2 Kua̱r 23 - RUAC KUƆTH IN RƐL RƆ

Wuɔ̱c Yo-ci-yaa kɛ pa̱a̱l kuthni guäyni

¹ Kä cu kuäär bööth Juda kɛnɛ Jɛ-ru-tha-lɛm diaal cɔal guäth kɛl.

² Kä cu kuäär wä luaak Kuɔth Nhial, kɛɛl kɛ ji̱ Juda diaal kɛnɛ ji̱ Jɛ-ru-tha-lɛm diaal, kɛ bööth palä, kɛnɛ go̱o̱k kɛ nɛy diaal tin di̱t kɛnɛ tin tiɛtni. Kä cuɛ kɛ kuën rieet buɔk ŋuɔ̱tni diaal ca jek rɛy luaak Kuɔth Nhial.

³ Kä cu kuäär cuɔ̱ŋ wääthä kä cuɛ mat ruac lat nhiam Kuɔth Nhial, kɛ ɣöö bɛ guɔ̱ɔ̱r ni Kuoth Nhial, kä bɛ tit ni luëëkɛ kɛnɛ ŋuɔ̱tkɛ kɛ lɔcdɛ kɛɛliw, kɛnɛ ca̱rɛ kɛɛliw. Kɛ ɣöö bɛ rieet ŋuɔ̱tni ti ca gɔ̱r rɛy buɔk ɛmɛ la̱t. Kä cu nɛy diaal rɔ mat rɛy matdä ruacdɛ.

⁴ Kä cu kuäär ruac kɛ bo̱o̱th palä min di̱i̱t, kɛnɛ bööth palä tin kɔ̱ŋ, kɛ la̱a̱t thuɔk luaak, kɛ ɣöö ba kuak diaal tin te rɛy luaak Kuɔth Nhial tin ca la̱t kuoth Baal, kɛ Ä-ce-ra, kɛ tin la nyin nhial ka̱m raar rɛy luaak Kuɔth Nhial. Kä cuɛ kɛ waŋ raar Jɛ-ru-tha-lɛm rɛy tɔ̱ɔ̱rä Kid-ron, kä cuɛ ŋɛ̈thdiɛn naŋ kä Beth-ɛl.

⁵ Kä cuɛ bööth palä kuthni guäyni woc tëë ca kuany ɛ kua̱r Juda kɛ ɣöö ba wal waŋ wi̱i̱ yi̱kni kuthni guäyni rɛy wi̱i̱ni Juda, kɛnɛ Jɛ-ru-tha-lɛm. Amäni tin wa̱ŋkɛ kuoth Baal wal, kɛ cäŋ, kɛnɛ pay, kɛ nyin nhial diaal.

⁶ Kä cuɛ Ä-ce-ra ka̱m raar rɛy luaak Kuɔth Nhial kä Jɛ-ru-tha-lɛm, kä cuɛ jɛ naŋ lo̱o̱lä Kid-ron, kä cuɛ jɛ waŋ thi̱n, kä cuɛ nor, kä cuɛ ŋɛ̈thdɛ wä yiäk wuɔ̱thni muɔ̱ni nɛɛni ti duɛk.

⁷ Kä cuɛ duel palä kuthni guäyni min ca la̱t rɛy luaak Kuɔth Nhial däk, gua̱th in la män Ä-ce-ra a ko̱c thi̱n.

⁸ Cuɛ bööth palä diaal nööŋ raar wi̱i̱ni Juda, kä cua yi̱kni tin la wal a waŋkɛ thi̱n ya̱r, a känɛ jɛ ni kä Gabä amäni Ber-cɛ-ba. Kä cuɛ gua̱th pali kuthni guäyni da̱k piny ni thi̱ek in wäkɛ naath rɛc, cu mäni thi̱i̱k Jɔ-cua rueec wec min te kui̱ caam thiek wec.

⁹ Kä duundɛ ɣöö /ken bööth palä guäyni ben wi̱i̱ yi̱kä Kuɔth Nhial kä Jɛ-ru-tha-lɛm. Ɛni ɣöö cam kɛn ni juray mi thil thuɔp kä gaatmani.

¹⁰ Kä cuɛ To-pɛth in te rɛy lo̱o̱lä gan I-nɔm ya̱r, kɛ ɣöö thilɛ ram mi bi gatdɛ kiɛ nyadɛ lɛ wa̱ŋ kuoth Mo-lɛk.

¹¹ Kä cuɛ jio̱o̱ktuɔ̱ruɔ̱k tin ca lëy kuoth ca̱ŋ ɛ kua̱r Juda woc, tin te thok luaak Kuɔth Nhial rɛy kal thieekä duëël läätdä ni Na-than. Kä cuɛ thurbil mi ca lëy kuoth ca̱ŋ waŋ.

