2 Kua̱r 25 - RUAC KUƆTH IN RƐL RƆ

Pɛ̈ɛ̈n Jɛ-ru-tha-lɛm

¹ Kä kɛ cäŋ kä wäl kä pay wäl kɛ bäŋuan runi ruecdɛ cu Nɛ-bu-kad-nɛ-dhar Jɛ-ru-tha-lɛm mak kɛ rɛmdɛ kɛɛliw, kä cuɛ jɛ go̱l. Kä cukɛ jɛ ta̱th päny mi göl kɛ jɛ.

² Cua wec go̱l amäni wäl kɛl runi ruecä kua̱r ni Dhid-ki-yaa.

³ Kɛ bäŋuan ni̱ni kɛ ŋuaan päthni, cu buɔth di̱t rɛy wec, kä cuɛ thil mi cam naathɛ.

⁴ Kä cua päny wec to̱l. Cu kuäär kɛnɛ rɛm kɛɛliw rɔ̱ bar kɛ wäär kɛ duɔ̱ɔ̱p in te kam pa̱nyni da̱ŋ rɛw gekä kakä kua̱r, kä ci ji̱ Bɛ̈-bi-lɔn wec go̱l. Kä cukɛ wä kɛ kui̱ lo̱o̱lä Jɔr-dɛn.

⁵ Duundɛ ɣöö cu rɛm ji̱ Bɛ̈-bi-lɔn kuäär guɔ̱ɔ̱r mäni mëë ca jɛ cop rɛy tɔ̱ɔ̱rä Jɛ-ri-ko. Kä cua rɛmdɛ däkä dɔɔr gekädɛ.

⁶ Kä cukɛ kuäär käp, kä cua jɛ nöŋ kuäär Bɛ̈-bi-lɔn kä Rib-laa, kä cuɛ jɛ kum kɛ Lia̱a̱.

⁷ Kä cua gat Dhid-ki-yaa näk ni nhiamdɛ, kä cua wäŋkɛ lööl raar, kä cua jɛ pua̱t kɛ kuatni, kä cua jɛ naŋ kä Bɛ̈-bi-lɔn.

Däk luaak Kuɔth Nhial

⁸ Kɛ cäŋ kä bärɔw kä pay dhieec (min la wäl bäŋuan runi ruecä Nɛ-bu-kad-nɛ-dhar kuäär Bɛ̈-bi-lɔn). Cu Nɛ-bu-dhar-dan raan läätdä kua̱r Bɛ̈-bi-lɔn, min la bo̱o̱th yiëëni ben kä Jɛ-ru-tha-lɛm.

⁹ Kä cuɛ luak Kuɔth Nhial kɛnɛ duel kua̱r kɛ ti̱ec Jɛ-ru-tha-lɛm diaal waŋ. Kɛn ti̱ec diaal tin di̱t cuɛ kɛ waŋ.

¹⁰ Kä cu rɛm Bɛ̈-bi-lɔn ni kɛɛliw in te kɛɛl kɛ bo̱o̱th yiëëni, päny in go̱l Jɛ-ru-tha-lɛm da̱k piny.

¹¹ Kä cu duɔth nɛɛni tëë ci duɔth rɛy wec, kɛnɛ duɔth nɛɛni diaal tëë ci wä kä kuäär Bɛ̈-bi-lɔn cu Nɛ-bu-dhar-dan bo̱o̱th yiëëni kɛ naŋ ala pɛ̈ɛ̈c.

¹² Duundɛ ɣöö cu bo̱o̱th yiëëni ɛ tha̱a̱ŋ nɛɛni tin la can ba̱ny piny kɛ ɣöö ba ka̱a̱k lɔ̱ɔ̱ pith.

¹³ Kä cu ji̱ Bɛ̈-bi-lɔn riäk yieethä min do̱l in te luaak Kuɔth Nhial, kɛnɛ dhaar puɔɔkä tiath, kä cukɛ yiëëth in do̱l kap kä Bɛ̈-bi-lɔn.

¹⁴ Kä cukɛ cuɔ̱ɔ̱k, kɛnɛ liir, kɛ kueenyni maac, kɛ kuak yieethä min do̱l diaal tin lät kɛ naath rɛy luaak Kuɔth Nhial ka̱n,

¹⁵ Cu mäni kɔ̱ɔ̱li maac, kɛnɛ took. Kä cuɛ tin diaal tin la da̱a̱p kɛnɛ tin la ciɛk in bo̱r ka̱n bä.

¹⁶ Kä cuɛ yiëëth in do̱l täth ni dhaar puɔɔkä kɛnɛ wääthni da̱ŋ rɛw, kɛ cuɔ̱ɔ̱ŋ tëë ci Thɔ-lo-mon kɛ lät ni luak Kuɔth Nhial a ti ca luäŋ kɛ thëm.

¹⁷ Kä bär wääthä kɛl ɛ jua̱th tetni da̱ŋ wäl bädäk, kä te wi̱cdɛ kɛ kum yieethä min do̱l. Kä bär kumä ɛ jua̱th tetni da̱ŋ diɔ̱k. Kä ca kɛt ce̱tkɛ jɔk jua̱a̱th, kä ca win kɛɛliw kɛ yiëëth in do̱l. Kä cua jɛn ta̱a̱ wääthä min dɔ̱ŋ ɛ nɔ bä ca kɛt ce̱tkɛ jɔk jua̱a̱th.

