2 Kuɛ̈n 16 - RUAC KUƆTH IN RƐL RƆ

Lo̱k Matdä kɛ kuäär Ä-ram

¹ Kɛ ruɔ̱n jiɛn diɔ̱k wi̱cdɛ bäkɛl ruëc Atha, cu Bɛ̈ca kuäär thuk duëli kuec caam Juda wä mak, kä cuɛ Rama täth kɛ ɣöö bɛ thil ram mi bi wä raar kiɛ wä rɛc kä kuäär Juda ni Atha.

² Kä cu Atha da̱a̱p kɛnɛ ciɛk in bo̱r ka̱n luaak Kuɔth Nhial kɛnɛ duel kua̱r, kä cuɛ kɛ jäk kä Bɛn-a-dad kuäär A-thi-ri-ya min cieŋ kä/ Da-math-kɛth wëë i̱,

³ “Ɛ mat te kamdan ce̱tkɛ mëë te kam guur kɛnɛ gua̱a̱r. Kä nɛnɛ ɣän ja̱kä ji̱ kä muc dääpä kɛnɛ ciɛk in bo̱r. Wër däk maarun yɛnɛ kuäär thuk duëli kuec caam ni Bɛ̈ca, dɔ̱ŋ bɛ ɣä päl.”

⁴ Kä cu Bɛn-a-dad ruac kua̱r ni Atha liŋ, kä cuɛ bööth rɛmnikɛ ja̱k waa wi̱i̱ thuk duëli kuec caam mak, kä cukɛ I-yon kɛnɛ Daan kɛ A-bel-ma-yim kɛ wi̱i̱ tɔ̱ɔ̱wä Nap-ta-li diaal käp.

⁵ Kä mëë ci Bɛ̈ca jɛ liŋ, cuɛ ta̱th Rama ka̱p cuɔ̱ŋ, kä cua la̱tdɛ cu päl.

⁶ Kä cu kuäär ni Atha ji̱ Juda diaal naŋ, cua pääm Rama kɛnɛ jiɛnkɛ tëë lät kɛ Bɛ̈ca ben de̱th, kä cuɛ kɛ wä lät ni Gabä kɛnɛ Midh-pa.

Gök ni Ɣä-na-ni

⁷ Ɛn guäth ɛmɔ cu gök ni Ɣä-na-ni ben kä kuäär Juda ni Atha, kä cuɛ jɛ jiök i̱, “Kɛ ɣöö ci ŋäth ni kuäär A-thi-ri-ya a keni ŋäth ni Kuoth Nhial Kuothdu, ɛ jɛn ci rɛm kua̱r A-thi-ri-ya rɔ bar kä ji̱ mɔ.

⁸ Kä a /ci ku te ni ji̱ Kuc kɛnɛ ji̱ Lib-ya kɛ rɛm mi di̱i̱t kɛ thurbiɛɛli kɛ jiöŋkööri ti ŋuan? Kä mëë ci ŋäth ni Kuoth Nhial, cuɛ kɛ la̱th tetkädu.

⁹ Kä Kuoth Nhial guicɛ wi̱c muɔ̱ɔ̱n kɛɛliw, kɛ ɣöö bɛ nɛy tin ci lo̱ckiɛn ka̱m jɛ moc kɛ buɔ̱m. Ci nɛmɛ la̱t ni dɔ̱ɔ̱rä. Kä niɛ täämɛ a wä nhiam bi tekɛ ko̱o̱ri.”

¹⁰ Cu Atha gaak kɛ gök kɛ kui̱ kä nɛmɛ. Kä cuɛ ciökɛ pua̱t kuatni kä cuɛ la̱th duëël yieenä. Kä niɛ guäth ɛmɔ cuɛ cu tok kɛ mi ciɛŋɛ tha̱a̱ŋ nath a jiäk.

Juey kɛnɛ lia̱a̱ Atha

¹¹ Kä cua duɔth lätni Atha ni tukädɛ amäni guutdɛ gɔ̱a̱r rɛy buɔk kua̱ri Juda kɛnɛ kua̱r thuk duëli kuec caam.

¹² Kɛ ruɔ̱n jiɛn diɔ̱k wi̱cdɛ bäŋuan ruecdɛ, cuɛ moc kɛ jiöör cio̱kädɛ. Kä cuɛ ŋot cɛ luny kä Kuoth Nhial. Cu wä ni jɛn kä ki̱mni.

¹³ Kä cuɛ li̱w kɛ ruɔ̱n jiɛn ŋuaan wi̱cdɛ kɛl kä run ruecädɛ.

¹⁴ Kä cua jɛ kony kɔ̱kädɛ mëë cɛ guaŋ därwec Dee-bid. Kä cua jɛ tɔa̱a̱c rɛy dhaŋä mi ca moc kɛ wal ti kɔap kɔap ti ca la̱t ce̱tkɛ liɛɛth yi̱rä. Kä cua jɛ wa̱ŋ wal ti kuɔ̱r kuɔ̱ɔ̱r kɛ kui̱ luthädɛ.