2 Kua̱r 5 - RUAC KUƆTH IN RƐL RƆ

Gɔɔy dhɔpä kä Naa-man

¹ Bo̱o̱th rɛ̈m kua̱r Thi-ri-ya ni Naa-man, ɛ wut mi gɔaa kä kuäärɛ kä luɔ̱th kɛ jɛ, kɛ ɣöö ci Kuoth Nhial juc ka̱m Thi-ri-ya kɛ jɛ. Jɛn ɛ wut ko̱o̱r mi bum, duundɛ ɣöö tëë kɛ dhɔp.

² Kä cuɛ lɛ tekɛ ji̱ Thi-ri-ya ti ci wä pɛɛc, cua nya mi tɔt mi läät wä pɛc muun I-thɛ-rɛl. Kä cuɛ ben lät kɛ ciek Naa-man.

³ Kä cuɛ kuäärɛ jiök i̱, “Mi wi̱i̱ gök in te kä Tha-mɛ-ria gui̱l! Derɛ ji̱ jak kä gɔaa kɛ dhɔp.”

⁴ Kä cu Naa-man kuäärɛ wä jiök i̱, “Ci nya la̱t in bä muun I-thɛ-rɛl nɛ mi lat.”

⁵ Kä cu kuäär wee, “Wër ɛn täämɛ, bä kuäär I-thɛ-rɛl gɔ̱a̱r warɛgak.” Kä cuɛ wä naŋɛ yio̱w ti bathdɔɔri ti jiɛn diɔ̱k, kɛnɛ da̱a̱pni ti bathdɔɔri bäkɛl, kɛ gɛ̈rɛni bieyni da̱ŋ wäl.

⁶ Kä cuɛ kuäär I-thɛ-rɛl nöŋ warɛgak min ca gɔ̱r i̱, “Mi wä warɛgak ɛ mi ji̱ wä cop biɛ ŋa̱c ɛn ɣöö cä ji̱ jäk kä raan kɔarä ni Naa-man kɛ ɣöö bi dhɔpdɛ jak kä gɔaa.”

⁷ Kä min ci kuäär I-thɛ-rɛl warɛgak kuɛn, cuɛ bi̱i̱dɛ rɛt kä cuɛ wee, “Ɛ ɣän Kuoth mi dëë raan näk kä dëë raan tek, mɔ jäk ramɛ mi ɣä raan ɔ dëë dhɔpdɛ ben jak kä gɔaa? Jɛn go̱rɛ ni gak kä rɔa.”

⁸ Kä min ci Ɛ-li-cä min la raan Kuɔth ɛ liŋ i̱ ci kuäär I-thɛ-rɛl bieynikɛ rɛ̈t, cuɛ jäk kä raan wee i̱, “Ɛŋu rɛtdi bieyniku mɔ? Jak ni jɛ kä bëë kä ɣä, kɛ ɣöö bɛ ŋa̱c i̱ tëë kɛ gök kä I-thɛ-rɛl.”

⁹ Kä cu Naa-man wä kɛ jio̱o̱kɛ kɛnɛ thurbiɛɛlikɛ kä cuɛ wä cuɔ̱ŋ thok dhɔaar Ɛ-li-cä.

¹⁰ Kä cu Ɛ-li-cä jɛ jäk kä raan jio̱kɛ jɛ i̱, “Wër lak rɔ ni kä bärɔw kä Jɔr-dɛn, kä bi cu gɔaa.”

¹¹ Kä cu Naa-man jiɛn a cɛ gaak wee i̱, “Nɛnɛ ɣän ŋa̱cä ni ɣöö bɛ ben raar kä ɣä, kä bɛ Kuɔth Nhial Kuothdɛ ben pal, kä bɛ tetdɛ ben la̱th guäth butdä kä bɛ dhɔpdä cu jak kä gɔaa.

¹² Kä /ci gɔw ni Ä-ba-naa kɛnɛ Par-par yi̱er Da-math-kɛth pi̱kiɛn kä pi̱ yiëri I-thɛ-rɛl diaal? /Cä dëë lak thi̱n kä dëë gɔaa?” Inɔ cuɛ rɔ ri̱t cuɛ wä kɛ gak.

¹³ Kä cu läätdɛ ben kä jɛ kä cuɛ jiök i̱, “Gua̱di̱n, mi ci gök ji̱ jiök i̱ lätni ti di̱t. /Cikɛ dëë la̱t inu? Kä dëë kulɛ jiääk ni ŋu kä ɣöö cɛ ji̱ jiök i̱, ‘Wër lak rɔ bi gɔaa?’ ”

¹⁴ Kä cuɛ wä cuɛ rɔ wä buɔny ni kä bärɔw kä Jɔr-dɛn, ce̱tnikɛ ruac ran Kuɔth. Kä cu puɔ̱nydɛ gɔaa a bɛ ce̱tnikɛ puɔ̱ny gatdä mi tɔt.

