2 Kua̱r 6 - RUAC KUƆTH IN RƐL RƆ

Thɔar jio̱p

¹ Kä täämɛ cu gaat göökni Ɛ-li-cä jiök i̱, “Nɛnɛ gua̱a̱th ɛ cieŋ nɛy thi̱n ɛ cɛ kuɛ̈ɛ̈ ɛlɔ̱ŋ kɛ nɛy.

² Jak ni nɛy kä wä kä Jɔr-dɛn ba̱kɔ wä jɔp kɛ jiɛn, kä bakɔ kɔn wä lät kä gua̱th mi banɛ cieŋ thi̱n ɛn wi̱ni.” Kä cuɛ loc i̱, “Wiaa.”

³ Kä cu ram kɛl kä kɛ wee, “Bër kɛɛl kɛ ja̱a̱ŋku.” Kä cuɛ loc i̱, “Bä wä.”

⁴ Kä cuɛ wä kɛɛl kɛ kɛ. Kä min cikɛ cop kä Jɔr-dɛn cukɛ jɔp kɛ jiɛn.

⁵ Kä min ɛ ram kɛl i̱ jɔpɛ jiath cu jio̱pdɛ do̱th yieer. Kä cuɛ wiee i̱, “Aɣ kuäärä! Ɛ jio̱p mi liɛmä ni jɛ.”

⁶ Kä cu raan Kuɔth wee, “Kä cɛ pɛn ni kä?” Kä min cɛ nyuɔ̱th gua̱th. Cuɛ kɛɛt ŋok, kä cuɛ jɛ yuɔr yieer, kä cu jio̱p thɔar.

⁷ Kä cuɛ wee, “Käni jɛ.” Kä cuɛ jɛ ka̱n.

Ɛ-li-cä kɛnɛ ji̱ Thi-ri-ya

⁸ Täämɛ kuäär Thi-ri-ya tëë ko̱o̱r kɛ I-thɛ-rɛl, cuɛ ruac kɛ ji̱ kɔarɛ wee i̱, “Ɣän bä wecdä pua̱t wa̱nɛ mi kä bɛ cua̱ wecdä.”

⁹ Duundɛ ɣöö cu raan Kuɔth ruac jäk kä kuäär I-thɛ-rɛl wee i̱, “Tit rɔ cu gua̱a̱th ɛmɔ bäl, kɛ ɣöö kuäär Thi-ri-ya wee ɛn wi̱ni.”

¹⁰ Kä cu kuäär I-thɛ-rɛl naath jäk kä guäth in ca la̱r jɛ ɛ raan Kuɔth. Kä la Ɛ-li-cä a ruac kɛ kuäär, kä la gua̱a̱th ɛmɔ a gaŋkɛ gua̱thni diaal.

¹¹ Kä cu wi̱c kua̱r Thi-ri-ya nyuɔn ɛlɔ̱ŋ kɛ kui̱ kä nɔmɔ. Kä cuɛ ji̱ kɔarɛ cɔl kä cuɛ kɛ jiök i̱, “Dëë yɛn ɣä nyuɔ̱th ram ɔ la raan kua̱r I-thɛ-rɛl ɔ?”

¹² Kä cu raan kɔarɛ kɛl wee, “Thilɛ raan kä nɛy kuäärä. Duundɛ ɣöö ɛ Ɛ-li-cä gök in te kä I-thɛ-rɛl, ɛ jɛn lär kuäär I-thɛ-rɛl ruac ëë latdi ni wi̱i̱ dhaŋä duëëlu mɔ.”

¹³ Kä cuɛ wee, “Wër guicɛ jɛn a nikä, bä naath ben ja̱k ba wä käp.” Kä cua luɔ̱c jɛ i̱, “Jɛn a kä Do-than.”

¹⁴ Cuɛ jio̱o̱k kɛnɛ thurbiɛɛli kɛ rɛm mi di̱i̱t jäk kä ɛn wi̱ni. Cukɛ ben kɛ wäär cua wec ben go̱l.

¹⁵ Kä min ci läät ran Kuɔth keer kɛ runwaŋ cuɛ ben raar, kä nɛnɛ rɛm mi tekɛ jio̱o̱k kɛnɛ thurbiɛɛli ti ca wec go̱l. Kä cuɛ wee, “Aɣ kuäärä ɛŋu mi banɛ la̱t?”

¹⁶ Kä cu Ɛ-li-cä wee, “/Cu dual kɛ ɣöö nɛy ti te kɛɛl kɛ kɔn ti ŋuan ni kɛn kä nɛy tin te kɛɛl kɛ kɛ.”

¹⁷ Kä cuɛ pal wee i̱, “Aɣ Kuoth Nhial, la̱ŋä ni ji̱, lɛp wäŋkɛ kɛ ɣöö bɛ nën.” Kä cu Kuoth Nhial wäŋ ŋuɛtdä lɛp, kä cuɛ guic. Kä nɛnɛ wuɔ̱th pääm cikɛ thia̱a̱ŋ kɛ jio̱o̱k kɛnɛ thurbiɛɛli maac ca Ɛ-li-cä go̱l.

