2 Tham 10 - RUAC KUƆTH IN RƐL RƆ

Juc Dee-bid kɛ ji̱ Am-on kɛnɛ ji̱ Thi-ri-ya

¹ Kɛ kɔr kä mi mi cu kuäär ji̱ Am-on li̱w, kä cu gatdɛ ni Ɣa-nun ruëc kɛ gua̱thdɛ.

² Kä cu Dee-bid wee i̱, “Ɣän bä lät agɔaa kɛ Ɣa-nun gat Na-ɣac, kɛ ɣöö ci gua̱n lät agɔaa kɛ ɣä.” Cu Dee-bid naath ja̱k lätdɛ jɛ tɛ̈th lɔacdɛ kɛ kui̱ gua̱n. Kä cu ja̱a̱ŋ Dee-bid ben muun ji̱ Am-on.

³ Duundɛ ɣöö cu bööth ji̱ Am-on Ɣa-nun kuääriɛn jiök i̱, “Diiwi jɛ ɛn ɣöö Dee-bid, jäkɛ ni ji̱ kä tɛ̈th lɔacdɛ kɛ kui̱ guur? Jäkɛ ni kuaanykɛ, kɛ ɣöö ba wec ben lim, kä ba cu ben ka̱n?”

⁴ Inɔ cu Ɣa-nun kuaany Dee-bid ti̱kkiɛn mut kui̱ kɛl, kä cuɛ bieynikiɛn rɛ̈t dääriɛn kɛnɛ jolkiɛn, kä cuɛ kɛ jak kä wä.

⁵ Kä mëë ca la̱r Dee-bid, cuɛ kɛ jäk kä nɛy ti luɔrkɛ kɛ, kɛ ɣöö cikɛ pöc ɛlɔ̱ŋ kɛn naath. Kä cu kuäär wee i̱, “Ta̱yɛ kä Jɛ-ri-ko amäni mi ci ti̱kkun do̱ny, bia ku lɛ ben.”

⁶ Kä mëë ci ji̱ Am-on ɛ nɛn ɛn ɣöö ci ka ji̱ tɛ̈r Dee-bid, cukɛ nɛy ti bathdɔɔri ti jiɛɛn rɛw kɔk kä ji̱ Thi-ri-ya tin te kä Beth-re-ɣob kɛnɛ tin te kä Dho-baa, kɛ ji̱ Tob ti bathdɔɔri wäl rɛw. Kɛ kuäär Maakaa kɛnɛ nɛy ti bathdɔɔr kɛl.

⁷ Kä mëë ci Dee-bid ɛ liŋ, cuɛ Yo-ab ja̱k kɛnɛ ji̱ ko̱o̱r diaal.

⁸ Kä cu ji̱ Am-on ben raar cua tuɔ̱ŋ ben car thok duɔ̱p wec. Kä cu ji̱ Thi-ri-ya tin te kä Dho-baa, kɛnɛ Rɛ-ɣob, kɛ ji̱ Tob kɛ Maakaa, cuɔ̱ŋ kä rɔ̱ kueer wec.

⁹ Kä mëë ci Yo-ab ɛ nɛn ɛn ɣöö ba kɛ ma̱k kɛ nhiam kɛnɛ jɔk, cuɛ naath kuany kä ji̱ I-thɛ-rɛl, kä cuɛ kɛ la̱th lotdä ji̱ Thi-ri-ya.

¹⁰ Kä cuɛ duɔth nath ka̱m däman ni Ä-bi-cay, kä cua rɔ̱ car lotdä ji̱ Am-on.

¹¹ Kä cuɛ kɛ jiök i̱, “Mi wä ji̱ Thi-ri-ya ɣä wä tiam lua̱kɛ ɣä. Kä mi wa yɛ wä tiam ɛ ji̱ Am-on, bä yɛ ben luäk.

¹² Cuɔmɛ rɔ̱ agɔaa, kä buɔ̱mnɛ rɔ̱ kɛ kui̱ nɛɛni kɔn, kɛnɛ kui̱ wec Kuɔthdan. Kä bi Kuoth Nhial la̱t ni min gɔaa kɛ jɛ.”

¹³ Inɔ cu Yo-ab kɛnɛ nɛɛkɛ wä nyiëëny kɛ ji̱ Thi-ri-ya. Kä cukɛ rɔ̱ bar kɛ Yo-ab.

¹⁴ Kä mëë ci ji̱ Am-on ɛ nɛn ɛn ɣöö ci ji̱ Thi-ri-ya rɔ̱ bar, cukɛ rɔ̱ bar bäkɛ Ä-bi-cay, cukɛ riŋ rɛy wec. Kä cu Yo-ab luny jɔk ko̱o̱r kɛ ji̱ Am-on, kä cuɛ ben kä Jɛ-ru-tha-lɛm.

¹⁵ Kä mëë ci ji̱ Thi-ri-ya jɛ nɛn i̱ ca kɛ joc ɛ ji̱ I-thɛ-rɛl, cukɛ rɔ ma̱a̱t.

¹⁶ Cu Ɣä-dɛ̈d-ɛdhɛr raan ja̱k, wëë ji̱ Thi-ri-ya tin te jɔk kiɛɛr Yu-pɛ-ree-tidh nööŋ. Kä cukɛ ben kä Ɣe-lam, kɛɛl kɛ Co-bɛ̈k bo̱o̱th rɛ̈m Ɣä-dɛ̈d-ɛdhɛr bo̱thɛ kɛ.

¹⁷ Kä mëë ca la̱r Dee-bid, cuɛ ji̱ I-thɛ-rɛl diaal ma̱a̱t, kä cuɛ jiɛth kui̱ Jɔr-dɛn, kä cuɛ ben kä Ɣe-lam. Kä cu ji̱ Thi-ri-ya nyiëëny kɛ jɛ.

¹⁸ Kä cu ji̱ Thi-ri-ya rɔ bar kɛ ji̱ I-thɛ-rɛl. Kä cu Dee-bid kɛ näk ji̱ Thurbiɛɛli ti kur bärɔw, kɛ ji̱ jiöŋkööri ti bathdɔɔri ti jiɛɛn ŋuaan, kä cua Co-bɛ̈k bo̱o̱th rɛ̈mdiɛn moc buɔ̱t, kä cuɛ li̱w ɛn wa̱nɔ.

¹⁹ Kä mëë ci kua̱r kɔar Ɣä-dɛ̈d-ɛdhɛr diaal ɛ nɛn ɛn ɣöö ca kɛ joc ɛ ji̱ I-thɛ-rɛl, cukɛ mal lat kɛ ji̱ I-thɛ-rɛl, kä cu ka ja̱a̱ŋ I-thɛ-rɛl. Inɔ cu ji̱ Thi-ri-ya dual kɛ ɣöö ba ji̱ Am-on nyɔk kɛ luäk.