2 Kuɛ̈n 8 - RUAC KUƆTH IN RƐL RƆ

Lät Thɔ-lo-mon tin kɔ̱ŋ

¹ Kɛ thuɔ̱k runi ti jiɛn da̱ŋ rɛw, tëë tääth Thɔ-lo-mon luak Kuɔth kɛnɛ duelɛ thi̱n,

² cu Thɔ-lo-mon wi̱i̱ tëë ca ka̱m jɛ ɛ Ɣu-ram nyɔk kɛ ta̱th, kä cuɛ ji̱ I-thɛ-rɛl jak kä cieŋ thi̱n.

³ Kä cuɛ wec Ä-math-dho-baa käp.

⁴ Kä cuɛ wec Tad-mor täth rɛy dɔaar, kä cuɛ wi̱i̱ tɔ̱ɔ̱wä täth kä Ɣä-math.

⁵ Kä cuɛ piny wec Beth-o-ron täth, ala wi̱i̱ ti buɔ̱m buɔ̱ɔ̱m ti te thiekni kɛ do̱o̱pni,

⁶ kɛ Bää-lath kɛnɛ wi̱i̱ tɔ̱ɔ̱wä, kɛ wi̱i̱ thurbiɛɛlikɛ kɛ wi̱i̱ ji̱ jiöŋköörikɛ nikɛ tin diaal tëë go̱o̱rɛ ta̱thdiɛn kä Jɛ-ru-tha-lɛm, kɛnɛ Lɛ-ba-nɔn kɛ gua̱th diaal tëë ruaacɛ.

⁷ Kä cu nɛy diaal tëë ci duɔth kä ji̱ ɣɛ̈th kɛnɛ ji̱ Ɛ-mor kɛ ji̱ Pɛ-rii-dhi kɛnɛ ji̱ Iwi kɛ ji̱ Yɛ-buth, tëë /ci tɔ̱a̱ ji̱ I-thɛ-rɛl,

⁸ tëë ci karkiɛn duɔth muun tëë /ken ji̱ I-thɛ-rɛl kɛ näk, cu Thɔ-lo-mon kɛ jak kä kuaany kɛ buɔ̱m, amäni walɛ.

⁹ Duundɛ ɣöö /kenɛ ji̱ I-thɛ-rɛl jak kä kuaanykɛ. Cuɛ jak nikɛ kä rɛmdɛ, kɛnɛ ji̱ kɔaarɛ, kä bööth rɛ̈m kɛ thurbiɛɛlikɛ kɛnɛ jiöŋköörikɛ.

¹⁰ Kä cu bööth ji̱ kɔaar kua̱r ni Thɔ-lo-mon a nɛy ti kur rɛw wi̱cdɛ jiɛn dhieec tin ruackɛ naath.

¹¹ Kä cu Thɔ-lo-mon ciekdɛ nya kua̱r I-jëp ɣo̱th wi̱c Dee-bid, kä cuɛ jɛ naŋ duëël in cɛ lät kä jɛ, kɛ ɣöö cɛ wee, “/Ci ciekdä bi cieŋ duëël kua̱r I-thɛ-rɛl ni Dee-bid, kɛ ɣöö gua̱a̱th mi ci thanduk matdä ruac Kuɔth Nhial te thi̱n rɛl gɔɔydɛ rɔ.”

¹² Kä cu Thɔ-lo-mon muc tin waŋkɛ thöp Kuoth Nhial wi̱i̱ yi̱kä min cɛ täth thok luaak Kuɔth,

¹³ ce̱tnikɛ pëk mucni mëë ca lar ɛ Muthɛ kɛ cäŋ lɔ̱ŋä kɛnɛ tëth path kɛ nin ti̱mä da̱ŋ diɔ̱k tin la la̱tkɛ, mi̱eth in thil thuɔp kɛ cäŋ ti̱mä juɔkni kɛ cäŋ ti̱mä luaak Kuɔth.

¹⁴ Kä cuɛ guɔ̱ɔ̱r ni ŋuɔ̱t gua̱n ni Dee-bid, cuɛ bööth palä rialikä kɛ kui̱ lätnikiɛn, kɛ ji̱ Lii-bay kɛ ɣöö bikɛ ki̱et kä ba bööth palä luäk ce̱tkɛ lät tin görkɛ ni ciaŋ. Kä cuɛ ga̱a̱ŋ thuɔk luaak rialikä ce̱tnikɛ pëk thukni luaak, ce̱tnikɛ mëë ci Dee-bid raan Kuɔth ɛ lar.

¹⁵ Kä cuɛ thil ram mi wä gekä kä bööth palä kɛnɛ ji̱ Lii-bay kä tin diaal tin ci kuäär kɛ lar amäni gua̱th tɔ̱ɔ̱wni yio̱o̱ni.

¹⁶ Inɔ cu lät Thɔ-lo-mon diaal thuɔ̱k agɔaa, nikɛ cäŋ ëë tuɔkɛ yiɛth luaak Kuɔth Nhial piny cu mäni cäŋ ëë thuk kɛ jɛ. Inɔ cu luaak Kuɔth Nhial thuɔ̱k.

¹⁷ Kä cu Thɔ-lo-mon wä wi̱c Ɛ-dhon-ga-bɛr kɛnɛ wec E-loth kɛ baŋ yiëër muun Ɛ-dɔm.

¹⁸ Kä cu Ɣu-ram ɛ jäk kä babuur naŋkɛ jɛ ɛ ji̱ kɔaarɛ nɛy ti ŋa̱ckɛ rɛy yiëër. Kä cukɛ wä kä O-për kɛɛl kɛ ji̱ kɔaar Thɔ-lo-mon, kä cukɛ da̱a̱p mi tëë ki̱luni ti lɛ̱̈nykɛ ki̱luni ti bathdɔɔri da̱ŋ wäl dhieec. Kä cukɛ jɛ nöŋ Kuäär ni Thɔ-lo-mon.