2 Kua̱r 21 - RUAC KUƆTH IN RƐL RƆ

Kuäär Juda ni Ma-na-thɛ

¹ Mëë took Ma-na-thɛ kuäär tëë kɛ run wäl rɛw, cuɛ ruëc kä Jɛ-ru-tha-lɛm kɛ run ti jiɛn da̱ŋ dhieec wi̱cdɛ dhieec. Kä cɔalkɛ man i̱ Ɣɛp-dhi-baa.

² Kä cuɛ la̱t ni dueer nhiam Kuɔth Nhial, ce̱tnikɛ jiäk dööri tëë juɔc Kuoth Nhial kɛ raar nhiam ji̱ I-thɛ-rɛl,

³ kɛ ɣöö cɛ gua̱th pali kuthni guäyni tëë ci gua̱n ni Ɣidh-ki-yaa kɛ däk nyɔk kɛ lätni. Kä cuɛ yi̱kni kuɔth Baal la̱t bä, kä cuɛ Kuɔth Ac-tar-te la̱t ce̱tnikɛ mëë ca la̱t ɛ kuäär I-thɛ-rɛl ni Ɛ̈-ɣab, kä cuɛ nyin nhial pal.

⁴ Kä cuɛ yi̱kni kuthni diaal guäyni lat rɛy luaak Kuɔth Nhial mëë ci Kuoth Nhial ɛ lar i̱, “Kä Jɛ-ru-tha-lɛm bi ciötdä te thi̱n.”

⁵ Kä cuɛ nyin diaal nhial ta̱th yi̱kni rɛy käli luaak Kuɔth Nhial da̱ŋ rɛw.

⁶ Kä cuɛ gatdɛ thöp ala muc mi waŋkɛ, tui̱thɛ kä lätdɛ muɔ̱ɔ̱t, kä wëë kä ji̱ wal kɛnɛ ji̱ kuthni guäyni. Cuɛ lat ni dueer ti ŋuan nhiam Kuɔth Nhial, kä cuɛ jɛ jak kä gak.

⁷ Kä cuɛ pua̱ny kuɔth Ä-ce-ra tin cɛ la̱t la̱th rɛy luaak Kuɔth Nhial ëë cɛ la̱r Dee-bid kɛnɛ gatdɛ ni Thɔ-lo-mon i̱, “Ɛn rɛy luaak ɛ mi kɛnɛ Jɛ-ru-tha-lɛm min cä mɛk rɛy thuk duëli I-thɛ-rɛl diaal, ɣän ba ɣä pal thi̱n amäni cäŋ kɛl.

⁸ Kä cä raan I-thɛ-rɛl bi lɛ jak kä yi̱c ɛn muun ɛ cä ka̱m gua̱ni mi, mi wäkɛ wä la̱t ni tin diaal tin cä la̱t kɛ, kɛnɛ ŋuɔ̱t diaal tëë ci ja̱ŋdä ni Muthɛ kɛ la̱t kɛ.”

⁹ Duundɛ ɣöö /ken kɛn ɛ liŋ, cu Ma-na-thɛ com nikɛ kɛ ɣöö ba la̱t ni jiäk ti ŋuan ti la̱nykɛ tëë ca la̱t ɛ döör tëë ci Kuoth Nhial kɛ däk nhiam ji̱ I-thɛ-rɛl.

¹⁰ Kä cu Kuoth Nhial ruac kɛ thuk ja̱a̱ŋnikɛ ni go̱o̱k wëë i̱,

¹¹ “Kɛ ɣöö ci Ma-na-thɛ kuäär Juda jiäk la̱t, ti ŋuan nikɛn kä ti diaal tëë ca la̱t ɛ ji̱ Ɛ-mor tëë te nhiamdiɛn, kä cɛ Juda jak kä dui̱r kɛ pal kuthni jiɛn.

