2 Tham 11 - RUAC KUƆTH IN RƐL RƆ

Dee-bid kɛnɛ Bɛ̈th-cɛba

¹ Kɛ thuɔ̱k runä, gua̱a̱th in la kua̱r a nyiëëny, cu Dee-bid Yo-ab kɛnɛ ji̱ kɔarɛ ja̱k kɛ ji̱ I-thɛ-rɛl diaal kä cukɛ ji̱ Am-on wä däk, kä cua Rɛ̈-baa wä go̱l. Duundɛ ɣöö cu Dee-bid duɔth kä Jɛ-ru-tha-lɛm.

² Cuɛ tuɔ̱k kɛ cäŋ kɛl kɛ thiaŋ, cu Dee-bid rɔ jiɛc wi̱i̱ dhaŋädɛ jälɛ wi̱i̱ duëël kuäärädɛ, cuɛ ciek nɛn wi̱i̱ duëël puakɛ. Kä ɛ ciek mi gɔaa ɛlɔ̱ŋ.

³ Cu Dee-bid raan ja̱k kɛ ɣöö bɛ jɛ wä ŋa̱c. Kä cu ram kɛl wee i̱, “/Ciɛ Bɛ̈th-cɛba, nya Ɛ-li-am ciek U-ri-yaa raan Ɣɛ̈th inu?”

⁴ Cu Dee-bid naath ja̱k. Kä cua jɛ wä no̱o̱ŋ. Cuɛ ben kä jɛ, kä cuɛ tɔ̱ɔ̱c kɛ jɛ. (Kä jɛn pay thuɔ̱k ni buɔthdɛ.) Kä cuɛ loc dhɔrɛ.

⁵ Kä cu ciek ruët. Kä cuɛ Dee-bid jäk kä raan i̱, “Ruëtdä.”

⁶ Kä cu Dee-bid Yo-ab jäk kä raan i̱, “Jäk ni ɣä kä U-ri-yaa raan Ɣɛ̈th.” Kä cu Yo-ab ɛ jäk kä jɛ.

⁷ Kä mëë ci U-ri-yaa ben kä jɛ, cuɛ thiec kɛ ta̱a̱ Yo-ab, kɛnɛ ta̱a̱ nath, kɛ ta̱a̱ in tekɛ ko̱r.

⁸ Kä cuɛ U-ri-yaa ku jiök i̱, “Wër dhɔru, bi wä lɔ̱ɔ̱ŋ.” Cu U-ri-yaa jiɛɛn dhɔr kua̱r, kä guɔ̱ɔ̱r kɛ jɛ ɛ raan dhɔaar kua̱r.

⁹ Kä duundɛ ɣöö U-ri-yaa Cuɛ niɛɛn thok dhɔaar kua̱r kɛɛl kɛ ja̱a̱ŋ kua̱rɛ, /kenɛ wä dhɔrɛ.

¹⁰ Kä min ca la̱r Dee-bid i̱, “/Ken U-ri-yaa wä dhɔrɛ,” cuɛ U-ri-yaa jiök i̱, “Ci bä jäl inu? Ɛŋu /keni wä dhɔru mɔ?”

¹¹ Kä cuɛ Dee-bid loc i̱, “Thanduk matdä ruac kɛnɛ ji̱ I-thɛ-rɛl, kɛ ji̱ Juda cieŋkɛ rɛy bilɛ ni. Kä te kuäärä ni Yo-ab kɛnɛ ji̱ kɔar kua̱rä rɛy ka̱a̱ni. A dëë ku wä dhɔrä, wa̱a̱ mi̱th kä ma̱thä, kä tɔ̱a̱cä kɛ ciekdä? Ce̱tnikɛ mɔ tëki mɔ, /cä kɛn ti̱ti̱ bi la̱t.”

¹² Kä cu Dee-bid U-ri-yaa jiök i̱, “Teni wa̱nɛ ɛn walɛ, kä i̱ ruun bä ji̱ jak kä wä.” Inɔ cu U-ri-yaa te kä Jɛ-ru-tha-lɛm kɛ ni̱n da̱ŋ rɛw.

