2 Kuɛ̈n 6 - RUAC KUƆTH IN RƐL RƆ

Ruac Thɔ-lo-mon kɛ naath

¹ Kä cu Thɔ-lo-mon wee, “Ci Kuoth Nhial wee bä cieŋ rɛy puɔ̱rä mi col.

² Kä ɣän ca ji̱ ta̱th luak mi gɔaa mi bi cieŋ thi̱n amäni cäŋ kɛl.”

³ Kä min te duɔl ji̱ I-thɛ-rɛl diaal cuŋä ɛn wi̱ni, cu kuäär rɔ rietkɛ, kä cuɛ kɛ poth.

⁴ Kä cuɛ wee, “Ɛ puɔ̱th tekɛ Kuoth Nhial min la Kuoth I-thɛ-rɛl, min ci ruacdɛ mëë cɛ la̱r gua̱a̱r ni Dee-bid tit wëë i̱,

⁵ ‘Nikɛ cäŋ ëë ca nɛɛkä ni ji̱ I-thɛ-rɛl nööŋ raar muun I-jëp, thilɛ wec mi ca mɛk rɛy thuk duëli ji̱ I-thɛ-rɛl diaal mi bi luak täth kɛ ciötdä mi bi waŋdä te thi̱n, kä thilɛ ram mi ca kuany mi bi nɛɛkä ni ji̱ I-thɛ-rɛl ruac.

⁶ Kä duundɛ ɣöö ɛn täämɛ ca Jɛ-ru-tha-lɛm mɛk kɛ ɣöö ba gua̱th cio̱tädä mi te waŋdä thi̱n, kä ca Dee-bid kuany ala kuäär nɛɛkä ni ji̱ I-thɛ-rɛl.’

⁷ Kä ɛn täämɛ tëë lɔɔc gua̱a̱r ni Dee-bid ɛn ɣöö bɛ kuak la̱t kɛ kui̱ cio̱tdä, Kuɔth Nhial min la Kuoth I-thɛ-rɛl.

⁸ Duundɛ ɣöö cu Kuoth Nhial gua̱a̱r ni Dee-bid jiök i̱, ‘Ɛ ca̱r mi gɔaa ɛn ɣöö tëë lɔɔcdu i̱ bi ɣä ta̱th luak ɛ mi gɔaa ɛn ɣöö tëë lɔɔcdu.

⁹ Duundɛ ɣöö /ciɛ bi la̱t ɛ ji̱n ɛn luak kɛ kui̱dä, bi jɛ la̱t gatdu min bi diëth.’

¹⁰ Kä täämɛ ci Kuoth Nhial ruacdɛ mëë cɛ lat cuɔ̱p. Kɛ ɣöö ca gua̱th gua̱a̱r ni Dee-bid guäl, a ca nyuur wi̱i̱ kɔam kuäärä I-thɛ-rɛl, ce̱tkɛ mëë ci Kuoth Nhial ɛ lar. Kä ca luak la̱t kɛ kui̱ ciötdä Kuɔth Nhial min la Kuoth I-thɛ-rɛl.

¹¹ Kä ca thanduk matdä ruac Kuɔth la̱th thi̱n, min la mat ruac Kuɔth Nhial ëë cɛ lat kɛ ji̱ I-thɛ-rɛl.”

Pal Thɔ-lo-mon kɛ kui̱ leyä

¹² Kä cu Thɔ-lo-mon cuɔ̱ŋ nhiam yi̱kä Kuɔth Nhial nhiam dolä ji̱ I-thɛ-rɛl diaal, kä cuɛ tetkɛ tar palɛ.

¹³ Kä cuɛ gua̱a̱th cuŋä la̱t kɛ ciɛk in yian mi bär jɔakdɛ jua̱th tetni da̱ŋ dhieec kä ɣäp ɣääpdɛ jua̱th tetni da̱ŋ dhieec kä bärɛ nhial ɛ jua̱th tetni da̱ŋ diɔ̱k, kä cuɛ jɛ la̱th däär kal. Kä cuɛ wä cuɔ̱ŋ thi̱n. Kä cuɛ rɔ ka̱m mua̱a̱l thi̱n nhiam dolä ji̱ I-thɛ-rɛl diaal, kä cuɛ tetkɛ tar nhial.