¹⁵ Kä cuɛ luny kä raan Kuɔth, kɛnɛ ji̱ ja̱lɛ diaal. Kä cuɛ ben cuɔ̱ŋ nhiamdɛ, kä cuɛ wee, “Nɛnɛ ɣän ŋa̱cä jɛ ɛn ɣöö thilɛ Kuoth wi̱i̱ muɔ̱ɔ̱n kɛɛliw ɛ ni Kuoth I-thɛ-rɛl. Kɛ kui̱c ɛmɔ täämɛ nhɔk mucdä.”

¹⁶ Kä cu Ɛ-li-cä jɛ loc i̱, “Ce̱tkɛ ciöt Kuɔth Nhial in tëk min la̱tdä ikä, ɣän thilɛ mi bä ka̱n.” Kä cu Naa-man jɛ kok, duŋdɛ ɣöö cuɛ lo̱k.

¹⁷ Kä cu Naa-man wee, “Kä mi /ciɛ bi nhɔk, kä moc ɣä kɛ tup mi dëë muɔ̱li rɛw ɛ kap. Kɛ ɣöö thilɛ Kuoth mi bä thöp muc ɛ ni Kuoth Nhial kä rɔa.

¹⁸ Kä a Kuoth Nhial päl ɣä ikä kɛ kui̱c kä nɛmɛ. Mi wä kuäärä wä duëël Ri-mon min wee jɛ pal kä cɛ rɔ thi̱ŋ kɛ wuɔ̱wdä, bä pal bä, kä mi wa̱a̱ wä pal duëël Ri-mon, a Kuoth Nhial ɣä päl ikä thi̱n.”

¹⁹ Kä cu Ɛ-li-cä jɛ jiök i̱, “Wër kɛ mal.” Min ci Naa-man jiɛn kä jɛ kɛ pek mi ciɛk,

²⁰ Cu Ge-ɣä-dhi läät raan Kuɔth wee, “Nɛnɛ ci kuäärä Naa-man raan Thi-ri-ya pa̱l wä a/kenɛ min cɛ nööŋ nhɔk tetkädɛ. Ce̱tnikɛ ciöt Kuɔth Nhial ɣän bä riŋ kɔɔrɛ, kä bä duɔ̱ɔ̱r wä ka̱n kä jɛ.”

²¹ Kä cuɛ Naa-man guɔ̱ɔ̱r. Kä min ci Naa-man raan nɛn ri̱i̱ŋɛ kɔɔrɛ, cuɛ käny piny rɛy thurbiɛɛlɛ cuɛ ben röm kɛ jɛ, kä cuɛ wee, “Ɛ mal?”

²² Kä cu Ge-ɣä-dhi wee, “Ɛ mal. Ci kuäär ɣä ja̱k i̱, ‘Ci nɛy da̱ŋ rɛw pay cop ɛn täämɛ gaat göökni wi̱c päämni Ɛ-pa-rim. Mockɛ kɛ ciik tin bo̱o̱r ti bathdɔɔri diɔ̱k, kɛ gua̱l bieyni da̱ŋ rɛw ti gɔw.’ ”

²³ Kä cu Naa-man wee, “Nhɔk ciik tin bo̱o̱r ti bathdɔɔri bäkɛl.” Cuɛ jɛ kok, kä cuɛ bathdɔɔri bäkɛl cikä min bo̱r ga̱k rɛy thandukni da̱ŋ rɛw, kɛɛl kɛ gua̱l bieyni da̱ŋ rɛw, kä cuɛ kɛ ka̱m la̱a̱tkɛ da̱ŋ rɛw. Kä cukɛ kɛ kap nhiam Ge-ɣä-dhi.

²⁴ Kä min cɛ ben pa̱a̱m, cuɛ kɛ ka̱n tetnikiɛn, kä cuɛ kɛ la̱th duëël. Kä cuɛ naath jak kä wä, kä cukɛ wä.

²⁵ Kä cu Ge-ɣä-dhi wä nyuur nhiam kua̱rɛ, kä cu kuäärɛ jɛ thiec i̱, “Kä ti̱i̱ nikä Ge-ɣä-dhi?” Kä cuɛ loc i̱, “Thilɛ gua̱a̱th mi ci läätdu wä thi̱n.”

²⁶ Kä duundɛ ɣöö cu Ɛ-li-cä jɛ jiök i̱, “Ɛ ji̱n i̱ /ka̱nɛ wä kɛɛl kɛ yiëë min ci Naa-man rɔ ri̱t thurbiɛɛlɛ min ro̱mɛ kɛ ji̱? Ɛ gua̱a̱th mi dëë nhɔk yio̱w kɛnɛ bieyni, kiɛ liɛɛth kiɛ det kɛnɛ ɣɔ̱k, kiɛ la̱a̱t?

²⁷ Kɛ kui̱c ɛmɔ bi dhɔp Naa-man ben kä ji̱, yɛnɛ kuayku amäni cäŋ kɛl.” Kä cuɛ jiɛn nhiamdɛ a cɛ buay ɛ pak ce̱tnikɛ kën.