2 Kuɛ̈n 10 - RUAC KUƆTH IN RƐL RƆ

Lo̱k Thuk Duëli caam kɛ Rɛ-ɣɛ̈-bɔm

¹ Kä cu Rɛ-ɣɛ̈-bɔm wä kä Cɛ-kɛm, kɛ ɣöö ci thuk duëli kuec caam ben thi̱n kɛ ɣöö ba wä jak kä kuäär.

² Kä mëë ca liŋ ɛ Ya-rɔ-baam gat Nɛ-bat (kɛ ɣöö ŋotdɛ kä I-jëp, guäth ëë cɛ rɔ bar thi̱n kɛ kuäär ni Thɔ-lo-mon), cuɛ luny jɔk kä I-jëp.

³ Kä cu kɛ Ya-rɔ-baam jäk kä raan, kä jɛn kɛnɛ thuk duëli kuec caam diaal, cu kɛ ben kä Rɛ-ɣɛ̈-bɔm, kä cua jɛ jiök i̱,

⁴ “Ci guur kɔ ciɛŋ ɛ bɛc ɛlɔ̱ŋ. Kɛ kui̱c ɛmɔ täämɛ ku ciaŋ guur ɛ bɛc bɛc ɛmɛ woc kä kɔ, ba̱kɔ ji̱ lät ikä.”

⁵ Kä cuɛ kɛ loc i̱, “Luɔ̱nyɛ kä ɣä kɛ kɔr ni̱ni da̱ŋ diɔ̱k.” Kä cu naath jiɛɛn.

⁶ Kä cu kuäär ni Rɛ-ɣɛ̈-bɔm ruac wä thiec kä nɛy tin di̱t tëë la luëëk gua̱n ni Thɔ-lo-mon, wëë i̱, “Ɛŋu mi dërɛ la̱rä mi dëë wä luɔ̱c nɛy ti̱ti̱?”

⁷ Kä cukɛ jɛ loc i̱, “Mi wi̱i̱ lät agɔaa kɛ kɛn nɛy ti̱ti̱ a wi̱i̱ lo̱ckiɛn jak kä tɛth, kä bikɛ la̱t ruac mi gɔaa, ba ji̱ lätikä amäni cäŋ kɛl.”

⁸ Duundɛ ɣöö cuɛ luek nɛɛni tin di̱t lo̱k, cuɛ wä nhɔk ni luek ŋuɛ̈tni tin pith kɛɛl kɛ jɛ kä ci cuɔ̱ŋ nhiamdɛ.

⁹ Kä cuɛ kɛ thiec i̱, “Ɛŋu mi dëë yɛn ɛ lar, mi dënɛ loc ni nɛy ti ca ɣä jiök ti i̱, ‘Woc ciaŋ ɛ bɛc bɛc ɛ ci guur ɛ ka̱m kɔ mi?’ ”

¹⁰ Kä cu ŋuɛ̈tni jɛ jiök i̱, “Nɛmɛ ɛ jɛn min bi la̱r kɛn nɛy tin ca ji̱ jiök i̱, ‘Ci guur kɔ moc lät ti bɛ̈c bɛ̈ɛ̈c, duundɛ ɣöö kuɛ lɛ woc kä kɔ.’ Jio̱k nikɛ i̱, ‘Yiatdä min tɔt dho̱k ni jɛn kä juäk gua̱a̱r.

¹¹ Kä täämɛ mi ci gua̱a̱r yɛ ka̱m lät ti bɛ̈c bɛ̈ɛ̈c, kä ɣän bäkɛ jak kä bɛc ɛlɔ̱ŋ. Ci gua̱a̱r yɛ duäc kɛ cuëëc ɣɔ̱ɔ̱k, kä ɣän bä yɛ duäc kɛ waat loorä.’ ”

¹² Inɔ cu Ya-rɔ-baam kɛnɛ nɛy diaal ben kä kuäär ni Rɛ-ɣɛ̈-bɔm, kɛ diɔ̱ɔ̱k ni̱ni ce̱tkɛ mëë cɛ lar i̱, “Luɔ̱nyɛ kä ɣä kɛ diɔ̱ɔ̱k ni̱ni.”

¹³ Kä cu Kuäär ɛ loc a jiäk, cuɛ luek di̱tni min ca la̱r jɛ lo̱k,

¹⁴ cuɛ ruac kɛ kɛ ce̱tkɛ ruac ŋuɛ̈tni wëë i̱, “Ci gua̱a̱r yɛ ciɛŋ ɛ bɛc, duundɛ ɣöö bä rep ni bɛ̈cdɛ. Kä gua̱a̱r cɛ yɛ duäc kɛ cuëëc ɣɔ̱ɔ̱k, kä ɣän bä yɛ duäc kɛ waat loorä.”

¹⁵ Inɔ /ken kuäär ruac nath liŋ. Kɛ ɣöö bi ruac Kuɔth Nhial ni Kuoth, mëë lätdɛ Ya-rɔ-baam gat Nɛ-bat kɛ thok go̱kä ni Ä-ɣi-yaa raan Cilo a thuɔ̱k.

¹⁶ Kä mëë ci thuk duëli kuec caam ɛ nɛn ɛn ɣöö /ken kuäär kɛ liŋ, cukɛ jɛ loc i̱, “Ɛ kui̱cith la duŋda mɔ kä Dee-bid? Thilɛ nɛy kui̱c kä gat Jɛthi. Ɛ ramɔ wä kɛmɛkädɛ lö thuk duëli kuec caam! Kä täämɛ ku guic ni Dhɔru kä rɔa lö Dee-bid.” Inɔ cu thuk duëli kuec caam diaal wä dho̱rikiɛn.

¹⁷ Kä cu Rɛ-ɣɛ̈-bɔm thuk duëli kuec cuëëc tin cieŋ kä Juda ruac.

¹⁸ Kä cu kuäär ni Rɛ-ɣɛ̈-bɔm Ä-do-ram kuäär lätni ja̱k duundɛ ɣöö cu thuk duëli kuec caam, jɛ bök kɛ dööl amäni mëë cɛ li̱w. Kä cu kuäär ni Rɛ-ɣɛ̈-bɔm pɛ̈th kɛ köt thurbiɛɛlɛ, kä cuɛ rɔ bar wëë kä Jɛ-ru-tha-lɛm.

¹⁹ Inɔ cu thuk duëli kuec caam a ji̱ tɛ̈r kɛ thok duëël Dee-bid amäni walɛ.