¹⁴ Kä cuɛ wee, “Aɣ Kuoth Nhial, Kuoth I-thɛ-rɛl, thilɛ Kuoth mi päär kɛ ji̱ nhial kiɛ piny, mi tiit gukdɛ, kä nyuth nɛɛkɛ tin guɔ̱ɔ̱rkɛ jɛ kɛ lɔcdiɛn kɛɛliw nhök mi thil pek.

¹⁵ Kä ci ruacdu mëë ci lat kɛ gua̱a̱r ja̱ŋdu ni Dee-bid tit. Kä ɛn walɛ ci laat diaal a thuɔ̱ɔ̱k.

¹⁶ Kä täämɛ lö Kuoth Nhial, Kuoth I-thɛ-rɛl tit ruac ëë ci lat kɛ gua̱a̱r ja̱ŋdu ni Dee-bid, mëë wi̱i̱ i̱, ‘/Ci bi met thil ram mi la kuäär nhiamdä kä I-thɛ-rɛl, mi wä gaatku ŋuɔ̱tkä wä tit ce̱tkɛ min ci la̱t.’

¹⁷ Kä täämɛ lö Kuoth Nhial, Kuoth I-thɛ-rɛl, ku ruac ëë ci la̱r ja̱ŋdu ni Dee-bid jak kä thuɔ̱k.

¹⁸ “Kä ɛn duɔ̱ɔ̱r ɛ thuɔ̱k ɛn ɣöö dëë Kuoth cieŋ piny kɛɛl kɛ naath? Kä cäŋɛ ni pua̱a̱r nhial /cɛ ji̱ dëë naŋ. Kä ku kuɛ̈ɛ̈ luak ɛ ca täthɛ lɛ ni̱n ɛ di!

¹⁹ Kä Kuoth Nhial Kuothdä liŋ pal jäŋädu, kä käm ni ɣä mi ca thiec ɛ nhiamdu.

²⁰ Kä ɛ waŋdu guic luaak ɛ mi kɛ wäär kɛnɛ cäŋdäär, ɛ jɛn gua̱a̱th in ci lar i̱ bi ciötdu te thi̱n. Kä liŋ pal jäŋädu mi palɛ a cɛ wi̱cdɛ luɔc guäth ɛmɛ.

²¹ Liŋ palä kɛnɛ pal nɛɛniku ni ji̱ I-thɛ-rɛl mi palkɛ a ca wuɔ̱thkiɛn riet ɛn guäth ɛmɛ. Liŋɛ ni nhial guäth cieŋädu, kä mi wi̱i̱ jɛ liŋ päli nɛy ikä.

²² “Kä mi ci raan gua̱n thieekädɛ lät kä duer, kä ca thiec kɛ ya̱c, kä bɛ ben ya̱c nhiam yi̱kädu rɛy luaak ɛmɛ,

²³ liŋɛ ni nhial lö Kuoth Nhial, luk kam ja̱a̱ŋniku, kä ku gua̱n dui̱rä duerɛ la̱th ni wi̱i̱dɛ kä ku gua̱n cuŋä ka̱m cuɔ̱ɔ̱ŋdɛ.

²⁴ “Kä mi waa nɛɛku ni ji̱ I-thɛ-rɛl wä joc ɛ gua̱n tɛ̈r kɛ ɣöö ca ji̱ duer duer, mi wäkɛ luny kä ji̱, kä bikɛ pal latkɛ dueriɛn nhiamdu luaak ɛmɛ.

²⁵ Liŋ ɛ ni nhial, kä päl duer nɛɛku ni ji̱ I-thɛ-rɛl, kä loc nikɛ muun ëë ci ka̱mkɛ kɛnɛ gua̱ni.

²⁶ “Kä mi ci ɣɔw thil nhiaal kɛ ɣöö ca ji̱ duer duer ɛ nɛɛku, mi wäkɛ pal luɔckɛ nhiamdiɛn ɛn luaak ɛmɛ, kä ba dueerkiɛn lat, kɛ ɣöö cikɛ moc riɛk,

²⁷ liŋkɛ ni nhial, kä päli ja̱a̱ŋku ni ji̱ I-thɛ-rɛl dueriɛn nyuth, nikɛ duɔ̱p in dëë guɔ̱ɔ̱r. Kä moc kɛ nhiaal muundiɛn ëë ci ka̱m kɛ ala duŋdiɛn.

