2 Kua̱r 3 - RUAC KUƆTH IN RƐL RƆ

Ruec Yɛ-ɣo-ram

¹ Kɛ wäl bädäk runi ruëc Yo-ca-pat kuäär Juda. Cu Yɛ-ɣo-ram gat Ɛ̈-ɣab a kuäär I-thɛ-rɛl kä Tha-mɛ-ria. Kä cuɛ ruëc kɛ run wäl rɛw.

² Kä cuɛ jiäk la̱t waaŋ Kuɔth Nhial, cäŋ ni min /cɛ ce̱tkɛ gua̱n, kɛ ɣöö cɛ riäkni kuɔth Baal tëë ci gua̱n kɛ la̱t däk.

³ Kä duundɛ ɣöö cɛ käp ni dueer Ya-rɔ-baam gat Nɛbat tëë cɛ jak I-thɛ-rɛl kä dui̱r. /Kenɛ jɛ päl.

Lär Ɛ-li-cä kɛ juc Mo-ab

⁴ Kä täämɛ kuäär Mo-ab ni Mɛ-ca ɛ ro̱o̱m deet. La kuäär I-thɛ-rɛl a mocɛ kɛ rueeth deet ti bathdɔɔri ti kuɔ̱r, kɛnɛ miem rɔɔmni ti bathdɔɔri ti kuɔ̱r.

⁵ Kä min ci Ɛ̈-ɣab li̱w, cu kuäär Mo-ab ni Mɛ-ca rɔ luɔ̱c kuäär I-thɛ-rɛl.

⁶ Kä cu kuäär ni Yɛ-ɣo-ram ben raar ɛn guäth ɛmɔ kä Tha-mɛ-ria, kä cuɛ ji̱ I-thɛ-rɛl diaal dol.

⁷ Kä cuɛ ruac jäk kä Yo-ca-pat kuäär Juda i̱, “Ci kuäär Mo-ab rɔ luɔ̱c ɣä. Banɛ wä nyiëëny kɛ ji̱ Mo-ab?” Kä cu Yo-ca-pat wee “Bä wä. Ɣän ca̱tdä kɛ ji̱, kä nɛɛkä kɛ nɛɛku, kä jio̱o̱kä kɛ jio̱o̱ku.”

⁸ Kä cuɛ Yɛ-ɣo-ram jiök i̱, “Ɛ duɔ̱ɔ̱p in mith bi wäkɛ kɔn ɔ?” Kä cuɛ loc i̱, “Kɛ duɔ̱ɔ̱p dɔaar Ɛ-dɔm.”

⁹ Inɔ cu kuäär I-thɛ-rɛl kɛnɛ kuäär Juda, kɛ kuäär Ɛ-dɔm wä kɛɛl. Kä min cikɛ rɔ win kɛ ja̱l kɛ ni̱n bärɔw, cuɛ thil pi̱ kɛ kui̱ rɛ̈m, kɛnɛ ley tin guɔ̱ɔ̱rkɛ kɛ.

¹⁰ Kä cu kuäär I-thɛ-rɛl wee, “Aɣ! Ci Kuoth Nhial kua̱r da̱ŋ diɔ̱k ti̱ti̱ cɔl kɛ ɣöö bɛ kɛ la̱th tetdä Mo-ab.”

¹¹ Kä cu Yo-ca-pat wee, “Thilɛ gök Kuɔth Nhial mi tëë wa̱nɛ, mi dëë Kuoth Nhial thiec kä jɛ?” Kä cu raan kɔar kua̱r I-thɛ-rɛl kɛl ɛ loc i̱, “Te Ɛ-li-cä gat Ca-pat ɛn wa̱nɛ, mëë la tet E-li-yaa a lak.”

¹² Kä cu Yo-ca-pat wee, “Te riet Kuɔth Nhial kɛ jɛ kɛɛl.” Kä cu kuäär I-thɛ-rɛl kɛ Yo-ca-pat kɛ kuäär Ɛ-dɔm wä kä jɛ.

¹³ Kä cu Ɛ-li-cä kuäär I-thɛ-rɛl jiök i̱, “Ɛŋu mi dëë lät kä ji̱? Wër kä go̱o̱k guur kɛnɛ go̱o̱k muɔɔr.” Kä cu kuäär I-thɛ-rɛl ɛ loc i̱, “Eey. Ɛ Kuɔth Nhial cɔl kua̱r da̱ŋ diɔ̱k ti̱ti̱ kɛ ɣöö bɛ kɛ la̱th tetdä Mo-ab.”

