2 Kua̱r 22 - RUAC KUƆTH IN RƐL RƆ

Kuäär Juda ni Yo-ci-yaa

¹ Mëë took Yo-ci-yaa kuäär tëë kɛ run bädäk, kä cuɛ ruëc kä Jɛ-ru-tha-lɛm kɛ run ti jiɛn diɔ̱k wi̱cdɛ kɛl. Kä cɔalkɛ man i̱ Yɛ-di-daa nya Ä-da-yaa kä Bɔdh-kath.

² Kä cuɛ la̱t ni gɔy nhiam Kuɔth Nhial, kä cuɛ guɔ̱ɔ̱r ni dup gua̱n diaal ni Dee-bid, kä /kenɛ rɔ ri̱t kɔɔr Kuoth.

Jek buɔk ŋuɔ̱tni

³ Kä kɛ wäl bädäk runi ruëc kua̱r ni Yo-ci-yaa. Cuɛ Ca-pan gat Ä-dhɛ̈l-yaa gat Mɛ-cu-lam bolithdɛ jäk kä luaak Kuɔth Nhial wëë i̱,

⁴ “Wër kä bo̱o̱th palä min di̱i̱t ni Ɣil-ki-yaa kɛ ɣöö bɛ pek yio̱o̱ni tin ca ma̱a̱t ɛ bööth tin lät thok luaak Kuɔth Nhial kä naath ŋa̱c.

⁵ Kä akɛ ka̱mkɛ nɛy tin la̱t kɛ rɛy luaak Kuɔth Nhial, kɛnɛ tin guɛckɛ luak, kɛ tin buɔtkɛ jɛ,

⁶ kɛ ŋa̱a̱t jiɛn, kɛ ta̱a̱th kɛ la̱a̱t päämni, amäni kök jiɛn, kɛ pääm ti ba bot ni luak.

⁷ Kä cakɛ bi thiec kɛ yio̱w tin ca ka̱mkɛ kɛ ɣöö ci kɛ lät ni luthä.”

⁸ Kä cu bo̱o̱th palä min di̱i̱t ni Ɣil-ki-yaa bolith ni Ca-pan jiök i̱, “Ɣän cä bok ŋuɔ̱tni jek rɛy luaak Kuɔth Nhial.” Kä cuɛ jɛ ka̱m Ca-pan, kä cu ca-pan jɛ kuɛn.

⁹ Kä cu bolith Ca-pan ruac nöŋ kuäär i̱, “Ci ji̱ kɔaru yio̱w tëë ca jek rɛy luaak Kuɔth Nhial thöp, ca kɛ ka̱m la̱a̱t kɛnɛ gueec luaak Kuɔth Nhial.”

¹⁰ Kä cuɛ kuäär jiök i̱, “Ci bo̱o̱th palä ni Ɣil-ki-yaa ɣä ka̱m bok.” Kä cuɛ jɛ kuɛn nhiam kua̱r.

¹¹ Kä min ci kuäär rieet buɔk ŋuɔ̱tni liŋ, cuɛ bieynikɛ rɛ̈t.

¹² Kä cu kuäär ruac kɛ bo̱o̱th palä ni Ɣil-ki-yaa, kɛnɛ gat Ca-pan ni Ä-ɣi-kam, kɛ gat mi-ka-yaa ni Ak-bor, kɛ jɛn bolith ni Ca-pan, kɛ raan kɔar kua̱r ni Ä-tha-yaa wëë i̱,

¹³ “Wiaa thiecɛ Kuoth Nhial kɛ kui̱dä, kɛnɛ kui̱ nath kɛ kui̱ Juda kɛɛliw, thiecɛ jɛ kɛ kui̱ rieetni buɔk ŋuɔ̱tni mi ca jek ɛ. Kɛ ɣöö Kuɔth Nhial cɛ kɛ̈c kɛ kɔn ɛlɔ̱ŋ, kɛ ɣöö /ken gua̱ni kɔn rieet buɔk ɛ mi luɔ̱th, /ka̱n la̱t ni tin diaal tin ca gɔ̱a̱r ɛn rɛy buɔk ɛ mi kɛ kui̱dan.”

¹⁴ Kä cu bo̱o̱th palä ni Ɣil-ki-yaa, kɛnɛ Ä-ɣi-kam, kɛ Ak-bor, kɛ Ca-pan, kɛ Ä-tha-yaa wä kä gök ciëk ni Ɣul-daa, ciek Cɛ̈-lum gat Tik-waa gat Ɣɛ̈r-ɣɛ̈th gääŋ bieyni luaak Kuɔth Nhial (Kä jɛn cieŋɛ kä Jɛ-ru-tha-lɛm kä pek in rɛwdɛ ɛn wi̱c).

¹⁵ Kä cuɛ kɛ jiök i̱, “Nɛmɛ ci Kuoth Nhial ni Kuoth I-thɛ-rɛl ɛ lar i̱, ‘La̱rɛ jɛ ram in jäk yɛ kä ɣä ɛn ɣöö,

¹⁶ ci Kuoth Nhial wee, “Ɣän bä da̱k nööŋ ɛn wa̱nɛ mɔ kɛnɛ ji̱kɛ, ce̱tnikɛ tin diaal tin ca gɔ̱r rɛy buɔk in ca kuɛn ɛ kuäär Juda.

¹⁷ Kɛ ɣöö ca ɣä pa̱l ruëëc, ɛ wa wa̱ŋ ni kuth ti kɔ̱ŋ wal tin kuɔ̱r kuɔ̱ɔ̱r, kä ca ɣä jak kä gak kɛ lätkiɛn diaal, kɛ kui̱c ɛmɔ bi kɛ̈cdä ben ɛn guäth ɛmɛ kä /cɛ bi thuɔ̱k.”

¹⁸ Duundɛ ɣöö kɛ kuäär Juda min jäk yɛ, kɛ ɣöö bia Kuoth Nhial ben thiec, bia la̱r mɛmɛ, ci Kuoth Nhial ni Kuoth I-thɛ-rɛl nɛmɛ lar, kɛ kui̱ ruac in ci liŋ,

¹⁹ kɛ ɣöö cɛ rɔ ri̱t kä cɛ rɔ jak kä muɔ̱l nhiam Kuɔth Nhial. Mëë cɛ ruac ëë cä lat kɛ kui̱ gua̱th ɛmɛ kɛnɛ ji̱kɛ liŋ, ɛn ɣöö bäkɛ däk kä bäkɛ lam. Kä cuɛ bieynikɛ rɛ̈t, kä cuɛ wiee nhiamdä. Ɣän cä jɛ liŋ bä, ruac ni ɣän Kuoth Nhial.

²⁰ Kɛ kui̱c ɛmɔ, ɣän bä jɛ mat kä gua̱ni, bɛ wä ni kɔ̱kädɛ kɛ mal, cɛ jiäk diaal tin bä nööŋ ɛn guäth ɛmɛ bi nɛn kɛ waŋdɛ.’ ” Kä cukɛ thok luɔ̱c kuäär.