²⁸ “Kä mi ci mun tekɛ buɔth kiɛ kɔ̱m kiɛ kɔryɔm kiɛ rak, kiɛ mi ca nɛɛku go̱l ɛ ji̱ tɛ̈riɛn, kiɛ liaw rɛydiɛn,

²⁹ palɔ ba palɔ kiɛ thiec ɔ ba thiec ɔ ɛ raandu mɔ kä ji̱ I-thɛ-rɛl diaal, kɛ lɔc mi jiɛth, kä bɛ tetkɛ cuɔ̱ŋ lotdä luaak ɛmɛ,

³⁰ liŋɛ ni nhial guäth cieŋädu. Kä pälikɛ ikä, kä lätni raan ce̱tnikɛ min ro̱ŋ kɛ jɛ. (Kɛ ɣöö ɛ ji̱n kä rɔa ŋäc lo̱c ɔ).

³¹ Inɔ ba ji̱ luɔ̱th, kä ba guɔ̱ɔ̱r ni dupku gua̱thni diaal teekädiɛn muun ëë ci ka̱m gua̱nikɔ.

³² “Inɔ bä kä ram mi juɔ̱r mi /ci mɔ a raan nɛɛniku ni ji̱ I-thɛ-rɛl, mi bä guäth mi na̱n, kɛ ɣöö cɛ di̱t bumä cio̱tädu liŋ, kä bɛ ben pal lotdä luaak ɛmɛ,

³³ liŋɛ ni nhial guäth cieŋädu. Kä lätni mɔ cɛ thiec kä ji̱ mɔ, kɛ ɣöö bi dör wec muɔ̱ɔ̱n diaal ji̱ ŋa̱c kä ba ji̱ luɔ̱th, ce̱tkɛ min la̱tkɛ ɛ nɛɛku ni ji̱ I-thɛ-rɛl. Kɛn ɣöö ba ɛn luak ɛ ca la̱tdɛ ŋa̱c ɛn ɣöö cɔalkɛ jɛ kɛ ciötdu.

³⁴ “Kä mi wä nɛɛku nyiëëny kɛ ji̱ tɛ̈riɛn kɛ duɔ̱ɔ̱p ɔ ci jäk ni kɛ mɔ, mi wä ji̱ pal a ca nhiamdiɛn luɔc ɛn wi̱c ɛ ci mɛk ɛ kɛnɛ luak ɛ ca ta̱th kɛ kui̱ cio̱tädu ɛ,

³⁵ liŋ paliɛn ni nhial, kä käm nikɛ min ca thiec.

³⁶ “Kä mi ca ji̱ duer duer (kɛ ɣöö thilɛ ram mi ci dui̱r) kä ci gaak kɛ kɛ kä bikɛ la̱th tetdä gua̱n tɛ̈r, kä cɛ kɛ pɛ̈c muun go̱lä mi na̱n kiɛ thia̱k,

³⁷ kä mi wä kɛn lɔcdiɛn ri̱t muun in cakɛ pɛ̈c thi̱n, kä cikɛ rɔ̱ riet ji̱ ɛn muun nɛɛni tin cakɛ pɛ̈c thi̱n a lar kɛ jɛ i̱, ‘Cakɔ duer, cakɔ mi jiääk la̱t,’

³⁸ kä mi cikɛ rɔ̱ ri̱t kɛ lɔcdiɛn kɛɛliw kɛnɛ ca̱riɛn kɛɛliw muun ɛ cakɛ naŋ thi̱n ɛ la pëëc ɔ. Mi wäkɛ pal luɔtkɛ ni mundiɛn ëë ci ka̱m gua̱ni, kɛnɛ wec ɛ ci mɛk ɛ kɛ luak ɛ ca lät kɛ kui̱ cio̱tädu,

³⁹ liŋ paliɛn ni nhial gua̱th cieŋädu. Kä käm nikɛ min ca thiec, kä päli nɛɛku tin ca ji̱ duer duer dueerkiɛn.

⁴⁰ Kä täämɛ lö Kuothdä, guic nɛy kä liŋ pal ɛ palkɛ mi ɛn guäth ɛmɛ.

⁴¹ “Kä ku jiɛn ɛn täämɛ, lö Kuoth Nhial, ni Kuoth, kä ber guäth lɔ̱ŋädu, ji̱n yɛnɛ thanduk matdä bumkädu. Kä lö Kuoth Nhial ni Kuoth la̱thkɛ bieyni känkädu, kä a nɛɛku tin gɔw lo̱ckiɛn tɛth rɛy gɔɔyädu.

⁴² Kä lö Kuɔth Nhial ni Kuoth, /cu raandu min ci kuany lo̱k! Tim nhökdu min thil pëk kɛ ja̱ŋdu ni Dee-bid.”