2 Kuɛ̈n 22 - RUAC KUƆTH IN RƐL RƆ

Ruëc Ä-ɣɛ̈dh-yaa

¹ Kä cu ji̱ Jɛ-ru-tha-lɛm gat Yɛ-ɣo-ram min tɔt jak ka kuäär kɛ gua̱a̱thdɛ. Kɛ ɣöö tëë kɛ ji̱ Ä-rab ti ci ben pɛɛc ca gaat Yɛ-ɣo-ram tin di̱t näk ni kɛn diaal. Inɔ cu Ä-ɣɛ̈dh-yaa gat Yɛ-ɣo-ram kuäär Juda ruëc.

² Kä mëë tookɛ kuäär tëë kɛ run ti jiɛn ŋuaan wi̱cdɛ rɛw, kä cuɛ ruëc kɛ ruɔ̱n kɛl kä Jɛ-ru-tha-lɛm. Kä cɔalkɛ man i̱ Ä-thɛ̈l-yaa, nya Ɔmri.

³ Kä cuɛ guɔ̱ɔ̱r ni duɔ̱p dhɔaar Ɛ̈-ɣab, kä cu man ɛ buath dui̱rä kɛ ɣöö ɛ jɛn la lueekdɛ mɔ.

⁴ Kä cuɛ la̱t ni jiäk nhiam Kuɔth Nhial ce̱tkɛ tëë ca la̱t ɛ dhɔr Ɛ̈-ɣab. Kɛ ɣöö kɛ kɔr liëth gua̱n, cu ka kɛn luëëkɛ tin cu jɛ jak kä pɛn.

⁵ Kä cuɛ liŋ ni luekdiɛn, kä cukɛ wä kɛɛl kɛnɛ Yo-ram gat Ɛ̈-ɣab kua̱r thuk duëli kuec caam kɛ ɣöö bikɛ wä nyiëëny kɛ Ɣä-dha-el kuäär A-thi-ri-ya kä Ra-moth-gil-yad. Kä cu ji̱ A-thi-ri-ya Yo-ram moc kɛ buɔ̱t.

⁶ Kä cuɛ wä kä Yidh-rɛɛl kɛ ɣöö bi buɔ̱tdɛ min ca ka̱m jɛ ɛ ji̱ A-thi-ri-ya kä Rama, mëë nyiëënyɛ kɛ Ɣä-dha-el kuäär A-thi-ri-ya wä gɔaa thi̱n. Kä cu Ä-ɣɛ̈dh-yaa gat Yɛ-ɣo-ram kuäär Juda wä, wëë Yo-ram gat Ɛ̈-ɣab gui̱l kɛ buɔ̱tdɛ kä Yidh-rɛɛl.

⁷ Kä cu Kuoth Pɛ̈ɛ̈n Ä-ɣɛ̈dh-yaa nööŋ kɛ gui̱lɛ kɛ Yo-ram. Kä mëë cɛ cop, cukɛ wä raar kɛnɛ Yo-ram wa Yeɣu gat Nim-ci lor, min ca kuany ɛ Kuoth Nhial kɛ ɣöö bɛ dhɔr Ɛ̈-ɣab däk.

⁸ Kä min wä Yeɣu dhɔr Ɛ̈-ɣab däk, cuɛ röm kɛ bööth Juda kɛ gaat däman Ä-ɣɛ̈dh-yaa, tin la jäl kɛ jɛ kɛɛl, cuɛ kɛ näk ni kɛn diaal.

⁹ Kä cua Ä-ɣɛ̈dh-yaa go̱r, kä cua jëk cɛ rɔ tɛ̱̈ɛ̱̈ kä Tha-mɛ-ria, kä cua jɛ nöŋ Yeɣu kä cuɛ jɛ näk. Kä cukɛ jɛ kony, kɛ ɣöö ɛ kɛn i̱, “Ɛ gatdöö Yɛ-ɣo-ca-pat, mëë ci Kuoth Nhial pal nikɛ lɔcdɛ kɛɛliw.” Kä cuɛ thil raan dhɔr Ä-ɣɛ̈dh-yaa mi dëë naath ruac ala kuäär.

Ma̱c Ä-thɛ̈l-yaa kɛ kuäär

¹⁰ Kä mëë ci Ä-thɛ̈l-yaa man Ä-ɣɛ̈dh-yaa gatdɛ nɛn cɛ li̱w, cuɛ ji̱ dho̱r kua̱ri Juda diaal däk.

¹¹ Duundɛ ɣöö cu Yɛ-ɣo-cab-at nya kua̱r gat Ä-ɣɛ̈dh-yaa ni Yo-ac kual rɛy gan kua̱r tin görkɛ näkdiɛn, kä cuɛ jɛ la̱th duëël nhial kɛnɛ ro̱o̱mdɛ. Kɛ ɣöö ɛn Yɛ-ɣo-cab-at ɛ nya kua̱r ni Yɛ-ɣo-ram kä ɛ ciek bo̱o̱th palä mi cɔal i̱ Yɛ-ɣo-ya-da, Ɛ nyiman Ä-ɣɛ̈dh-yaa. Cuɛ wä tɔ̱w kɛ Ä-thɛ̈l-yaa kɛ ɣöö /cɛ jɛ bi näk.

¹² Cuɛ te tɔ̱ɔ̱wä kɛɛl kɛ kɛ, kɛ run bäkɛl rɛy luaak Kuɔth Nhial, guäth ëë ruaac Ä-thɛ̈l-yaa wec.