2 Kuɛ̈n 7 - RUAC KUƆTH IN RƐL RƆ

Ley Thɔ-lo-mon kɛ luak Kuɔth

¹ Kä min ci Thɔ-lo-mon thuɔ̱k kɛ pal, cu mac ben piny ni nhial cuɛ muc in waŋkɛ ben pɛt kɛnɛ luuri, kä cu buay gɔɔyä Kuɔth Nhial rɛy luaak thiäŋ.

² A cäŋɛ ni bööth palä /ca rɔ dëë luäŋ kɛ wä rɛy luaak Kuɔth Nhial, kɛ ɣöö ci buay gɔɔyä Kuɔth Nhial luak thiäŋ.

³ Kä min ci ji̱ I-thɛ-rɛl mac nɛn cɛ ben piny ni nhial kä ci buay gɔɔyä Kuɔth Nhial luak thiäŋ, cukɛ wuɔ̱thkiɛn guɔ̱l piny palkɛ kä liakɛ Kuoth Nhial i̱, “Kuoth Nhial gɔaaɛ kä nhökdɛ thilɛ jɛ pek amäni cäŋ kɛl.”

⁴ Ɛ jɛn, kuäär kɛnɛ nɛy diaal Kuoth Nhial thöp muc.

⁵ Cu Kuäär ni Thɔ-lo-mon muc thääk ti bathdɔɔri ti jiɛn da̱ŋ rɛw wi̱cdɛ rɛw thöp ala muc kɛ det ti bathdɔɔri ti kuɔ̱r kɛl wi̱cdɛ jiɛn da̱ŋ rɛw. Cu kuäär kɛnɛ nɛy diaal luak Kuɔth lɛy.

⁶ Kä cu bööth palä wä gua̱thnikiɛn, amäni ji̱ Lii-bay bä, puanykɛ Kuoth Nhial kɛ thuɔmni tëë ca la̱t ɛ kuäär ni Dee-bid i̱ (nhökdɛ thilɛ jɛ pek) ce̱tnikɛ mëë ca la̱t ɛ Dee-bid. Kä kooth bööth palä kaaŋni lotdä ji̱ Lii-bay, kä te ji̱ I-thɛ-rɛl diaal cuŋä.

⁷ Kä cu Thɔ-lo-mon där kal min lot ni thok luaak Kuɔth Nhial lɛy, kɛ ɣöö cɛ muc in waŋkɛ kɛnɛ thio̱o̱l mucni malä waŋ thi̱n. Kɛ ɣöö yi̱k cikä min yian mëë cɛ la̱t /ci muc tin waŋkɛ kɛnɛ muc bɛɛl kɛ thio̱o̱l dëë ro̱ŋ thi̱n.

⁸ Ɛn guäth ɛmɔ cu Thɔ-lo-mon kɛnɛ ji̱ I-thɛ-rɛl diaal mi̱eth ti̱mä la̱t kɛ ni̱n bärɔw. Cuɛ tekɛ nɛy ti ŋuan a känɛ ni cothä nath kä Lɛbo-ɣä-mat cu mäni tɔ̱ɔ̱r I-jëp.

⁹ Kä kɛ bädäk ni̱ni cua duɔl mi rɛl rɔ dol. Cukɛ ni̱n bärɔw thuk leyä yi̱kä, kɛ ti̱em kɛ ni̱n bärɔw.

¹⁰ Kɛ cäŋ kä jiɛn da̱ŋ rɛw wi̱cdɛ diɔ̱k kä pay bärɔw (pay yietni) cuɛ naath jak kä wä dho̱rikiɛn, kɛ tɛ̈th lɔaac kɛ kui̱ gɔɔyä mëë ci Kuoth Nhial ɛ nyuɔ̱th Dee-bid kɛnɛ Thɔ-lo-mon kɛ nɛɛkɛ ni ji̱ I-thɛ-rɛl.

Nyɔak Kuɔth kɛ nyuth rɔ Thɔ-lo-mon

¹¹ Kä mëë ci Thɔ-lo-mon thuɔ̱k kɛ ta̱th luaak Kuɔth Nhial kɛnɛ ta̱th duëël kua̱r, kɛ ti diaal tëë caarɛ i̱ derɛ la̱t rɛy luaak Kuɔth kɛnɛ duelɛ agɔaa.

¹² Cu Kuoth rɔ nyuɔ̱th jɛ kɛ wäär, kä cuɛ jɛ jiök i̱, “Ɣän ca palu liŋ, kä ca gua̱a̱th ɛmɛ mëk rɔ ala luak mucni.

¹³ Kä mi wa̱a̱ nhiaal wä pën, a /cɛ bi dɛ̈m, kiɛ bä kɔryɔm jäk kä wi̱i̱ muɔ̱ɔ̱n kiɛ bä nɛɛkä jak kä buk bɛlkiɛn,

¹⁴ mi wä nɛɛkä ɣä wä pal thiëckɛ ɣä, kä ca rɔ ri̱t kä jiäkiɛn. Ɣän bäkɛ liŋ ni nhial, kä bäkɛ pa̱l dueriɛn, kä bä mundiɛn jak kä gɔaa.

¹⁵ Kä täämɛ bi waŋdä te luaak ɛmɛ, kä bä pali diaal tin palkɛ thi̱n liŋ.

¹⁶ Kä ɣän ca luak ɛmɛ mɛk, kä ca lɛy kɛ ɣöö bä te thi̱n amäni cäŋ kɛl. Bä guic kä bä gaŋ ni ciaŋ.

¹⁷ Kä kɛ kui̱du mi wi̱i̱ guɔ̱ɔ̱r ni dupkä ce̱tkɛ mëë ci guur ni Dee-bid kɛ guɔ̱ɔ̱r, kä bi la̱t ni tin diaal tin ca lar ji̱, kä bi tit ni ŋuɔ̱tkä kɛnɛ luëëkä,

¹⁸ bä kuääru jak kä te thi̱n, ce̱tkɛ mëë cakɔ mat kɔnɛ guur ni Dee-bid i̱, ‘/Ci bi thil ram mi rui̱i̱c kä I-thɛ-rɛl.’

¹⁹ “Kä mi ku rɔ lɛ wä riet gekä, a bi ŋuɔ̱tkä kɛnɛ luëëkä ti ca la̱th nhiamdu ti bi tit, kä bi wä pal ni kuth kɔ̱kiɛn,

²⁰ bä ji̱ woc muun in ca ka̱m ji̱. Kä bä luak ɛ ca lëy rɔ mi, woc waaŋdä, kä bä jak kä cäät rɛy dööri diaal.

²¹ Kä ɛn luak ɛmɛ liakɛ mi, bi nɛy diaal tin wä rët kɛ gëëkdɛ ga̱a̱c, kä bikɛ ŋëër kä bikɛ wee, ‘Ɛŋu ci Kuoth Nhial nɛmɛ lät kä mun ɛmɛ kɛnɛ luak ɛmɛ ɔ?’

²² Kä bi naath kɛ loc i̱, ‘Ɛ ɣöö cikɛ Kuoth Nhial, ni Kuoth gua̱ni mëë no̱o̱ŋkɛ raar muun I-jëp pa̱l ruëëc, kä ca wä käp ni kuth kɔ̱kiɛn, kä palkɛ ni kɛ. Kɛ kui̱c ɛmɔ ɛ jɛn ci Kuoth Nhial kɛ nöŋ jiäk diaal ti̱ti̱ mɔ.’ ”