¹² Kä cuɛ yi̱k in te wi̱i̱ duëël A-ɣadh nhial, mëë la̱tkɛ ɛ kuäär Juda, kɛnɛ yi̱kni tëë ca la̱t ɛ Ma-na-thɛ rɛy käli luaak Kuɔth Nhial da̱ŋ rɛw da̱k piny, kä cuɛ tupdiɛn wä yuɔr ni rɛy waŋ Kid-ron.

¹³ Kä cu kuäär gua̱th pali tin te kui̱ käny ca̱ŋ Jɛ-ru-tha-lɛm ya̱r, amäni kui̱c cuëëc pa̱a̱m nyuɔɔni, mëë tääth Thɔ-lo-mon kuäär I-thɛ-rɛl ɛ Ac-tar-te kuoth ji̱ Dhi-don, kɛnɛ Kɛ-moc kuoth ji̱ Mo-ab, kɛ Mil-kom kuoth ji̱ A-mon.

¹⁴ Kä cuɛ riäkni kɛ Ac-tar-te to̱l kä piny, kä cuɛ gua̱a̱thdiɛn duɔ̱l cɔ̱w nath.

¹⁵ Kä cuɛ yi̱k in te kä Beth-ɛl, kɛnɛ gua̱th palä mëë la̱tkɛ ɛ Ya-rɔ-baam gat Nɛ-bat mëë jak I-thɛ-rɛl kä dui̱r da̱k piny, cuɛ päämkiɛn nor ala tup. Kä cuɛ Ac-tar-te waŋ bä.

¹⁶ Kä min guic Yo-ci-yaa cuɛ wuɔ̱th muɔ̱ni nɛn wi̱i̱ pa̱a̱m. Cuɛ naath ja̱k kä cukɛ cɔ̱w ka̱m raar rɛy kɔ̱a̱kni, kä kɛ waŋ wi̱i̱ yi̱kä kä cuɛ kɛ ya̱r ce̱tnikɛ riet Kuɔth Nhial mëë ca lar ɛ raan Kuɔth, mëë lat ti̱ti̱.

¹⁷ Kä cu kuäär thiec i̱, “Ɛ wi̱c muɔ̱n ŋa ɛ nɔ nɛɛnä mɔ wi̱i̱ pa̱a̱m?” Kä cu ji̱ wec ɛ jiök i̱, “Ɛ wi̱c muɔ̱ɔ̱n ran Kuɔth mi bä kä Juda mëë lat kɛn ti ci lät kä yi̱k Beth-ɛl ti̱.”

¹⁸ Kä cuɛ wee, “A jɛ tey, a thil ram mi wooc cɔ̱wkɛ.” Kä cukɛ cɔ̱wkɛ päl kɛnɛ cɔ̱w go̱kä mëë bä kä Tha-mɛ-ria.

¹⁹ Kä cu Yo-ci-yaa gua̱th pali kuthni guäyni diaal tëë ca la̱t rɛy wi̱i̱ni Tha-mɛ-ria ɛ kua̱r I-thɛ-rɛl tëë jak kɛ Kuoth Nhial kä gak. Cuɛ kɛ la̱t nikɛ lätni mëë cɛ lätni nyin Beth-ɛl.

²⁰ Kä cuɛ bööth palä gua̱thni tɔ̱tɔ̱ näk wuɔ̱thni yi̱kni, kä cuɛ cɔ̱w nath waŋ wuɔ̱thnikiɛn. Kä cuɛ loc kä Jɛ-ru-tha-lɛm.

Ti̱em Yo-ci-yaa kɛ Cäŋ Bälä

²¹ Kä cu kuäär naath jiök i̱, “Tiɛmɛ cäŋ bälä Kuɔth Nhial Kuothdun, ce̱tkɛ min ca gɔ̱a̱r rɛy buɔk matdä ruac ɛ mi.”

²² Kɛ ɣöö thilɛ tiem ca̱ŋ bälä mi ca me̱t la̱t ni mëë ku Ruëëc I-thɛ-rɛl ruac, kiɛ kɛ ni̱n tëë ruec kua̱r I-thɛ-rɛl kɛnɛ Juda.

²³ Duundɛ ɣöö kɛ wäl bädäk runi ruëc Yo-ci-yaa cua ca̱ŋ bälä Kuɔth Nhial tim kä Jɛ-ru-tha-lɛm.

Lät Yo-ci-yaa tin kɔ̱ŋ

²⁴ Kä cu Yo-ci-yaa ti̱t, kɛ ji̱ kolaaŋni, kɛ kuth guäyni kɛ jiäk diaal tin te kä Juda kɛnɛ Jɛ-ru-tha-lɛm woc. Kä cuɛ la̱t ni riet ŋuɔ̱tni tin ca gɔ̱a̱r rɛy buɔk ëë jek Ɣil-ki-yaa bo̱o̱th palä jɛ rɛy luaak Kuɔth Nhial.

