2 Kuɛ̈n 9 - RUAC KUƆTH IN RƐL RƆ

Gui̱l kua̱r ciek Rööl Cɛba kɛ Thɔ-lo-mon

¹ Kä mëë ci kuäär Cɛba mi ciek kɛ̈k Thɔ-lo-mon liŋ, cuɛ ben kä Jɛ-ru-tha-lɛm bëë ben ɣɔ̱n kɛ thiecni ti buɔ̱m buɔ̱ɔ̱m. Cuɛ ben kɛ nɛy ti ŋuan jälɛ kɛ thɔ̱a̱rɔa̱a̱li ti ŋuan no̱o̱ŋɛ wal ti kɔap kɔaap, kɛ pääm ti di̱t kökdiɛn kɛ da̱a̱p mi di̱i̱t ɛlɔ̱ŋ. Kä mëë cɛ jëk kɛ Thɔ-lo-mon, cuɛ la̱t tin diaal tin te lɔɔcdɛ.

² Kä cu Thɔ-lo-mon thiecnikɛ diaal loc. Kä cuɛ thil kɛl mi cu Thɔ-lo-mon dhal a /kenɛ la̱t jɛ.

³ Kä mëë ci kuäär ciek Cɛba pɛl Thɔ-lo-mon nɛn kɛnɛ luak in cɛ täth,

⁴ kɛ mi̱ethdɛ, kɛ gua̱a̱th nyuurä ji̱ kɔaarɛ, kɛ ta̱a̱ kuaanynikɛ tin la̱t kɛ jɛ ikä kɛ bieynikiɛn, kɛ nɛy tin muɔckɛ jɛ pi̱ kɛ bieynikiɛn, kɛ muc tin waŋkɛ tin cɛ thöp rɛy luaak Kuɔth Nhial, cuɛ ga̱a̱c ɛlɔ̱ŋ.

⁵ Kä cuɛ kuäär ni Thɔ-lo-mon jiök i̱, “Ɛn ruac ëë ca liŋ muun kɛ kui̱du kɛ kui̱ pɛlädu ɛ thuɔ̱k,

⁶ duundɛ ɣöö /ka̱nɛ ŋäth amäni mi ca ben ɛ a ca ben nɛn nikɛ waŋdä. Kä nɛnɛ /ka̱n ɣä la̱r tha̱a̱ŋ pɛlädu, ca min ca liŋ leny.

⁷ Kä ku lo̱c nɛɛniku lɛ tɛɛth i̱di! Kä ku ji̱ kɔaru tin te gekädu ni ciaŋ kä nɛ̈nkɛ pɛlu lɔcdiɛn lɛ tɛɛth i̱di!

⁸ Ɛ liak tekɛ Kuoth Nhial ni Kuothdu, min ci ji̱ nhɔk kä ci ji̱ jak kä kuäär mi ruëc kɛ ciötdɛ. Kɛ ɣöö nhɔk Kuoth I-thɛ-rɛl, kɛnɛ ɣöö bɛ kɛ kap nhial amäni cäŋ kɛl, cɛ ji̱ jak kä kuääriɛn kɛ ɣöö bi kɛnɛ cuŋ la̱t.”

⁹ Kä cuɛ kuäär ni Thɔ-lo-mon ka̱m da̱a̱p mi lëny ki̱luni ti bathdɔɔri da̱ŋ ŋuaan, kɛ wal ti kɔap kɔaap ti ŋuan ɛlɔ̱ŋ, kɛ pääm ti di̱t kökdiɛn. Kä cuɛ thil wal ti kɔap kɔaap ti ce̱tkɛ ti ca ka̱m kuäär ni Thɔ-lo-mon ti ɛ kuäär ciek Cɛba.

¹⁰ Kä cu nɛɛ Ɣu-ram kɛnɛ nɛɛ Thɔ-lo-mon tin ca da̱a̱p wä nööŋ kä O-për jiɛn ti tekɛ ŋuäny mi gɔaa kɛnɛ pääm ti di̱t kökdiɛn nööŋ bä.

¹¹ Kä cu kuäär ni Thɔ-lo-mon jiath in tekɛ ŋuäny mi gɔaa lät ko̱o̱tni luaak Kuɔth kɛnɛ ko̱o̱tni duëël kua̱r, kä cuɛ lät ni thuɔmni ji̱ kët din bä. Kä cuɛ thil mi ce̱tkɛ nɔmɔ mi cua nɛn ni wal muun Juda.

¹² Kä cu kuäär ni Thɔ-lo-mon kuäär ciek Cɛba ka̱m tin diaal tin go̱o̱rɛ kɛnɛ tin cɛ thiec, a /ci min ka̱m kɛ jɛ kɛ kui̱ mucä min cɛ ka̱m Thɔ-lo-mon te thi̱n. Kä cuɛ loc wi̱i̱dɛ kɛnɛ nɛɛkɛ.

Ria̱ŋ Thɔ-lo-mon

¹³ Kä la Thɔ-lo-mon da̱a̱p mi tekɛ ki̱luni ti bathdɔɔri ti jiɛn da̱ŋ rɛw wi̱cdɛ diɔ̱k a jek kɛ ruɔ̱n,

¹⁴ a /ci min la köök a ŋun te thi̱n. Kä cu kua̱r Ä-rab-ya diaal kɛ ruëëc muɔ̱ɔ̱n da̱a̱p kɛnɛ ciɛk in bo̱r nöŋ Thɔ-lo-mon bä.

