2 Kuɛ̈n 2 - RUAC KUƆTH IN RƐL RƆ

Rial Thɔ-lo-mon kɛ rɔ ikä kɛ ta̱th luak Kuɔth

¹ Täämɛ cu Thɔ-lo-mon ɛ lat i̱ bɛ Kuoth Nhial ta̱th luak kɛnɛ duel kuäärä kɛ kui̱dɛ.

² Kä cuɛ nɛy ti bathdɔɔri ti jiɛn bärɔw jak kä dëëth päämni, kä cuɛ nɛy ti bathdɔɔri ti jiɛn bädäk la̱th ti̱eth päämni, kä cuɛ nɛy ti bathdɔɔri diɔ̱k wi̱cdɛ kur dhieec jak kä guɛckɛ kɛ lät.

³ Kä cuɛ kuäär Dhor ni Ɣu-ram jäk kä ruac i̱, “Ce̱tnikɛ mëë ci gua̱a̱r ni Dee-bid jäk kä jiɛn ŋuëri tëë lätdɛ rɔ kɛ duel kɛ kɛ, lätni i̱ nɔ bä kɛ ɣä.

⁴ Nɛnɛ ɣän ta̱thä Kuoth Nhial ni Kuothdä luak mi ba wa̱ŋ wal ti kuɔ̱r kuɔ̱ɔ̱r thi̱n. Kä ba thöp muc bɛɛl kɛnɛ muc tin waŋkɛ kɛ runwaŋ kɛnɛ thiaŋ, kɛ cäŋ lɔ̱ŋä kɛnɛ tëth path, kɛnɛ ni̱n ti̱mä Kuɔth Nhial min la Kuothda tin kɔ̱ŋ tin ca mɛk, tëë ca la̱r ji̱ I-thɛ-rɛl i̱ ba la̱t amäni cäŋ kɛl.

⁵ Kä ɛn luak in bä lätkä Kuoth bɛ di̱t, kɛ ɣöö Kuothda di̱t ni jɛn kä kuth diaal.

⁶ Kä ɛŋa dëë jɛ luäŋ kɛ täth luak ɔ, min cäŋɛ ni pua̱r nhial /cɛ jɛ dëë luäŋ kɛ kum? Kä ɛ ɣän ŋa mɔ dëë jɛ ta̱th luakɔ. Mi /ci dee a gua̱th mi waŋkɛ ni wal thi̱n nhiamdɛ mɔ?

⁷ Kä täämɛ jäk ni ɣä kä ram mi kuur, mi bi da̱a̱p kɛnɛ ciɛk in bo̱r kɛ ciɛk in yian kɛ ladiit ben täth, kä bɛ bi̱i̱ in yiel kɛnɛ min do̱l kɛ bi̱i̱ in dɛ̈ɛ̈r la̱t. Kä bɛ ben lät kɛɛl kɛnɛ nɛy tin kuɔ̱ɔ̱r tëë ci gua̱a̱r ni Dee-bid kɛ rialikä kä Juda kɛnɛ Jɛ-ru-tha-lɛm.

⁸ Kä jäk ni ɣä jiɛn luɔ̱ɔ̱ri kɛnɛ ŋuëri kä Lɛ-ba-nɔn, kɛ ɣöö nɛɛku ŋa̱ckɛ jiöp jiɛn. Kä bi nɛɛkä rɔ ma̱t nɛɛku.

⁹ Riali jiɛn ti ŋuan ikä kɛ kui̱dä, kɛ ɣöö luak in la̱tdä ba luak mi di̱i̱t mi gɔaa.

¹⁰ Kä bä nɛɛku tin jiɔapkɛ jiɛn ka̱m cuali bɛɛl ti bathdɔɔri ti jiɛn rɛw kɛ cuali nuɔ̱p ti bathdɔɔri ti jiɛn da̱ŋ rɛw, kɛ dha̱a̱ri kɔaŋ ti bathdɔɔri ti jiɛn da̱ŋ rɛw, kɛ ɣöök liɛth ti bathdɔɔri ti jiɛn da̱ŋ rɛw.”

¹¹ Kä cu Ɣu-ram min la kuäär Dhor Thɔ-lo-mon loc kɛ warɛgak i̱, “Kɛ ɣöö nhɔk Kuoth Nhial nɛɛkɛ, cɛ ji̱ jak kä kuääriɛn.”

¹² Kä cuɛ wee, “Ɛ puɔ̱th tekɛ Kuoth Nhial Kuoth I-thɛ-rɛl, mëë cak nhial kɛnɛ piny, kä moc kuäär ni Dee-bid kɛ gat, mi tekɛ ŋäc ŋɔaani kɛnɛ tiit, min bi Kuoth Nhial ta̱th luak, kɛnɛ duel kuäärä kɛ kui̱ puɔ̱nydɛ.

¹³ “Kä täämɛ ɣän ja̱kä ji̱ kä ram mi kuur mi tekɛ ŋäc ŋɔaani mi cɔali Ɣu-ram-abi,

¹⁴ ɛ gat nyal thuɔk duëël Daan, kä gua̱n ɛ raan Dhor. Jɛn ca ŋi̱eec kɛ ta̱th dääpä kɛnɛ ciɛk in bo̱r kɛ ciɛk in yian kɛ ladiit, kɛ guiy, kɛ ŋa̱t jiɛn kɛ ta̱k bieyni tin yiël kɛnɛ min do̱l kɛ dɛ̈ɛ̈r, ŋäcɛ la̱t kä tin guaŋkɛ, derɛ mi ca la̱r jɛ la̱t. A jɛ lät kɛɛl kɛnɛ nɛɛku, kɛ nɛy tëë lät kɛɛl kɛ guur ala kuäärä ni Dee-bid.

¹⁵ Kɛ kui̱c ɛmɔ bɛl, kɛ nup kɛnɛ liɛɛth kɛ kɔaŋ tëë ci la̱r ɣä, jäk nikɛ kä nɛy.

¹⁶ Kä bakɔ jiɛn tin go̱o̱ri jɔp kä Lɛ-ba-nɔn, kä bäkɛ naŋ kä Yapa kɛ rɛy yiëër kɛ thiɛɛk, kä bikɛ cu wä naŋ kä Jɛ-ru-tha-lɛm.”

Ta̱th Thɔ-lo-mon kɛ luak Kuɔth

¹⁷ Kä cu Thɔ-lo-mon jur diaal tin cieŋ muun I-thɛ-rɛl pekdiɛn kuɛn, ce̱tkɛ mëë ci gua̱n ni Dee-bid kɛ kɔŋ kuɛn. Kä cu ka nɛy ti bathdɔɔri ti kuɔ̱r wi̱cdɛ jiɛn dhieec wi̱cdɛ diɔ̱k, wi̱cdɛ kur bäkɛl.

¹⁸ Cuɛ nɛy ti bathdɔɔri ti jiɛn bärɔw jak kä dëëth päämni, kɛ nɛy ti bathdɔɔri ti jiɛn bädäk la̱th ti̱eth päämni, kä cuɛ bathdɔɔri diɔ̱k wi̱cdɛ kur bäkɛl jak kä guɛckɛ naath lät.