2 Kua̱r 18 - RUAC KUƆTH IN RƐL RƆKuäär Juda ni Ɣidh-ki-yaa ( 2 Kuɛ̈n 29:1-2 , 31:1 ) 1 Kɛ diɔ̱ɔ̱k runi ruëc Ɣo-ce-ya gat Elaa kuäär I-thɛ-rɛl, Cu Ɣidh-ki-yaa gat A-ɣadh kuäär Juda ruec tok. 2 Mëë tookɛ ruec tëë kɛ run ti jiɛn da̱ŋ rɛw wi̱cdɛ dhieec, kä cuɛ ruëc kä Jɛ-ru-tha-lɛm kɛ run ti jiɛn da̱ŋ rɛw wi̱cdɛ bäŋuan. Kä cɔalkɛ man i̱ Äbi nya Dhɛ-kar-yaa. 3 Kä cuɛ la̱t ni cuŋ nhiam Kuɔth Nhial ce̱tnikɛ tëë ca la̱t ɛ gua̱n ni Dee-bid. 4 Kä cuɛ gua̱th pali kuth guäyni woc kä cuɛ riäkni töl kɛnɛ kuoth Ac-tar-te. Kä cuɛ thɔ̱l ëë ci Muthɛ jɛ la̱t kɛ yiëëth in yian tiac, kɛ ɣöö cu ji̱ I-thɛ-rɛl ŋot wa̱ŋkɛ jɛ wal ɛn ni̱ni tɔ̱tɔ̱. Kä cɔal kɛ jɛ i̱ Nɛ-uc-tan. 5 Kä cuɛ ŋäth ni Kuoth Nhial Kuoth I-thɛ-rɛl. Kä cuɛ thil kuäär mi cu ce̱tkɛ jɛ kä kua̱r Juda tëë nhiam. 6 Kä cɛ käp ni Kuoth Nhial. Kä /kenɛ guurɛ päl, cuɛ tit ni luëëk tëë ci Kuoth Nhial kɛ la̱r Muthɛ. 7 Kä cu Kuoth Nhial tekɛ jɛ kɛɛl, gua̱thni diaal tin cɛ wä thi̱n, cuɛ buɔ̱m, kä cuɛ nyiëëny kɛ kuäär A-thi-ri-ya, kä /kenɛ jɛ lätikä. 8 Kä cuɛ ji̱ Pi-li-thɛt näk nikä Gadha cu mäni wi̱i̱kɛ, a känɛ jɛ ni raar wec cu mäni rɛy ti̱ecni. 9 Kɛ ŋuaan runi kua̱r ni Ɣidh-ki-yaa min ku la bärɔw runi ruëc Ɣo-ce-ya gat Elaa kuäär I-thɛ-rɛl, cu kuäär A-thi-ri-ya ni Cɛ̈l-mɛ̈n-ɛ-thɛr Tha-mɛ-ria ben go̱l. 10 Kä kɛ thuɔ̱k runi da̱ŋ diɔ̱k cuɛ ka̱n, kɛ bäkɛl runi kua̱r ni Ɣidh-ki-yaa min la bäŋuan runi Ɣo-ce-ya kuäär thuk duëli kuec caam. 11 Kä cu kuäär A-thi-ri-ya ji̱ I-thɛ-rɛl naŋ kä A-thi-ri-ya ala pɛ̈ɛ̈c, kä cuɛ kɛ la̱th kä Ɣɛlɛ̈, kɛnɛ Ɣa-bor, kiir Go-dhan, kɛ wi̱i̱ ji̱ Ma-day. 12 Kɛ ɣöö /ka̱n Kuoth Nhial Kuothdiɛn luɔ̱th cukɛ lo̱k ni gukdɛ, amäni tëë ca lat ɛ ja̱ŋdɛ ni Muthɛ. /Ken kɛn kɛ liŋ kä /ka̱n kɛ luɔ̱th. Dhia̱t ji̱ Thi-ri-ya kɛ ji̱ Jɛ-ru-tha-lɛm ( 2 Kuɛ̈n 32:1-19 , I-ca-yaa 36:1-22 ) 13 Kɛ wäl ŋuaan runi kua̱r ni Ɣidh-ki-yaa, cu kuäär A-thi-ri-ya ni Thɛ-nɛ̈-kɛ̈-rib wi̱i̱ Juda diaal tin buɔ̱m buɔ̱ɔ̱m ben ka̱n. 14 Kä cu Ɣidh-ki-yaa kuäär A-thi-ri-ya jäk kä raan kä La-kic i̱ “Pälä, ɣän cä duer la̱t. Kä mɔ bi thiec kä ɣä mɔ bä la̱t.” Kä cu kuäär A-thi-ri-ya da̱a̱p mi ki̱luni ti bathdɔɔr, kɛnɛ ki̱luni cikä mi bo̱r ti bathdɔɔri wäl thiec kä Ɣidh-ki-yaa kuäär Juda. 15 Kä cu Ɣidh-ki-yaa ɛ ka̱m ciɛk in bo̱r min te tɔ̱ɔ̱wä luaak Kuɔth