¹⁵ Kä cu kuäär ni Thɔ-lo-mon kötni ti kur da̱ŋ rɛw ti di̱t la̱t kɛ da̱a̱p mi ca riac kä te ko̱t kɛl kɛ ki̱luni dääpä da̱ŋ bärɔw.

¹⁶ Kä cuɛ kötni ti kur diɔ̱k ti nyin tiɛtni la̱t kɛ da̱a̱p mi ca tiac. Kä ca ko̱t kɛl la̱t kɛ da̱a̱p mi tekɛ ki̱luni da̱ŋ rɛw. Kä cu kuäär kɛ la̱th Duëël Ruɔ̱ɔ̱p Lɛ-ba-nɔn.

¹⁷ Kä cu kuäär kɔm kuäärä mi di̱i̱t lɛni la̱t kɛ tuɔ̱ŋ guɔ̱ri, kä cuɛ jɛ rɔth kɛ da̱a̱p mi lɛy lɛy.

¹⁸ Kä ɛn kɔm tëë kɛ ko̱o̱tni da̱ŋ bäkɛl kɛ gua̱a̱th ciökni mi da̱a̱p mi te puɔ̱ɔ̱ny kɔam. Kä gëëknikɛ tëë kɛ gua̱a̱th mi la̱th kɛ tet thi̱n, kä te lony da̱ŋ rɛw cuŋä gëëkni tetni kɔam,

¹⁹ kä te lony da̱ŋ wäl rɛw cuŋä ko̱o̱tni kɔam da̱ŋ bäkɛl, te pek ko̱o̱tdä mɔ kɛ lony kɛl. Kä cuɛ thil mi ce̱tkɛ jɛ mi cua la̱t kua̱ri tin kɔ̱ŋ.

²⁰ Kä kuak ma̱th kua̱r ni Thɔ-lo-mon diaal kɛ da̱a̱p, kä kuak Duëël Ruɔ̱ɔ̱p Lɛ-ba-nɔn kɛn diaal da̱a̱p mi lɛy lɛy. Kä /ca ciɛk in bo̱r cɔl ni duɔ̱ɔ̱r ni̱ni Thɔ-lo-mon.

²¹ Kɛ ɣöö jɛn tëë kɛ babuur mi la̱a̱tkɛ ɛ nɛɛ Ɣu-ram, la wëë kä Tar-cic kä kɛɛl kɛ kɔr runi da̱ŋ diɔ̱k bɛ da̱a̱p kɛnɛ ciɛk in bo̱r kɛ tuɔ̱ŋ guɔ̱ri kɛ gɔakni wä nööŋ.

²² Kä cu kuäär ni Thɔ-lo-mon kua̱r diaal leny kɛ ria̱ŋ kɛnɛ pɛl mi di̱i̱t wi̱i̱ muɔ̱ɔ̱n.

²³ Kä cu kua̱r diaal wi̱i̱ muɔ̱ɔ̱n ben kä Thɔ-lo-mon kɛ ɣöö ba pɛl in ci Kuoth ɛ ka̱m jɛ ben liŋ.

²⁴ Kä cu ramɔ mucdɛ nööŋ, ciɛk in bo̱r da̱a̱p, bieyni, kɛ wal tin kɔp kɛ jio̱o̱k tuɔ̱ruɔ̱k kɛ muɔ̱li, kɛ ti ŋuan run kä run.

²⁵ Kä cu Thɔ-lo-mon tekɛ duël ti bathdɔɔri ŋuaan kɛ kui̱ jiöŋkööri kɛnɛ thurbiɛɛli, kɛ ji̱ jiöŋköör ti bathdɔɔri wäl rɛw, tin cɛ la̱th wi̱i̱ni thurbiɛɛli kɛnɛ wec kua̱r kä Jɛ-ru-tha-lɛm.

²⁶ Kä cua kuäär kua̱ri diaal a känɛ ni kiir Yu-pɛ-ree-tidh amäni muun ji̱ Pi-li-thɛt a räth ni këth I-jëp.

²⁷ Kä cu kuäär ciɛk in bo̱r jak kä ŋuan kä Jɛ-ru-tha-lɛm ce̱t guiy, kä cuɛ jiɛn ŋuëri jak kä ŋuan ce̱t jiɛn täpä.

²⁸ Kä la Thɔ-lo-mon a wa kök jiöŋkööri kä I-jëp kɛnɛ wi̱i̱ diaal tin kɔ̱ŋ.

Lia̱a̱ Thɔ-lo-mon

²⁹ Täämɛ cua duɔth lätni Thɔ-lo-mon ni tukädɛ cu mäni guutdɛ, ɛ /ka̱nkɛ ku gɔ̱a̱r rɛy buɔk cäätdä go̱kä ni Na-than, kɛnɛ ruaacni go̱o̱kä Ä-ɣi-yaa raan Cilo, kɛ nyuuth go̱kä ni Ido, mëë ruac kɛ kui̱ Ya-rɔ-baam gat Nɛ-bat?

³⁰ Cuɛ I-thɛ-rɛl ruac kä Jɛ-ru-tha-lɛm kɛ run ti jiɛn ŋuaan.

³¹ Kä cu Thɔ-lo-mon li̱w, kä cua jɛ kony däär wec gua̱n ni Dee-bid. Kä cu gatdɛ ni Rɛ-ɣɛ̈-bɔm ruëc kɛ gua̱a̱thdɛ.