2 Kuɛ̈n 1 - RUAC KUƆTH IN RƐL RƆ

Thiec Thɔ-lo-mon kɛ Pɛl

¹ Kä cu gat Dee-bid ni Thɔ-lo-mon rɔ pa̱l piny rɛy kuäärädɛ, kɛ ɣöö te Kuoth Nhial min la Kuothdɛ kɛɛl kɛ jɛ, kä cuɛ jɛ jak kä bum.

² Kä cu Thɔ-lo-mon ruac kɛ ji̱ I-thɛ-rɛl diaal, kɛnɛ bööth bathdɔɔri kɛnɛ kur, kɛ ruëëc kɛnɛ bööth thuk duëli I-thɛ-rɛl diaal.

³ Kä cuɛ wä kɛɛl kɛnɛ duɔl kɛɛliw guäth palä min te kä Gib-yon, kɛ ɣöö te kɛmɛ Kuɔth Nhial mëë lät ja̱ŋ Kuɔth Nhial ni Muthɛ jɛ däärdɔaar ɛn wi̱ni.

⁴ (Kɛ ɣöö ci Dee-bid thanduk matdä ruac Kuɔth nööŋ kä Kir-yath-ya-rim, kä cɛ jɛ la̱th guäthdɛ rɛy kɛmɛkä mëë cɛ la̱t kä Jɛ-ru-tha-lɛm.)

⁵ Kä te yi̱k cikä min yian mëë la̱tkɛ ɛ Be-dha-lel gat Uri gat Ɣur ɛn wi̱ni nhiam kɛmɛkä Kuɔth Nhial. Cu Thɔ-lo-mon kɛnɛ duɔl kɛɛliw Kuoth Nhial pal thi̱n.

⁶ Kä cuɛ muc thääkni ti bathdɔɔri ti waŋkɛ thöp wi̱i̱ yi̱kä cikä min yian, min te nhiam kɛmɛkä Kuɔth Nhial.

⁷ Kɛ jɛn wäär ɛmɔ cu Kuoth rɔ nyuɔ̱th Thɔ-lo-mon, kä cuɛ jɛ jiök i̱ “Thiec mɔ dëë ka̱m ji̱ mɔ.”

⁸ Kä cu Thɔ-lo-mon Kuoth loc i̱, “Ci gua̱a̱r ni Dee-bid nyuɔ̱th nhökdu min di̱i̱t in thil pek, kä ci ɣä jak kä kuäär kɛ gua̱thdɛ.

⁹ Ku ruacdu jak kä thuɔ̱k mëë ci la̱r gua̱a̱r. Kä ci ɣä jak kä kuäär nɛɛni ti ŋuan ti /ca dëë luäŋ kɛ kuën.

¹⁰ Kɛ kui̱c ɛmɔ, mocä kɛ ŋäc mi dëë ruac kɛn nɛy ti̱ti̱, kɛ ɣöö dëë nɛɛku ti ŋuan ti̱ti̱ kulɛ ruac.”

¹¹ Kä cu Kuoth Thɔ-lo-mon loc i̱, “Kɛ ɣöö te nɛmɛ lɔcdu, ɛ jɛn /keni thiëc ni rɔ gua̱a̱th ɔ kɛnɛ ria̱ŋ kɛ luth, kɛnɛ tëk ji̱ tɛ̈ru kɛ tëk mi bäärɔ. Kä ci thiëc ni rɔ ŋäc ŋɔaani mi bi ruac nɛɛkä tin ca ji̱ jak kä kuääriɛn,

¹² ca ji̱ ka̱m ŋäc ŋɔaani. Kä ɣän bä ji̱ moc ria̱ŋ kɛ luth mi thil kä kua̱r tëë nhiam kɛnɛ kua̱r tɔ̱ bi lɔ̱ ben jɔkdu tɔ̱ mi bi ce̱tkɛ ji̱.”

¹³ Kä cu Thɔ-lo-mon jiɛn kä Gib-yon, nhiam kɛmɛkä Kuɔth Nhial, cuɛ ben kä Jɛ-ru-tha-lɛm. Kä cuɛ I-thɛ-rɛl ruac.

Buɔ̱m Thɔ-lo-mon kɛnɛ Ria̱ŋdɛ

¹⁴ Kä cu Thɔ-lo-mon thurbiɛɛli kɛnɛ jiöŋkööri mat guäth kɛl. Cuɛ tekɛ thurbiɛɛli ti bathdɔɔr kɛl wi̱cdɛ kur ŋuaan, kɛ ji̱ jiöŋkööri ti bathdɔɔri wäl rɛw, ti cɛ la̱th wi̱i̱ni thurbiɛɛli, kɛnɛ wec kua̱r kä Jɛ-ru-tha-lɛm.

¹⁵ Kä cu kuäär ciɛk in bo̱r kɛnɛ da̱a̱p jak kä ŋuan kä Jɛ-ru-tha-lɛm ce̱tnikɛ guiy, kä cuɛ jiɛn ŋuëri jak kä ŋuan ce̱tkɛ jiɛn täpä.

¹⁶ Kä la Thɔ-lo-mon jio̱k ko̱o̱ri a no̱o̱ŋɛ kä I-jëp kɛnɛ Kɛwee, la köök kua̱r kɛ a wä kɔk kä Kɛwee.

¹⁷ Kä la kɛn thurbil a kɔk kä I-jëp kɛ yio̱w ti kur bäkɛl, kä kɔakɛ jiök tuɔ̱ruɔ̱k kɛ yio̱w ti kuɔ̱r kɛl wi̱cdɛ jiɛn dhieec. Kä la kɛn kɛ a wä kök kua̱r ji̱ Ɣɛ̈th kɛnɛ kua̱r ji̱ A-thi-ri-ya.