2 Kuɛ̈n 11 - RUAC KUƆTH IN RƐL RƆ

Ta̱th Rɛ-ɣɛ̈-bɔm kɛ wi̱i̱ ti buɔ̱m buɔ̱ɔ̱m

¹ Kä mëë ci Rɛ-ɣɛ̈-bɔm cop kä Jɛ-ru-tha-lɛm, cuɛ ji̱ Juda dol kɛnɛ thok duëël Ben-ya-min, wutni ko̱o̱r ti bathdɔɔri ti kuɔ̱r wi̱cdɛ jiɛn bädäk ti ca kuany, kɛ ɣöö bikɛ wä nyiëëny kɛ thuk duëli kuec caam, kɛ ɣöö ba kuäär luɔ̱c Rɛ-ɣɛ̈-bɔm.

² Duundɛ ɣöö cu ti̱et Kuɔth Nhial ben kä Cɛ-mɛ̈-yaa raan Kuɔth i̱,

³ “Jio̱k ni Rɛ-ɣɛ̈-bɔm gat Thɔ-lo-mon kuäär Juda, kɛnɛ thok duëël Juda kɛ thok duëël Ben-ya-min i̱,

⁴ ‘Nɛ mi ɛ min ca lar ɛ Kuoth Nhial ɛn ɣöö /cuarɛ wä nyiëëny kɛ ji̱ maarädun. Ɛ ram ɔ loc dhɔɔrɛ, kɛ ɣöö nɔmɔ bëë kä ɣä.’ ” Inɔ cukɛ ruac Kuɔth Nhial liŋ, /kenkɛ wä nyiëëny kɛ Ya-rɔ-baam.

⁵ Cu Rɛ-ɣɛ̈-bɔm cieŋ kä Jɛ-ru-tha-lɛm, kä cuɛ wi̱i̱ ti buɔ̱m buɔ̱ɔ̱m täth kä Juda.

⁶ Cuɛ Beth-lɛ-ɣɛm kɛnɛ E-tam kɛ Tɛ-kowä,

⁷ kɛ Beth-dhuur kɛnɛ Thoko kɛ Ä-du-lam,

⁸ kɛ Gɛ̈th kɛnɛ Ma-re-ca kɛ Dhip,

⁹ kɛ Ä-do-ra-yim kɛnɛ La-kic kɛ Ä-dhe-ka,

¹⁰ kɛ Dhɔra kɛnɛ A-ya-lon kɛ Ɣɛb-ron täth kä Juda kɛnɛ wi̱i̱ Ben-ya-min.

¹¹ Cuɛ kɛ täth a bum, kä cuɛ kɛ kue̱ny bööth, kä cuɛ wec ɔ ta̱th gua̱th tɔ̱wä mi̱thni, liɛɛth, kɛ kɔaŋ.

¹² Kä cuɛ wec ɔ moc kɛ kötni kɛnɛ mutni. Inɔ cuɛ Juda kɛnɛ Ben-ya-min käp a bum.

Ben Bööthni Palä kɛnɛ ji̱ Lii-bay kä Juda

¹³ Kä cu bööth palä kɛ ji̱ Lii-bay ben kä Juda wi̱i̱nikiɛn diaal tin cieŋkɛ thi̱n.

¹⁴ Kä cu ji̱ Lii-bay mundiɛn ba̱ny piny cukɛ ben kä Juda kɛnɛ Jɛ-ru-tha-lɛm, kɛ ɣöö cakɛ tuk lät palä Kuɔth ɛ Ya-rɔ-baam kɛnɛ gaatkɛ.

¹⁵ Kä cɛ rɔ kuëny bööth palä kuth guäyni kɛ kolaaŋ, kɛ thääk tin cɛ la̱t.

¹⁶ Kä cu nɛy diaal tin ca lo̱ckiɛn ka̱m Kuoth Nhial Kuoth I-thɛ-rɛl ben kɛɛl kɛ Ji̱ Lii-bay jiɛnkɛ kä thuk duëli kuec caam wäkɛ kä Jɛ-ru-tha-lɛm, kɛ ɣöö ba Kuoth Nhial Kuoth gua̱ni ben thöp muc.

¹⁷ Kä cukɛ kuäär jak kä bum kä Juda, kä cukɛ Rɛ-ɣɛ̈-bɔm gat Thɔ-lo-mon luäk kɛ run diɔ̱k ce̱tkɛ mëë lätkɛ kɛ Dee-bid kɛnɛ Thɔ-lo-mon.

Ji̱ Dhɔaar Rɛ-ɣɛ̈-bɔm

¹⁸ Cu Rɛ-ɣɛ̈-bɔm Maa-lath nya Yɛ-ri-moth gat Dee-bid kuɛn, kä man mɔ Ä-bi-ɣa-yil nya Ɛli-ab gat Jɛthi.

¹⁹ Kä cuɛ da̱p gaat, Yuc kɛnɛ Cɛ-mar-yaa kɛ Dhaam.

²⁰ Kä cuɛ Maakaa nya Ɛ̈b-ca-lom kuɛn, kä cuɛ jɛ da̱p Ä-bi-yaa kɛnɛ Ɛ̈-tay kɛ Dhi-dha kɛnɛ Cɛ-lo-mith.

²¹ Kä cuɛ nhɔk ni Maaka nya Ɛ̈b-ca-lom ɛlɔ̱ŋ kä mänkɛ diaal amäni luɔɔmkɛ (tëë kɛ män wäl bädäk kɛ luɔɔm ti jiɛn bäkɛl, tëë kɛ dhɔɔl ti jiɛn da̱ŋ rɛw wi̱cdɛ bädäk kɛ nyier da̱ŋ bäkɛl).

²² Kä cuɛ Ä-bi-yaa gat Maaka kuany ala kuäär kä gaatman, kɛ ɣöö go̱o̱rɛ ɣöö bɛ jak kä kuäär.

²³ Kä cuɛ lät pɛlä, cuɛ tha̱a̱ŋ gankɛ dääk kä rɛy ciëëŋni juda kɛnɛ Ben-ya-min diaal, wi̱i̱ tin buɔ̱m buɔ̱ɔ̱m diaal. Kä cuɛ kɛ ka̱m ti diaal, kä cuɛ kɛ moc män ti ŋuan.