Pɛc ji̱ Juda kä Bɛ̈-bi-lɔn

¹⁸ Kä cu bo̱o̱th yiëëni bo̱o̱th palä min di̱i̱t ni Thɛ-ra-yaa, kɛnɛ bo̱o̱th palä min rɛwdɛ ni Dhɛ-pɛ̈n-yaa, kɛ gueec thuɔk kal da̱ŋ diɔ̱k naŋ ala pɛ̈ɛ̈c.

¹⁹ Kä cuɛ raan kɔar kua̱r min la naath ɛ bo̱o̱th ko̱o̱r, kɛnɛ ji̱ yiën kua̱r da̱ŋ dhieec ti te rɛy wec, kɛ bolith bo̱o̱thä rɛ̈m min la naath a car, kɛ nɛy ti jiɛn bäkɛl ti kɔ̱ŋ ti ca jek rɛy wi̱c naŋ ala pɛ̈ɛ̈c bä.

²⁰ Kä cu Nɛ-bu-dhar-dan kɛn diaal naŋ, cuɛ kɛ nöŋ kuäär Bɛ̈-bi-lɔn kä Rib-laa.

²¹ Kä cu kuäär Bɛ̈-bi-lɔn kɛ näk kä Rib-laa muun Ä-math. Inɔ cua ji̱ Juda naŋ ala pɛ̈ɛ̈c muundiɛn.

Rueec Juda ni Gɛ-dɛ̈l-yaa

²² Kä cu Nɛ-bu-kad-nɛ-dhar kuäär Bɛ̈-bi-lɔn Gɛ-dɛ̈l-yaa gat Ä-ɣi-kam, gat Ca-pan kuany ala rueec nɛɛni tëë cɛ ba̱ny kä Juda.

²³ Kä mëë ca jɛ liŋ ɛ bööth rɛmni diaal kɛ nɛɛkiɛn ɛn ɣöö ci kuäär Bɛ̈-bi-lɔn Gɛ-dɛ̈l-yaa kuany ala rueec, cukɛ ben kä Gɛ-dɛ̈l-yaa kɛ nɛɛkiɛn kä Midh-pa, I-ca-mel gat Nɛ-thɛ̈n-yaa, kɛ Yo-ɣa-nan gat Ka-re-ɛ̈k, kɛ Thɛ-ra-yaa gat Tɛ̈n-ɣu-mɛth raan Nɛ-to-path, kɛ Yɛ̈-ä-dhɛ̈n-yaa min la gat ran Maaka.

²⁴ Kä cu Gɛ-dɛ̈l-yaa rɔ ya̱ckɛ wëë i̱, “/Cuarɛ dual kɛ bööth ji̱ Bɛ̈-bi-lɔn. Cieŋɛ wec, kä la̱tdɛ kuäär Bɛ̈-bi-lɔn ikä, bi gɔaa ni jɛn kɛ yɛ.”

²⁵ Duundɛ ɣöö kɛ bärɔw päthni, cu I-ca-mel gat Nɛ-thɛ̈n-yaa, gat Ɛli-cama raan thuɔk duëël kuäärä, ben kɛ nɛy da̱ŋ wäl, cuɛ Gɛ-dɛ̈l-yaa näk kɛnɛ ji̱ Juda, kɛ ji̱ Bɛ̈-bi-lɔn tëë te kɛɛl kɛ jɛ kä Midh-pa.

²⁶ Kä cu nɛy diaal amäni gaat, kɛ bööth rɛmni rɔ bar kä I-jëp. Kɛ ɣöö dualkɛ kɛ ji̱ Bɛ̈-bi-lɔn.

Luɔ̱ny Yɛ-ɣo-ya-kin duëël yieenä

²⁷ Kɛ cäŋ kä jiɛn da̱ŋ rɛw wi̱cdɛ bärɔw kä pay wäl rɛw kɛ ruɔ̱n jiɛn diɔ̱k wi̱cdɛ bärɔw mëë pɛckɛ Yɛ-ɣo-ya-kin kuäär Juda, mëë took Ɛ-wil-mɛ-ro-dɛ̈k kuäär Bɛ̈-bi-lɔn kuäär. Cuɛ Yɛ-ɣo-ya-kin kuäär Juda lony duëël yieenä.

²⁸ Kä cuɛ ruac agɔaa kɛ jɛ, kä cuɛ ka̱m kɔm mi leny kɔamni kua̱ri tin te kɛɛl kɛ jɛ ni wen kä Bɛ̈-bi-lɔn.

²⁹ Kä cu Yɛ-ɣo-ya-kin bieyni duëël yieenä woc. Kä cuɛ la mi̱thɛ kɛɛl kɛ kuäär ni ciaŋ.

³⁰ Kä la kuäär jɛ a moc yio̱w ni ciaŋ, ce̱tnikɛ ni̱n teekädɛ.