²⁵ Kä cuɛ thil kuäär mi ce̱tkɛ jɛ nhiamdɛ, mi cu rɔ riet Kuoth Nhial kɛ lɔcdɛ kɛɛliw, kɛnɛ ca̱rɛ kɛɛliw, kɛ buɔ̱mdɛ kɛɛliw, ce̱tnikɛ ŋuɔ̱t Muthɛ. Kä cuɛ thil ram mi ce̱tkɛ jɛ mi cu rɔ jiɛc kɔɔrɛ.

²⁶ Kä cu gak Kuɔth Nhial in ci ben kä Juda ŋot /kenɛ thuɔ̱k, kɛ kui̱ kä tin diaal tëë ci Ma-na-thɛ jɛ jak kä gak kɛ kɛ.

²⁷ Kä cu Kuoth Nhial wee, “Ɣän bä Juda woc muun in cieŋä thi̱n bä, ce̱tnikɛ mëë cä I-thɛ-rɛl däk, kä bä wec ëë cä mɛk ni Jɛ-ru-tha-lɛm yiäk, kɛnɛ duel ëë cä lar i̱ ba ɣä pal thi̱n.”

Thuɔ̱k ruëc Yo-ci-yaa

²⁸ Kä cua duɔth lätni Yo-ci-yaa diaal gɔ̱a̱r rɛy buɔk kuɛ̈ɛ̈ni kua̱ri Juda.

²⁹ Kɛ ni̱nkɛ cu Pɛro Nɛko kuäär I-jëp kuäär A-thi-ri-ya ben luäk kɛ duɔ̱ɔ̱p kiɛr Yu-pɛ-ree-tidh. Kä cu kuäär ni Yo-ci-yaa wä wëë röm kɛ jɛ kä mëë ci Pɛro Nɛko jɛ nɛn, cuɛ jɛ näk kä Mɛ-gi-do.

³⁰ Kä cu raan kɔarɛ ri̱ŋdɛ naŋ kɛ thurbil kä Mɛ-gi-do naŋɛ jɛ kä Jɛ-ru-tha-lɛm, kä cuɛ jɛ wä kony kɔ̱kädɛ. Kä cu naath gatdɛ ni Yɛ-ɣo-a-ɣadh yi̱r ala kuäär kɛ gua̱a̱thdɛ gua̱n.

Kuäär Juda ni Yɛ-ɣo-a-ɣadh

³¹ Mëë took Yɛ-ɣo-a-ɣadh kuäär tëë kɛ run ti jiɛn da̱ŋ rɛw wi̱cdɛ diɔ̱k, kä cuɛ ruëc kä Jɛ-ru-tha-lɛm kɛ päth diɔ̱k. Kä cɔalkɛ man i̱ Ɣä-mu-tɛ̈l nya ran Lib-na ni Yir-mɛ-yaa.

³² Kä cuɛ la̱t ni jiäk waaŋ Kuɔth Nhial, ce̱tnikɛ tëë diaal tëë ci gua̱ni kɛ la̱t.

³³ Kä cu Pɛro Nɛko jɛ la̱th duëël yieenä därdɔaar muun Ä-math, kɛ ɣöö /cɛ bi ruëc kä Jɛ-ru-tha-lɛm, kä cuɛ wec moc tho̱lbo̱k kɛ ki̱luni cikä min bo̱r ti bathdɔɔri diɔ̱k wi̱cdɛ kur ŋuaan, kɛ ki̱luni dääpä ti jiɛn diɔ̱k wi̱cdɛ ŋuaan.

³⁴ Kä cu Pɛro Nɛko Ɛl-ya-kim gat Yo-ci-yaa jak kä kuäär kɛ gua̱a̱th gua̱n, kä cuɛ ciötdɛ ri̱t i̱ Yɛ-ɣo-ya-kim. Kä cuɛ Yɛ-ɣo-a-ɣadh woc, cuɛ naŋ kä I-jëp, kä cuɛ wä li̱w ɛn wi̱ni.

³⁵ Kä cu Yɛ-ɣo-ya-kim ciɛk in bo̱r kɛ da̱a̱p ka̱m Pɛro, kä cuɛ yio̱w thol kä naath ce̱t ni min ci Pɛro ɛ la̱r jɛ. Kä cuɛ ciɛk in bo̱r kɛnɛ da̱a̱p thol kä ji̱ wec, cuɛ kɛ thol ce̱tkɛ pek nath, cuɛ kɛ ka̱m Pɛro Nɛko.

Kuäär Juda ni Yɛ-ɣo-ya-kim

³⁶ Mëë took Yɛ-ɣo-ya-kim kuäär tëë kɛ run ti jiɛn da̱ŋ rɛw wi̱cdɛ dhieec, kä cuɛ ruëc kä Jɛ-ru-tha-lɛm kɛ run wäl kɛl. Kä cɔalkɛ man i̱ Dhɛ-bi-daa nya Pɛ-da-yaa kä Rumaa.

³⁷ Kä cuɛ la̱t ni jiäk nhiam Kuɔth Nhial, ce̱tnikɛ tëë diaal tëë ci gua̱ni kɛ la̱t.