¹³ Kä cu Dee-bid ɛ cio̱l mi̱eth. Cukɛ mi̱th kɛɛl kä cukɛ math, kä cuɛ jɛ jak kä yɔŋ. Kɛ thiaŋ cuɛ wä wee tɔ̱ɔ̱c rɛy pa̱ta̱nädɛ kɛnɛ ja̱a̱ŋ kua̱rɛ, /kenɛ wä dhɔrɛ.

¹⁴ Kɛ runwaŋ cu Dee-bid Yo-ab gɔa̱r warɛgak kä cuɛ jɛ ja̱k kɛ tet U-ri-yaa.

¹⁵ Ɛn rɛy warɛgakä cɛ gɔ̱r i̱, “Jäk ni U-ri-yaa nhiam ko̱o̱r mi ci leeth, kä kua rɔ yuɔ̱th jɔk kä a jɛ na̱kɛ.”

¹⁶ Kä kɛ gua̱th in go̱l Yo-ab wec, cuɛ U-ri-yaa jäk kä waaŋ ko̱o̱r.

¹⁷ Kä cu ji̱ wec ben raar cukɛ ben nyiëëny kɛ Yo-ab. Cua tha̱a̱ŋ nɛɛni Dee-bid näk, amäni U-ri-yaa cua näk bä.

¹⁸ Kä cu Yo-ab Dee-bid la̱t thuk ko̱o̱r diaal.

¹⁹ Kä cuɛ jääk jiök i̱, “Mi wi̱i̱ wä thuɔ̱k kɛ lät kua̱r thuk diaal.

²⁰ Kä bi kuäär gaak kɛ ji̱, kä bɛ ji̱ jiök i̱, ‘Ɛŋu /cuarɛ rɔ ti̱ec puɔ̱ny wec ɔ? Dëë yɛn ɛ kui̱c ɛn ɣöö ba Yɛ ba̱r puɔ̱ny pa̱ny?

²¹ Ɛŋa mi näk Ä-bi-mɛ-lɛk gat Yɛ-ru-bɛ-cɛth? Kä /ciɛ ciek ɛn nëë ci pil yuɔr wi̱i̱dɛ kɛ wi̱c pa̱ny, kä cuɛ cu li̱w kä Te-bedh? Ɛŋu wä yɛn thiekä pa̱ny ɔ?’ Kä bi cu wee i̱, ‘Ci ja̱ŋdu ni U-ri-yaa raan Ɣɛ̈th li̱w bä.’ ”

²² Inɔ cu jääk ben cuɛ Dee-bid ben la̱t tin diaal tin ci Yo-ab ɛ ja̱k kɛ kɛ i̱ bɛ ben lat.

²³ Kä cu jääk Dee-bid jiök i̱, “Kɛn naath ca nɛy tiam a cukɛ ben raar kä nɛy jɔk wec. Duundɛ ɣöö cua̱kɔ kɛ nyɔk kɛ joc ni rɛy wec.

²⁴ Duundɛ ɣöö cua nɛy ba̱r kɛ bääri rɛy pa̱nyni. Ɛ ca tha̱a̱ŋ nɛɛniku näk. Amäni ja̱ŋdu ni U-ri-yaa ca näk bä.”

²⁵ Kä cu Dee-bid ɛ loc i̱, “Jio̱kni Yo-ab i̱, ‘Ɛ lɔcdu /ci jiäk, kɛ ɣöö ko̱r näkɛ nɛmɛ ɛn walɛ kä bɛ min dɔ̱ŋ näk iruun. Mäkni ni wec ɛ bum, amäni mi ciɛ ka̱n.’ Wër comɛ.”

²⁶ Kä min ci ciek U-ri-yaa ɛ liŋ ɛn ɣöö ci cɔwdɛ li̱w, cuɛ cɔwdɛ par.

²⁷ Kä mëë ci ɣɔw bak, cu Dee-bid ɛ jäk kä ram wä jɛ nööŋ dhɔrɛ, kä cua ciekdɛ, kä cuɛ jɛ da̱p dhɔl. Kä duundɛ ɣöö min ci Dee-bid ɛ la̱t cɛ lɔc Kuɔth Nhial lo̱k.