2 Kuɛ̈n 17 - RUAC KUƆTH IN RƐL RƆ

Ruëc Yɛ-ɣo-ca-pat

¹ Kä cu gatdɛ ni Yɛ-ɣo-ca-pat ruëc kɛ gua̱a̱thdɛ, kä cuɛ rɔ jak kä bum kɛ thuk duëli kuec caam.

² Kä cuɛ wi̱i̱ Juda diaal tin buɔ̱m buɔ̱ɔ̱m moc kɛ rɛm, cuɛ kɛ moc amäni wi̱i̱ tëë ci gua̱n ni Atha kɛ käp rɛy cieŋ Juda kɛnɛ wi̱i̱ Ɛ-pa-rim.

³ Kä cu kuoth Nhial te kɛɛl kɛ jɛ, kɛ ɣöö cɛ guɔ̱r ni duɔ̱p gua̱n ëë nhiam. Kä /kenɛ kuoth Baal pal,

⁴ Cuɛ pal ni Kuoth gua̱ni, kä cuɛ guɔ̱ɔ̱r ni dupkɛ kɛnɛ ŋuɔ̱tkɛ a /ci mɔ a duɔ̱ɔ̱p thuk duëli kuec caam.

⁵ Kɛ kui̱c ɛmɔ cu Kuoth Nhial kuäär la̱th tetädɛ, kä cua luɔ̱ny tho̱lbo̱k ɛ ji̱ Juda diaal. Kä cuɛ tekɛ ria̱ŋ mi di̱i̱t kɛnɛ luth.

⁶ Kä cuɛ lɔcdɛ ka̱m Kuoth Nhial, kä cuɛ gua̱th palä kuthni guäyni kɛ kuoth Ä-ce-rim da̱k piny kä Juda.

Gɔɔy Yɛ-ɣo-ca-pat

⁷ Kɛ diɔ̱ɔ̱k runi ruëc Yɛ-ɣo-ca-pat, cuɛ kua̱r kɔaarɛ ni Bɛn-ɣɛ̈-yil kɛnɛ O-bad-yaa kɛ Dhɛ-kar-yaa kɛnɛ Nɛ-tan-el kɛ Mi-ka-yaa Ja̱k, kɛ ɣöö bikɛ wä ŋi̱eec wi̱i̱ni Juda.

⁸ Kä cukɛ wä kɛɛl kɛ ji̱ Lii-bay ni, Cɛ-mɛ̈-yaa kɛnɛ Nɛ-thɛ̈n-yaa kɛ Dhɛ-bɛ̈d-yaa kɛnɛ Ä-tha-el kɛ Cɛ-mi-ra-moth kɛnɛ Yɛ-ɣo-na-than kɛ Ä-do-ni-yaa kɛnɛ To-bi-yaa kɛ Tob-ä-do-ni-yaa kɛ bööth palä ni, Ɛli-cama kɛnɛ Yɛ-ɣo-ram.

⁹ Cukɛ bok ŋuɔ̱tni Kuɔth Nhial naŋ, kä cukɛ jɛ wä ŋi̱eec ni nɛy diaal rɛy ciëëŋni Juda diaal.

¹⁰ Kä cu kua̱r diaal tin cieŋ wi̱i̱ni tin thieek kɛ Juda dual kɛ Kuoth Nhial, /ka̱n Yɛ-ɣo-ca-pat lɛ mak.

¹¹ Kä cu tha̱a̱ŋ ji̱ Pi-li-thɛt Yɛ-ɣo-ca-pat nöŋ muc, kä cua nöŋ ciɛk in bo̱r ala tho̱lbo̱k. Kä cu ji̱ Ä-rab jɛ nöŋ rueeth deet ti bathdɔɔri bärɔw wi̱cdɛ kur bärɔw, kɛ näc deet ti bathdɔɔri bärɔw wi̱cdɛ kur bärɔw.

¹² Kä cuɛ buɔ̱m ɛlɔ̱ŋ, kä cuɛ wi̱i̱ ti buɔ̱m buɔ̱ɔ̱m kɛ wi̱i̱ tɔ̱ɔ̱wä täth kä Juda.

¹³ Cuɛ tekɛ mi̱th ti ŋuan rɛy ciëëŋni Juda. Kä cuɛ nɛy ti buɔ̱m buɔ̱ɔ̱m ti ji̱ ko̱o̱r jak kä cieŋ kä Jɛ-ru-tha-lɛm.

¹⁴ Kä nɛmɛ ɛ pekdiɛn ce̱tnikɛ thuk duëli gua̱ni. Kä Juda, cu bo̱o̱th bathdɔɔr a Ad-naa kɛ nɛy ti bathdɔɔri ti kur diɔ̱k.

¹⁵ Kä cua guɔ̱r ɛ Yɛ-ɣo-ɣa-nan kɛ nɛy ti bathdɔɔri ti kur rɛw wi̱cdɛ jiɛn bädäk.

¹⁶ Kä cua guɔ̱ɔ̱r ɛ Ä-mɛ̈th-yaa gat Dhik-ri, min ci rɔ lar kɛ kui̱ la̱t Kuɔth Nhial kɛ nɛy ti bathdɔɔri ti kur rɛw.

¹⁷ Kä Ben-ya-min cua. Wut ko̱o̱r ni Ɛl-yada kɛnɛ nɛy ti bathdɔɔri ti kur rɛw ti tekɛ köötni kɛnɛ bääri.

¹⁸ Kä cua guɔ̱ɔ̱r ɛ Yɛ-ɣo-dha-bad kɛ nɛy ti bathdɔɔri ti kuɔ̱r kɛl wi̱cdɛ jiɛn bädäk.

¹⁹ Kɛn ti̱ti̱ cukɛ a kɛn nɛy te la̱tkɛ kuäär ikä, a /ci nɛy tin cɛ la̱th wi̱i̱ni tin buɔ̱m buɔ̱ɔ̱m rɛy cieŋ Juda te thi̱n.