¹² Kɛ kui̱c ɛmɔ ci Kuoth Nhial Kuoth I-thɛ-rɛl wee, ɣän bä Jɛ-ru-tha-lɛm kɛnɛ Juda nöŋ da̱k mi bi ram in bi jɛ liŋ miŋ.

¹³ Ɣän bä Jɛ-ru-tha-lɛm duäc ce̱tkɛ Tha-mɛ-ria kɛnɛ dhɔr Ɛ̈-ɣab. Kä ba Jɛ-ru-tha-lɛm poc ce̱t min la raan tuɔ̱k a lak kä bɛ jɛ buɔ̱p piny.

¹⁴ Kä bä duɔth nɛɛnikä lo̱k, kä bäkɛ la̱th tetni ji̱ tɛ̈riɛn, kä bikɛ ce̱tkɛ ley ti kakɛ, kɛnɛ pɛ̈ɛ̈c kä ji̱ tɛ̈riɛn diaal,

¹⁵ kɛ ɣöö ca la̱t ni duer waaŋdä, kä ca ɣä jak kä gak, nikɛ cäŋ ëë bäkɛ gua̱ni raar kä I-jëp cu mäni walɛ.”

¹⁶ Kä ciɛ jɛn kä rɔa, Ma-na-thɛ cɛ rim nɛɛni ti ŋuan ti kui̱c ŋu wuɔ̱th piny a cɛ Jɛ-ru-tha-lɛm thiäŋ kɛɛliw, a /ci duer in cɛ Juda jak kä dui̱r kɛ jɛ te thi̱n, a ba la̱t ni jiäk waaŋ Kuɔth Nhial.

¹⁷ Kä cua duɔth lätni Ma-na-thɛ diaal tëë cɛ la̱t, kɛ duer ëë cɛ la̱t gɔ̱a̱r rɛy buɔk kuɛ̈ɛ̈ni kua̱ri Juda.

¹⁸ Kä cuɛ li̱w, kä cua jɛ kony rɛy kakä dhɔaarɛ, kak Udha. Kä cu gatdɛ ni A-mon ruëc kɛ gua̱a̱thdɛ.

Kuäär Juda ni A-mon

¹⁹ Mëë took A-mon kuäär tëë kɛ run ti jiɛn da̱ŋ rɛw wi̱cdɛ rɛw, kä cuɛ ruëc kä Jɛ-ru-tha-lɛm kɛ run da̱ŋ rɛw. Kä cɔalkɛ man i̱ Mɛ-cu-lɛ-mɛth nya Ɣa-rudh kä Yot-bath.

²⁰ Kä cuɛ la̱t ni jiäk nhiam Kuɔth Nhial ce̱tkɛ mëë ca la̱t ɛ gua̱n ni Ma-na-thɛ.

²¹ Cuɛ guɔ̱ɔ̱r ni duɔ̱ɔ̱p gua̱n kä cuɛ pal ni kuth tëë ci gua̱n kɛ kɔŋ pal.

²² Kä cuɛ Kuoth Nhial Kuoth I-thɛ-rɛl lo̱k, /kenɛ duɔ̱ɔ̱pdɛ guɔ̱r.

²³ Kä cu ji̱ kɔarɛ jɛ ca̱p mi jiäk, kä cua jɛ näk dhɔrɛ.

²⁴ Duundɛ ɣöö cu ji̱ wec diaal nɛy te ca A-mon ca̱p mi jiäk näk. Kä cukɛ gatdɛ ni Yo-ci-yaa kuany ala kuäär gua̱a̱thdɛ.

²⁵ Kä täämɛ cua duɔth lätni A-mon tëë cɛ la̱t gɔ̱a̱r rɛy buɔk kuɛ̈ɛ̈ni kua̱ri Juda.

²⁶ Kä cua jɛ kony kɔ̱kädɛ rɛy kakä Udha. Kä cu gatdɛ ni Yo-ci-yaa ruëc kɛ gua̱a̱thdɛ.