2 Pit 3 - RUAC KUƆTH IN RƐL RƆ

Lär kɛ ben Kua̱r ni Yecu

¹ Nhöökä, nɛmɛ ɛ jɛn rɛw warɛgakä mëë cä gɔ̱a̱r yɛ. Kä rɛydiɛn kɛn da̱ŋ rɛw jiaacä ni ca̱run in gɔaa kɛ ti̱mdun ti̱ti̱.

² Göörä ɣöö bi yɛn ruaacni tëë ca lat ɛ göök tin rɛ̈lkɛ rɔ̱ tëë wal tim, kɛnɛ luëëk Kua̱r ni Yecu kä Kään mëë ca la̱t yɛ ɛ jaakun tin la ji̱ kɔaar Yecu.

³ Bia nɛmɛ dhil ŋa̱c kɛ nhiam, ɛn ɣöö bi ji̱ boorä ben kɛ ni̱n tin jɔak, nɛy ti guɔ̱ɔ̱rkɛ ni di̱t lɔaacdiɛn kɛ tin go̱o̱r pua̱nykiɛn kɛ.

⁴ Kä bikɛ wee i̱, “Ruac ëë cɛ lat kɛ kui̱ benä Yecu anikä? Kɛ ɣöö ni mëë ci gua̱ndɔɔŋnikɔ li̱w, ŋot ti diaal nikɛ ta̱a̱ ëë tekɛ kɛ ni mëë tuɔkɛ ɣɔw kɛ ca̱k!”

⁵ Kä a ŋäc kɛn ɛ cukɛ thuɔ̱k ɛmɛ lo̱k, ɛn ɣöö mëëdan kɛ ruac Kuɔth cua nhial cak, kä cu piny päl raar rɛy pi̱i̱ni, kä cua jɛ da̱a̱k kɛ pi̱.

⁶ Kä kɛ pi̱ cua ɣɔw gua̱th ëëdan luɔ̱ny pi̱ nyɔac, kä cuɛ jɛ däk.

⁷ Kä kɛ jɛn riet Kuɔth ɔ kɛl ɔ, ca nhial kɛnɛ piny tin te thi̱n täämɛ kuëŋ go̱lä kɛ ɣöö bakɛ däk kɛ mac. Cakɛ tɔ̱w kɛ kui̱ ca̱ŋ luɔ̱k in di̱i̱t kɛnɛ däk nɛɛni tin thil luth kɛ Kuoth.

⁸ Kä duundɛ ɣöö yɛn nhöökä, /cuarɛ thuɔ̱k ɛmɛ päl ruëëc, ɛn ɣöö ce̱t cäŋ kɛl kɛ run ti bathdɔɔr kä Kuäär ni Kuoth, kä ce̱t run ti bathdɔɔr kɛ cäŋ kɛl kä jɛ.

⁹ /Ci Kuäär ni Kuoth a niy niy kɛ min cɛ lar i̱ bɛ la̱t, ce̱tkɛ duɔ̱ɔ̱p in car tha̱a̱ŋ nath ɛ niy niiy. Kä duundɛ ɣöö päl Kuoth ni lɔcdɛ piny kɛ yɛ. Kɛ ɣöö /cɛ jɛ go̱r i̱ bi ram kɛl bath kä yɛ, go̱o̱rɛ ɣöö bi nɛy diaal rɔ ri̱t dueerikiɛn.

¹⁰ Kä duundɛ ɣöö bi cäŋ Kua̱r ni Yecu ben ce̱tkɛ kueel, kä bi pua̱a̱r cu thil kɛ wuɔ̱w mi di̱i̱t, kä bi nyin nhial diaal waaŋ kɛ mac. Kä bi piny kɛnɛ ti diaal tin ca la̱t thi̱n, bikɛ pɛ̈t.

¹¹ Kɛ ɣöö bi ŋɔaani diaal ti̱ti̱ däk kɛ duɔ̱ɔ̱p ɛmɛ, kä bi yɛn ku la nɛy ti te i̱di? Gɔaaɛ ɛn ɣöö bia cieŋ kɛ ciaaŋ mi rɛl rɔ kä tekɛ luth Kuɔth.

¹² Liɛpɛ cäŋ Kuɔth kä jakɛ jɛ kä bëë kɛ pɛ̈th, kɛ jɛn cäŋ in ba nhial kɛɛliw dɔp a bɛ waaŋ, kä bi nyin nhial diaal cu lëër.

¹³ Kä duundɛ ɣöö ce̱tkɛ ruacdɛ min ca lar liɛpnɛ ciëŋ nhial kɛnɛ piny tin pay cak, gua̱a̱th in cieŋ cuŋ thi̱n.

¹⁴ Kɛ kui̱c ɛmɔ nhöökä, min liɛpɛ ŋɔaani ti̱ti̱, ɣɔ̱a̱nɛ jɛ ɛn ɣöö bi yɛn a wiɛc wiɛɛc ti thil bɛ̈ɛ̈l kä thil mɛ̈ɛ̈ny, kä ta̱yɛ kɛ mal kɛ Kuoth.

¹⁵ Kä carɛ jɛ ɛn ɣöö päl lɔaac Kua̱ran piny ɛ jɛn la ka̱ndan ɔ. Ce̱tkɛ mëë ca gɔ̱a̱r yɛ ɛ dämandan min nhɔaknɛ ni Puɔl, kɛ pɛl ëë ca ka̱m jɛ.

¹⁶ Cɛ gɔ̱a̱r kɛ kui̱ kä mɛmɛ rɛy warɛganikɛ diaal. Tëëkɛ tha̱a̱ŋ ŋɔaani rɛydiɛn ti bum luɔtdiɛn, ti ca lat ɛ nɛy ti kui̱c ŋu ti thil ca̱r ni dɔ̱ɔ̱rä kɛ kui̱ däkädiɛn, ce̱tkɛ min la kɛn jɛ a lät kä ruaacni Kuɔth tin kɔ̱ŋ.

¹⁷ Yɛn nhöökä, kɛ ɣöö cia mɛmɛ kɔŋ ŋa̱c, niɛkɛ rɔ̱, kä a yɛ /ca bi böth jɔ̱ɔ̱r ɛ dueer nɛɛni tin lökɛ ŋut, a bia bath kä ŋa̱thdun.

¹⁸ Kä duundɛ ɣöö piɛthɛ rɛy puthä kɛnɛ ŋäc Kua̱ran kä Käändan ni Yecu Kritho. A buay tekɛ jɛ ɛn täämɛ, amäni cäŋ kɛl. Inɔnɔ.