¹⁸ Kä min ci ji̱ Thi-ri-ya ben nyieenykɛ kɛ jɛ. Cu Ɛ-li-cä Kuoth Nhial pal wee i̱, “Jak ni nɛy ti̱ti̱ kä cɔr la̱ŋä ni ji̱.” Kä cuɛ kɛ jak kä cɔr ce̱tnikɛ pal Ɛ-li-cä.

¹⁹ Kä cu Ɛ-li-cä kɛ jiök i̱, “Nɛ mi /ciɛ jɛn duɔ̱ɔ̱p, kä nɛmɛ /ciɛ jɛn wec. Guɔ̱ɔ̱rɛ ɣä, bä yɛ nöŋ ram in go̱o̱r yɛnɛ.” Kä cuɛ kɛ naŋ kä Tha-mɛ-ria.

²⁰ Kä niɛ min cikɛ coth kä Tha-mɛ-ria cu Ɛ-li-cä pal i̱, “Aɣ, Kuoth Nhial lɛp wäŋ nɛɛni ti̱ti̱, akɛ guic.” Kä cu Kuoth Nhial wäŋkiɛn lɛp, kä cukɛ guic. Min cikɛ guic, cua rɔ jek däär Tha-mɛ-ria.

²¹ Kä cu kuäär I-thɛ-rɛl Ɛ-li-cä jiök i̱, “Gua̱di̱n ɣän bäkɛ näk?”

²² Kä cuɛ loc i̱, “/Cukɛ näk. Ɛ deri nɛy ti ci pɛc mut ku näk? Mockɛ mi̱eth kɛnɛ pi̱ bikɛ loc kä kuääriɛn.”

²³ Kä cuɛ kɛ lät kä mi̱eth mi di̱i̱t. Kä min cikɛ mi̱th kä cikɛ maath. Cuɛ kɛ jak kä wä, kä cukɛ wä kä kuääriɛn. Kä /ken ji̱ Thi-ri-ya rɔ nyɔk kɛ pëc mun I-thɛ-rɛl.

Ɛ-li-cä kɛnɛ go̱l Tha-mɛ-ria

²⁴ Kɛ kɔr kä mɔmɔ cu Bɛn-a-dad kuäär Thi-ri-ya rɛmdɛ mat kɛɛliw cuɛ Tha-mɛ-ria wä go̱l.

²⁵ Kä te buɔth mi di̱i̱t kä Tha-mɛ-ria mëë go̱l kɛn ɛ, amäni mëë cuɛ ŋɔa̱a̱ŋ cua wi̱c muɔl kɔak nikɛ yio̱w ti jiɛn bädäk, kä kɔakɛ ŋuaan ŋuaani kä juät guukä kɛ yio̱w dhieec.

²⁶ Kä min jäl kuäär I-thɛ-rɛl kɛ wi̱c pa̱ny wec, cu ciek ɛ jiök i̱, “Luäk ɣä lö kuäärä ni kuäär!”

²⁷ Kä cuɛ wee, “Mi /ci Kuoth Nhial ji̱ luäk, dëë ji̱ ku lɛ luäk kɛ ŋu? Wa̱a̱kä ji̱ kɛ bɛl kiɛ ɛ kɔaŋ?”

²⁸ Kä cu kuäär jɛ thiec i̱, “Riɛkdu ɛŋu?” Kä cuɛ loc i̱, “Ci ciek ɛ mi ɣä jiök i̱, ‘Ŋun gatdu, banɛ cam ɛn walɛ, banɛ gatdä lɛ cam iruun.’

²⁹ Inɔ cua̱kɔ gatdä thal, kä cua̱kɔ cam. Kɛ bakdɛ cua̱ jɛ la̱r jɛ, ‘Ŋun gatdu banɛ cam.’ Duundɛ ɣöö cɛ gatdɛ tɛ̱̈ɛ̱̈.”

³⁰ Kä min ci kuäär ruac ciëk liŋ cuɛ bi̱i̱dɛ rɛt (kä jɛn wee kɛ wi̱c pa̱ny. Kä cu naath liɛc, kä cua nɛn ciɛŋɛ bi̱i̱ cuaalä kɛ piny bieynikɛ).

³¹ Kä cuɛ wee, “Dëë Kuoth ɣä näk mi dëë wi̱c Ɛ-li-cä gat Ca-pat ŋot wi̱i̱dɛ ɛn walɛ.”

³² Ɛ-li-cä te nyuurä dhɔrɛ kɛnɛ di̱t. Kä cu kuäär raan ja̱k, kä a /kenɛ ni cop cu Ɛ-li-cä di̱t jiök i̱, “/Ken yɛnɛ nɛn, nääk nath ɛ mi cɛ ram mi bi ɣä ben näk ja̱k? Kä nɛ̈nɛ jɛ mi wä jääk wä ben ga̱kɛ thi̱i̱k, kä rɔamɛ jɛ gääkä. Kä /ciɛ jɔw ciökni kua̱rɛ te kɔɔrɛ mɔ?”

³³ Kä min ŋotdɛ kɛ ruac kɛ kɛ, cu jaak ben kä jɛ kä cu Kuäär wee, “Kɛn rik ti̱ti̱ bäkɛ kä Kuoth Nhial! Kuɛ la ŋu bä lɛ lip Kuoth Nhial ɔ?”