2 Kuɛ̈n 4 - RUAC KUƆTH IN RƐL RƆ

Kuak kɛ kui̱ luaak

¹ Kä cuɛ yi̱k cikä min yian täth, bärɛ kɛnɛ ɣäp ɣääpdɛ ɛ jua̱th tetni ti jiɛn da̱ŋ rɛw, kä bärɛ nhial ɛ jua̱th tetni da̱ŋ wäl.

² Kä cuɛ dhaar puɔɔkä mi gul gul täth bä kɛ yiëëth yian, tëë kɛ jua̱th tetni da̱ŋ wäl ŋɛpnikɛ, kä lueŋ jiɛcdɛ tëë kɛ jua̱th tetni da̱ŋ dhieec, kä te buɔ̱lɛ kɛ bëër ti tekɛ jua̱th tetni ti jiɛn diɔ̱k.

³ Kä ca piny ŋɛpädɛ lät kä ti ce̱tkɛ thääk ti tekɛ jua̱th tetni da̱ŋ wäl ti go̱o̱l dhaar puɔɔkä. Kä ca kɛ la̱t kɛ bëër rɛw, kä ca kɛ ta̱th puɔ̱ɔ̱nydɛ mëë ta̱thkɛ jɛ.

⁴ Kä cua la̱th jɔk thääkni da̱ŋ wäl rɛw, ci diɔ̱k nhiamdiɛn riet kui̱c caam, kä ci diɔ̱k tin kɔ̱ŋ nhiamdiɛn riet kui̱c cuëëc, kä ci diɔ̱k tin kɔ̱kiɛn nhiamdiɛn riet kui̱c känyä ca̱ŋ, kä ci diɔ̱k tin kɔ̱ŋ nhiamdiɛn riet kui̱c konyä ca̱ŋ. Kä cikɛ jio̱kiɛn riet kä dhaar puɔɔkä kɛn diaal.

⁵ Kä ce̱t dëlɛ ɛn dhaar kɛ pät tetdä ran. Kä cɛ ŋɛ̈pdɛ la̱t ce̱tkɛ ŋɛ̈p lirä, ce̱tdɛ kɛ gaak tualä. Kä tëë kɛ gua̱th puɔɔkä ti bathdɔɔri diɔ̱k.

⁶ Kä cuɛ took da̱ŋ wäl täth bä kɛ kui̱ la̱k, cuɛ dhieec la̱th kui̱c caam luaak kä cuɛ dhieec tin kɔ̱ŋ la̱th kui̱c cuëëc luaak. Kɛn tɔ̱tɔ̱ la muc in waŋkɛ a lakɛ thi̱n, kä ɛn dhaar la bööth palä rɔ̱ a lak thi̱n.

⁷ Kä cuɛ cuuŋni lɛmbärkä dääpä da̱ŋ wäl la̱t ce̱tnikɛ min ca lat, kä cuɛ kɛ la̱th rɛy luaak Kuɔth, te dhieec kui̱c cuëëc te dhieec tin kɔ̱ŋ kui̱c caam.

⁸ Kä cuɛ tharbëtni da̱ŋ wäl la̱t bä, kä cuɛ kɛ la̱th rɛy luaak Kuɔth. Te dhieec kui̱c cuëëc, te dhieec tin kɔ̱ŋ kui̱c caam. Kä cuɛ thääk dääpä ti kuɔ̱r täth.

⁹ Kä cuɛ kal la̱t kɛ kui̱ bööthni palä, kä cuɛ kal in di̱i̱t la̱t, kä cuɛ thiekni kal la̱t, kä cuɛ kɛ rɔth kɛ ciɛk in yian.

¹⁰ Kä cuɛ dhaar puɔɔkä la̱th buɔ̱lä kui̱c känyä ca̱ŋ cuëëc luaak Kuɔth.

¹¹ Kä cu Ɣu-ram cuɔ̱ɔ̱k kɛ kueenyni maac kɛ took täth bä. Inɔ cuɛ cu thuɔ̱k kɛ lät diaal ëë lätdɛ kä kuäär ni Thɔ-lo-mon rɛy luaak Kuɔth.

¹² Wääthni da̱ŋ rɛw kɛ took da̱ŋ rɛw tin te wi̱i̱ wääthni, kɛ wuɔ̱th da̱ŋ rɛw. Ti ca kɛt kɛ tak tin kuɔ̱mkɛ wuɔ̱th wääthni piny.

¹³ Kɛ dɛy nöör ti kur ŋuaan tin ca kɛ̈t takni da̱ŋ rɛw, kä ca kɛ car kɛ bëër rɛw ŋuääk kä kɛl, kɛ ɣöö bɛ took da̱ŋ rɛw tin kuɔ̱mkɛ wuɔ̱th wääthni piny kum.

¹⁴ Kä cuɛ cuuŋni la̱t bä kɛɛl kɛ took.

¹⁵ Kä cuɛ dhaar puɔɔkä kɛnɛ thääk da̱ŋ wäl rɛw täth pinydɛ.

¹⁶ Kɛ cuɔ̱ɔ̱k kɛnɛ took kɛ kueenyni maac, kɛ kuak diaal tëë ci bël ni Ɣu-ram-abi kɛ täth kuäär ni Thɔ-lo-mon rɛy luaak Kuɔth kɛ yiëëth in yian mi riaw.

¹⁷ Cu kuäär kɛn ti diaal ti̱ti̱ täth rɛy tɔ̱ɔ̱rä Jɔr-dɛn, kɛ mun ta̱th, kam Cu-koth kɛnɛ Dhɛ-re-daa.

¹⁸ Cu Thɔ-lo-mon ti̱ti̱ la̱t ɛ ŋuan a /ka̱n pek yieethä min yian ŋäc.

¹⁹ Kä cu Thɔ-lo-mon tin diaal tin te rɛy luaak Kuɔth täth. Yi̱k dääpä kɛnɛ tharbët, kɛ kui̱ jurayä nhiam Kuɔth,

²⁰ kɛ cuuŋni lɛmbärni kɛ lɛmbärnikiɛn ti ca la̱t kɛ da̱a̱p mi ko̱k ko̱k, ti bia̱ dɔp nhiam duëël in te rɛci.

²¹ Kɛ gaakni juaacni kɛnɛ lɛmbär kɛ kueenyni maac ti ca la̱t kɛ da̱a̱p mi ko̱k ko̱k.

²² Kɛ rithni kɛnɛ thääk kɛ took tin la̱thkɛ wal tin kuɔ̱r kuɔ̱ɔ̱r thi̱n, kɛ thääk maac ti ca la̱t kɛ da̱a̱p mi ko̱k ko̱k. Kɛ thi̱i̱k luaak Kuɔth, kɛ thiekni duëli rɛci a wä ni guäth in rɛl gɔɔydɛ rɔ cakɛ rɔth kɛ da̱a̱p.