2 Kuɛ̈n 3 - RUAC KUƆTH IN RƐL RƆ

¹ Ɛ jɛn cu Thɔ-lo-mon luak Kuɔth Nhial tok kɛ ta̱th kä Jɛ-ru-tha-lɛm Pääm Mɔ-ri-ya, gua̱a̱th ëë ci Kuoth Nhial rɔ nyuɔ̱th gua̱n ni Dee-bid thi̱n. Gua̱a̱th ëë ci Dee-bid ɛ mɛk gua̱th kɔ̱mä bɛɛl Ɔr-nan raan Yɛ-buth.

² Cuɛ ta̱thdɛ tok kɛ rɛw päthni kɛ ŋuaan runi ruecädɛ.

³ Kä cu ti̱ti̱ a theemni te täthɛ luak Kuɔth. Cu bärɛ piny a jua̱th tetni ti jiɛn bäkɛl, kä ɣäp ɣääpdɛ a jua̱th tetni ti jiɛn da̱ŋ rɛw.

⁴ Kä cu bäŋ luaak a jua̱th tetni ti jiɛn da̱ŋ rɛw bärɛ piny kɛnɛ ɣäp ɣääpdɛ, päärɛ kɛ ɣäp ɣääp luak. Kä cu bärɛ cuŋä a jua̱th te̱tni ti kuɔ̱r kɛl wi̱cdɛ jiɛn da̱ŋ rɛw. Kä cuɛ rɛydɛ rɔth kɛ da̱a̱p mi lɛy lɛy.

⁵ Kä cuɛ puɔ̱ny luaak kum kɛ jiɛn, kä cuɛ rɔth kɛ da̱a̱p mi lɛy lɛy kä cuɛ jɛ kɛt kɛ ti ce̱tkɛ dɛy nöör kɛnɛ kuatni.

⁶ Cuɛ luak biɛl kɛ pääm ti di̱t kökdiɛn, kɛ da̱a̱p mi nööŋkɛ nikä Par-wa-yim.

⁷ Kä cuɛ puɔ̱ny luaak, kɛ tut luaak, kɛ thiekni kɛ wääthni rɔth kɛ da̱a̱p. Kä cuɛ pua̱ny ti ce̱tkɛ pua̱ny jaakni lät kä puɔ̱ny luaak.

⁸ Kä cuɛ duel in rɛl gɔɔydɛ di̱tdɛ rɔ la̱t. Cu bärɛ kɛnɛ ɣääpdɛ a jua̱th tetni ti jiɛn da̱ŋ rɛw. Kä cuɛ jɛ rɔth kɛ da̱a̱p mi lɛy lɛy mi te ki̱luni ti kur bäkɛl.

⁹ Kä cuɛ thöt la̱t kɛ da̱a̱p mi tëë ki̱luni da̱ŋ wäl dhieec. Kä cuɛ wi̱c duëël rɔth kɛ da̱a̱p.

¹⁰ Kä cuɛ pua̱ny da̱ŋ rɛw ti ce̱tkɛ pua̱ny ja̱a̱kni la̱t kɛ jiath rɛy duëël in rɛl gɔɔydɛ rɔ, kä cuɛ kɛ rɔth kɛ da̱a̱p.

^11-13 Kä gɔ̱kiɛn kɛn da̱ŋ rɛw kɛ jua̱th tetni ti jiɛn da̱ŋ rɛw. Te gɔ̱a̱k kuec kɛl kɛ jua̱th tetni da̱ŋ dhieec, wä gɔ̱kiɛn yiëth ni puɔ̱ny duëël kui̱c ɛ mi kɛnɛ kui̱c in dɔ̱ŋ, kä ro̱m gɔ̱kiɛn däär. Kä kɛn cikɛ cuɔ̱ŋ luɔckɛ nhiamdiɛn rɛy luaak.

¹⁴ Kä cuɛ geel la̱t kɛ bi mi yiel kɛnɛ mi do̱l kɛ mi dɛ̈ɛ̈r, kä cuɛ kɛ kët pua̱ny ti ce̱tkɛ pua̱ny ja̱a̱kni.

Wääthni yieethä min yian da̱ŋ rɛw

¹⁵ Kä cuɛ wääthni da̱ŋ rɛw la̱t thok luaak raar, bäriɛn nhial ɛ jua̱th tetni ti jiɛn da̱ŋ diɔ̱k wi̱cdɛ dhieec, te mɔ kɛ wi̱c, mi te jua̱th tetni da̱ŋ dhieec.

¹⁶ Kä cuɛ ti ce̱tkɛ kuatni la̱t, kä cuɛ kɛ la̱th nhial wääthni. Kä cuɛ rɛydiɛn ruɔ̱p ti ce̱tkɛ dɛy nöör ti kuɔ̱r.

¹⁷ Kä cuɛ wääthni cuŋ raar thok luaak, te kɛl kui̱c cuëëc, te min dɔ̱ŋ kui̱c caam. Kä cuɛ min te kui̱c cuëëc cɔli Ya-kin, kä cuɛ min te kui̱c caam cɔli Bo-ɛ̈dh.