¹⁴ Kä cu Ɛ-li-cä wee, “Ce̱tnikɛ ciöt Kuɔth Nhial in la Ruey Ɣɔaa in tëk min la̱tdä ikä, duŋ mi ciɛ kui̱ Yo-ca-pat kuäär Juda, /cä ji̱ dëë guic, kä thilɛ mi dëë lät kä ji̱.

¹⁵ Kä täämɛ nöŋɛ ɣä puɔ̱t thuɔm.” Kä min ci puɔ̱t thuɔm thom puɔ̱t, cu buɔ̱m Kuɔth Nhial ben kä Ɛ-li-cä.

¹⁶ Kä cuɛ wee, “Nɛmɛ laarɛ Kuoth Nhial i̱, ‘Ɣän bä waŋ ɛ ci ko̱o̱tdɛ jak kä thiäŋ kɛ puɔ̱l pi̱i̱ni.’

¹⁷ Kɛ ɣöö nɛmɛ laarɛ Kuoth Nhial, ‘/Ci jiɔam kiɛ nhiaal bi nɛn, kä duundɛ ɣöö ɛn waŋ ɛmɛ bɛ thia̱ŋ kɛ pi̱. Kä bia cu maath, kɛɛl kɛ ɣɔ̱ɔ̱kun.’

¹⁸ Nɛmɛ ɛ mi puɔl waaŋ Kuɔth Nhial. Kä bɛ ji̱ Mo-ab la̱th tetädun bä.

¹⁹ Kä bia wi̱i̱ tin buɔ̱m buɔ̱ɔ̱m ka̱n, kɛnɛ wi̱i̱ tin di̱t. Kä bia jiɛn diaal tin gɔw jɔap piny, kä bia wäŋkiɛn diaal gäk, kä bia muɔ̱n tin gɔw dir kɛ dööl.”

²⁰ Mëë ruɔ̱ndɛ kɛ runwaŋ, kɛ gua̱a̱th in la thöpkɛ ni muc, nɛnɛ cu pi̱ ben kui̱ Ɛ-dɔm, amäni min ci wec thia̱ŋ kɛ pi̱.

²¹ Kä min ci ji̱ Mo-ab ɛ liŋ ɛn ɣöö ci kua̱r ben, bikɛ ben nyiëëny kɛ kɛ, cua nɛy diaal tin lua̱ŋkɛ röm Yio̱o̱ni kä ŋuɛ̈tni amäni di̱t cɔl. Kä cukɛ ben nhiam.

²² Kä min cikɛ keer kɛ runwaŋ, kä ci cäŋ lɛ̈p, cu ji̱ Mo-ab pi̱ nɛn ce̱tkɛ ti dɛɛr ti ce̱tkɛ riɛm.

²³ Kä cukɛ wee, “Nɛmɛ ɛ riɛm. Luɔtdɛ ɣöö kua̱r cikɛ nyiëëny kä rɔ, kä cikɛ rɔ näk. Kä ɛn täämɛ lö ji̱ Mo-ab wanɛ pɛɛc!”

²⁴ Kä min cikɛ ben wi̱c ji̱ I-thɛ-rɛl, cu ji̱ I-thɛ-rɛl rɔ jiɛc, kä cukɛ nyiëëny kɛ ji̱ Mo-ab, amäni mëë cikɛ rɔ bar nhiamdiɛn. Kä cukɛ ji̱ Mo-ab na̱k lɛr.

²⁵ Kä cukɛ wec ka̱n. Kä cu ramɔ döl yuɔr mun in gɔaa amäni min ca kum. Kä cukɛ wäŋ pi̱i̱ni diaal ga̱k, kä cikɛ jiɛn diaal tin gɔw jɔap piny. Kä cu duɔth ni dööl kä rɔ kä Kir-ɣä-ra-thɛth, kä cu ji̱ bääri jɛ go̱l kä cua ka̱n.

²⁶ Kä min ci kuäär Mo-ab ɛ nɛn ɛn ɣöö ko̱r jiäkɛ kɛ jɛ, cuɛ rɔ moc nɛy ti tëë mutni ti kur bärɔw kɛ ɣöö derɛ cooth, kɛ luɔt kua̱r Ɛ-dɔm. Duundɛ ɣöö /ken kɛn ɛ luäŋ.

²⁷ Kä cuɛ gatdɛ min di̱i̱t in dëë ruëc kɛ gua̱a̱thdɛ ka̱n. Kä cuɛ jɛ thöp ala muc mi waŋkɛ wi̱i̱ pa̱ny. Kä cua gak mi di̱i̱t kä ji̱ I-thɛ-rɛl. Kä cukɛ rɔ ri̱t kä jɛ kä cukɛ loc wi̱i̱diɛn.