2 Kua̱r 7 - RUAC KUƆTH IN RƐL RƆ

¹ Duundɛ ɣöö cu Ɛ-li-cä wee, “Ruac Kuɔth Nhial ɛn. Ci Kuoth Nhial wee i̱ run kɛ gua̱th mi ce̱tkɛ nɛ ba tuɔ̱k mi̱eth mi gɔaa kɛnɛ took da̱ŋ rɛw kä bɛl kɔk kɛ rial kɛl kä Tha-mɛ-ria.”

² Kä cu raan kɔar kua̱r in ci kuäär tetkɛ cak kɛ jɛ raan Kuɔth jiök i̱, “A cäŋ bi Kuoth Nhial puɔ̱nydɛ wernyini la̱t puɔ̱rä, bɛ tuɔ̱k ɛn nɔmɔ?” Kä cu Ɛ-li-cä wee, “Biɛ nɛn kɛ nyinku, duundɛ ɣöö /ci bi mi̱th thi̱n.”

Jiɛn rɛ̈m Thi-ri-ya

³ Kä täämɛ tëë kɛ wutni da̱ŋ ŋuaan ti tekɛ dhɔp tekɛ thok rɛ̈ɛ̈k. Kä cu ram ɔ ruac kɛ ram ɔ i̱, “Ɛŋu nyuurkɔn ɔ ɛn wa̱nɛ mäni mi canɛ li̱w?

⁴ Kä mi wä kɔn wee, ‘Wanɛ wi̱c, te buɔth thi̱n,’ banɛ li̱w ɛn wi̱ni. Kä mi banɛ nyuur ɛn wa̱nɛ banɛ li̱w bä. Täämɛ bia wanɛ wi̱c ji̱ Thi-ri-ya. Mi wa kɔn päl banɛ tëk, kä mi wa kɔn näk banɛ cu li̱w.”

⁵ Mi̱rä cukɛ wä wi̱c ji̱ Thi-ri-ya. Kä min cikɛ cop peek wec, nɛnɛ, thilɛ ram mi te thi̱n.

⁶ Kɛ ɣöö ci Kuoth Nhial rɛm Thi-ri-ya jak kä liɛŋkɛ jɔw jio̱o̱kni, kɛnɛ thurbiɛɛli, kɛ rɛm mi di̱i̱t. Kä cu ramɔ ruac kɛ ramɔ i̱, “Nɛ̈nɛ jɛ kuäär I-thɛ-rɛl cɛ kɔn kök kua̱r ɣɛ̈th kɛnɛ kua̱r I-jëp kɛ ɣöö bikɛ ben nyiëëny kɛ kɔn.”

⁷ Kä cukɛ rɔ bar mi̱rä ba̱nykɛ kɛmɛnikiɛn piny, kɛ jio̱o̱kiɛn, kɛnɛ muɔ̱li cukɛ wec ba̱ny piny ce̱tnikɛ ta̱a̱dɛ, cukɛ leny ni tëkdiɛn.

⁸ Kä min ci ji̱ dhɔpni ben peek wec, cukɛ coth rɛy Kɛmɛkä, cukɛ mi̱th kä cukɛ math kä cukɛ da̱a̱p, kɛnɛ ciɛk in bo̱r, kɛ bieyni ka̱n kä cukɛ kɛ wä tɔ̱w. Kä cukɛ luny jɔk, cukɛ coth Kɛmɛkä mi dɔ̱ŋ, kä cukɛ ŋɔak naŋ thi̱n bä, kä cukɛ kɛ wä tɔ̱w.

⁹ Kä cu ramɔ ruac kɛ ramɔ i̱, “/Canɛ lät ni cuɔ̱ŋ. Ɛn cäŋ ɛmɛ ɛ cäŋ thukni ti gɔw. Mi wä kɔn wä liep amäni runwaŋ, bi riɛk ben kä kɔn. Ɛn täämɛ wanɛ banɛ jɛ wä la̱r ji̱ dhɔaar kua̱r.”

