kɛ tɛ̱̈ɛ̱̈. Duundɛ ɣöö bä nɛmɛ la̱t nhiam ji̱ I-thɛ-rɛl diaal, kɛ cäŋ däär.’ ”

¹³ Kä cu Dee-bid Na-than jiök i̱, “Ɣän cä Kuoth Nhial dui̱rikä.” Kä cu Na-than ɛ jiök i̱, “Ci Kuoth Nhial dueru woc bä, /ci bi li̱w.

¹⁴ Ciɛ jɛn bä. Kɛ ɣöö ci mi jiääk lät kä Kuoth Nhial, bi gat in ci di̱eth li̱w.”

¹⁵ Kä cu Na-than loc dhɔrɛ. Kä cu Kuoth Nhial gat in ci ciek U-ri-yaa ɛ da̱p Dee-bid moc juey.

Lia̱a̱ gatdä Dee-bid

¹⁶ Kä cu Dee-bid Kuoth pal kɛ kui̱ gatdä. Kä cuɛ mi̱eth lo̱k, kä cuɛ wä duëëlɛ cuɛ tɔ̱ɔ̱c piny kɛ wäär kɛɛliw.

¹⁷ Kä cu ji̱ kɔarɛ diaal ben kuthdɛ, ba jɛ ben jiɛc piny. Duundɛ ɣöö cuɛ lo̱k kä /kenɛ mi̱th kɛɛl kɛ kɛ.

¹⁸ Kɛ bärɔw ni̱ni cu gat li̱w. Kä cu ja̱a̱ŋkɛ dual kɛ ɣöö ba la̱r lia̱a̱ gatdä. Kɛ ɣöö laar kɛnɛ i̱, “Nɛ̈n ɛ jɛ, mëë ŋot gat kɛ tëk canɛ ruac kɛ jɛ, kä /kenɛ kɔn liŋ. Banɛ jɛ ku lɛ la̱r lia̱a̱ gatdä i̱di? Dɔ̱ŋ derɛ rɔ lät kä mi jiäk.”

¹⁹ Kä mëë ci Dee-bid ja̱a̱ŋkɛ nɛn ruackɛ kä rɔ, cuɛ jɛ diw i̱ ci gat li̱w. Kä cuɛ ja̱a̱ŋkɛ thiec i̱, “Ci gat li̱w?” Kä cukɛ jɛ loc i̱, “Cɛ li̱w.”

²⁰ Kä cuɛ rɔ jiɛc, cuɛ rɔ wä lak, kä cuɛ rɔ yi̱r. Kä cuɛ bieynikɛ wäny. Kä cuɛ wä luaak Kuɔth, cuɛ wä pal. Kä mëë cɛ wä dhɔrɛ, cuɛ thiec kɛ mi̱eth, Kä cua jɛ moc mi̱eth cuɛ mi̱th.

²¹ Kä cu ja̱a̱ŋkɛ jɛ jiök i̱, “Kä ɛŋu ɛn nɛ ci la̱tdɛ? Mi wiee i̱ kä /keni mi̱th mëë ŋot gat kɛ tëk. Kä min ci gat li̱w ci rɔ jiɛc kä ci mi̱th.”

²² Kä cuɛ wee i̱, “Mëë ŋot gat kɛ tëk, cä wiee kä /ka̱n mi̱th, kɛ ɣöö laarä jɛ i̱, ‘Ɛŋa mi ŋäcɛ dɔ̱ŋ dëë Kuoth Nhial ɣä luäk, a dɔ̱ŋ dëë gat tëk?’

²³ Kä täämɛ cɛ li̱w. Kuɛ la ŋu dëë mi̱eth lo̱k ɔ? A dëë jɛ ku nyɔk kɛ luuc jɔk? Bä guɔ̱ɔ̱r ni jɛ, /cɛ bi ben kä ɣä.”

Da̱p Thɔ-lo-mon

²⁴ Kä cu Dee-bid ciekdɛ ni Bɛ̈th-cɛba lɔcdɛ Jak kä gɔaa, kä cukɛ tɔ̱ɔ̱c. Kä cuɛ dap kɛ dhɔl, kä cuɛ jɛ cɔl i̱ Thɔ-lo-mon, kä cu Kuoth Nhial ɛ nhɔk,

²⁵ kä cuɛ gök ni Na-than ja̱k. Kä cuɛ ciötdɛ cɔl i̱ Yɛ-did-yaa. Kɛ ɣöö nhɔk Kuoth Nhial ɛ.

Ka̱p Dee-bid kɛ wec Rɛ̈-baa

²⁶ Ɛ jɛn cu Yo-ab nyiëëny kɛ Rɛ̈-baa wec ji̱ Am-on, kä cuɛ wec kuäärä käp.

²⁷ Kä cu Yo-ab nath jäk kä Dee-bid, wee i̱, “Ɣän cä nyiëëny kɛ Rɛ̈-baa. Kä cä wec pi̱i̱ni ka̱n.

²⁸ Täämɛ ku duɔth ji̱ I-thɛ-rɛl mat, kä ma̱kɛ wec. Kɛ ɣöö mi cä ma̱k, dëë cɔl kɛ ciötdä.”

²⁹ Kä cu Dee-bid ji̱ I-thɛ-rɛl diaal ma̱a̱t, kä cuɛ wä kä Rɛ̈-baa, cuɛ wä nyiëëny kɛ ji̱ kɛ kä cuɛ käp.

³⁰ Kä cuɛ kum kua̱riɛn ka̱n wi̱i̱dɛ. Mi tekɛ ki̱lɛni dääpä ti jiɛɛn diɔ̱k wi̱cdɛ ŋuaan, kä tëë kɛ päm mi te kök mi di̱i̱t, kä cu Dee-bid jɛ la̱th wi̱i̱dɛ. Kä cuɛ pɛ̈ɛ̈c ti ŋuan nööŋ wi̱c.

³¹ Kä cuɛ nɛy tëë te wi̱c nööŋ, cuɛ kɛ laat ŋät jiɛn, kɛnɛ ta̱th puɔ̱ri, kɛ thoriyni, kɛ jiöpni kä cuɛ kɛ jak kä ta̱thkɛ thuɔpni. Kä cu Dee-bid ɛ lät kä wi̱i̱ ji̱ Am-on diaal. Kä cuɛ rɔ ri̱t kɛnɛ nɛy diaal wä kɛ kä Jɛ-ru-tha-lɛm.