¹⁰ Kä cukɛ ben cua yieen thiek wec cɔl, kä cukɛ jɛ jiök i̱, “Bä nɛy wi̱c ji̱ Thi-ri-ya, kä nɛnɛ, thilɛ ram mi nɛ̈nkɛ kiɛ liɛŋkɛ ɛn wi̱ni, te ni jio̱o̱k yieenä kɛnɛ muɔ̱li, kä Kɛmɛni ɛ jɛn ta̱a̱diɛn.”

¹¹ Kä cu yieen thiek ɛ lat kä cua la̱r ji̱ dhɔaar kua̱r.

¹² Kä cu kuäär rɔ jiɛc kɛ wäär, kä cuɛ ji̱ kɔarɛ jiök i̱, “Ɣän bä yɛ la̱t min cäp ji̱ Thi-ri-ya jɛ kɔn. Ŋäc kɛnɛ ɛn ɣöö näk buɔth kɔn. Kɛ kui̱c ɛmɔ cikɛ jiɛn wi̱c, ca rɔ̱ wä tɛ̱̈ɛ̱̈ rɛy dɔaar caar kɛn ɛ i̱, ‘Mi wäkɛ ben raar wi̱c banɛ kɛ cu käp a tëk banɛ cu wä wi̱c.’ ”

¹³ Kä cu raan kɔarɛ kɛl wee, “Ɛ tha̱a̱ŋ nath ka̱nkɛ jio̱o̱k da̱ŋ dhieec tin ci duɔth wi̱c. Kɛn duɔth nɛɛni ti ci duɔth ti ce̱tkɛ nikɛ ji̱ I-thɛ-rɛl diaal tëë ci li̱w. Ja̱knɛ naath ba wä guic.”

¹⁴ Kä cukɛ wutni da̱ŋ rɛw kuany, kä cu kuäär kɛ jäk kä kɔɔr rɛm ji̱ Thi-ri-ya wee i̱, “Wiaa guɛcɛ jɛ.”

¹⁵ Kä cukɛ wä kɔɔriɛn nikä Jɔr-dɛn. Kä nɛnɛ duɔ̱ɔ̱p kɛɛliw cukɛ jɛ jek a cɛ thia̱a̱ŋ kɛ bieyni kɛnɛ kuak tin ca yäk ɛ ji̱ Thi-ri-ya min pɛ̈th kɛ. Kä cukɛ luny jɔk cua ben la̱r kuäär.

¹⁶ Kä cu naath wä raar, cua wec ji̱ Thi-ri-ya wä pɛc. Kä cua tuɔ̱k mi̱eth in gɔaa kɔak kɛ rial kɛl kɛnɛ took bɛɛl da̱ŋ rɛw, ce̱tnikɛ ruac Kuɔth Nhial.

¹⁷ Kä täämɛ cu kuäär raan kɔarɛ mëë cɛ tetkɛ cak kɛ jɛ kuany ala yieen thuɔk rɛ̈ɛ̈k. Kä cua dɔany ɛ naath thok rɛ̈ɛ̈k, kä cuɛ li̱w, ce̱tnikɛ mëë ca lar ɛ raan Kuɔth mëë ci kuäär ben kä jɛ.

¹⁸ Cuɛ tuɔ̱k ce̱tnikɛ mëë ci raan Kuɔth kuäär jiök i̱, “Kɛ gua̱th mi ce̱tkɛ nɛ iruun, ba tuɔ̱k mi̱eth mi gɔaa kɛnɛ took bɛɛl da̱ŋ rɛw kɔk kɛ rial kɛl thok rɛ̈ɛ̈k kä Tha-mɛ-ria.”

¹⁹ Kä cu raan kɔar kua̱r ɛ loc i̱, “Cäŋ ɛ jɛn Kuoth Nhial puɔ̱nydɛ ci wernyini la̱t ɔ puɔ̱rä, nɛmɛ derɛ tuɔ̱k?” Kä cuɛ wee “Biɛ nɛn nikɛ nyinku, duundɛ ɣöö /ci bi mi̱th thi̱n.”

²⁰ Inɔ cɛ tuɔɔk kä jɛ, kɛ ɣöö ca dɔany ɛ naath thok rɛ̈ɛ̈k wec, kä cuɛ li̱w.