Nhial kɛɛliw, kɛnɛ dhɔr kua̱r. 16 Ɛn guäth ɛmɔ cu Ɣidh-ki-yaa da̱a̱p in cɛ rɔth ni thiekni luaak Kuɔth Nhial kɛnɛ thiekni duëël kua̱r ka̱n, kä cuɛ kɛ jäk kä kuäär A-thi-ri-ya. 17 Kä cu kuäär A-thi-ri-ya Tar-tan, kɛnɛ Rɛ̈b-tha-rith, kɛ Rɛ̈b-ca-kee kɛɛl kɛ rɛm mi di̱i̱t kä La-kic jäk kä kuäär ni Ɣidh-ki-yaa kä Jɛ-ru-tha-lɛm. Kä cukɛ ben kä Jɛ-ru-tha-lɛm. Kä min cikɛ cop, cukɛ ben cuɔ̱ŋ wi̱i̱ puɔ̱l in di̱i̱t dup kakä raam min guic. 18 Kä min cikɛ kuäär cɔl, cu Ɛl-ya-kim gat Ɣil-ki-yaa gui̱i̱c cieŋ kɛnɛ Cɛb-naa min la bolith, kɛ bulkamiin ni Yo-ac gat A-thap ben kä kɛ. 19 Kä cu Rɛ̈b-ca-kee kɛ jiök i̱, “La̱rɛ jɛ Ɣidh-ki-yaa i̱, ‘Ci kuäär in di̱i̱t kuäär A-thi-ri-ya nɛmɛ lar. Ɛŋu mi ŋääthi? 20 Caari jɛ kɛn rieet ti̱ti̱ dëë kɛ ko̱r tɛr? Ɛŋa ŋääthi ɔ, mɔ curi gaak kɛ ɣä mɔ? 21 Kä nɛnɛ ji̱n ŋääthi ni ji̱ I-jëp, min ce̱tkɛ kɛɛt wääthä, min la ri̱el tet raam mi ci rɔ nhiɛt kɛ jɛ. Ɛ jɛn ce̱tkɛ min la kuäär I-jëp ni Pɛro jɛ a lät kä nɛy tin ci rɔ nɔ̱a̱k jɛ. 22 Duundɛ ɣöö mi wi̱i̱ ɣä jiök i̱, “Ca̱kɔ rɔ nɔ̱a̱k Kuoth Nhial Kuothda,” /ciɛ jɛn ɛn nëë ci Ɣidh-ki-yaa gua̱th pali kɛ, kɛnɛ yi̱k nikɛ däk, mëë jio̱kɛ Juda kɛnɛ Jɛ-ru-tha-lɛm i̱, “Bia pal nhiam yi̱kä mɛmɛ kä Jɛ-ru-tha-lɛm?” 23 Bër latdɛ ruac yɛnɛ kuäärä ni kuäär A-thi-ri-ya. Ɣän bä ji̱ ka̱m jio̱ŋko̱o̱ri ti bathdɔɔri rɛw, mi bi nɛy ti bi kɔt jɔkdiɛn luäŋ kɛ jek. 24 Kä deri raan kɔar kua̱rä kulɛ loc i̱di kä ji̱ kɔar kua̱r A-thi-ri-ya tin tiɛni, a bi wä ŋäth ni I-jëp kɛ kui̱ thurbiɛɛli kɛnɛ jio̱ŋko̱o̱ri? 25 Kä min dɔ̱ŋ /ciɛ ɣän ɛ nëë mäk ɛn gua̱a̱th ɛmɛ kä däk jɛ kä thilɛ riet kä Kuoth Nhial? Kä cu Kuoth Nhial ɣä jiök i̱ wër däkɛ ɛn wec ɛ mɔ.’ ” 26 Ɛ jɛn cu Ɛl-ya-kim gat Ɣil-ki-yaa, kɛnɛ Cɛb-naa, kɛ Yo-ac kɛ jiök i̱, “Ruacɛ kɛ kɔ kɛ thok A-ra-mik, kɛ ɣöö liŋ nɛy ɛ. /Cuarɛ ruac kɛ thok Juda, ba liŋ ɛ nɛy tɔ̱ te wi̱i̱ pa̱ny tɔ̱.” 27 Duundɛ ɣöö cu Rɛ̈b-ca-kee kɛ jiök i̱, “Jäk kuäärä ɣä kɛ ɣöö bä rieet ti̱ti̱ la̱t yɛ kɛ kuäärun, /cɛ ɣä jäk kä nɛy ti te nyuurä ti wi̱i̱ pa̱ny, ti ba cam ni wawdiɛn kä ba math ni cowkiɛn ce̱tkɛ yɛ ti̱?” 28 Kä cu Rɛ̈b-ca-kee lööŋ kɛ jɔw mi di̱i̱t kɛ thok ji̱ Juda i̱, “Liɛŋɛ ruac kua̱r in di̱i̱t kuäär A-thi-ri-ya! 29 Ci kuäär wee, ‘A yɛ /ca kaŋ ɛ Ɣidh-ki-yaa, kɛ ɣöö /cɛ yɛ bi luäŋ kɛ ka̱n tetkädä. 30 Kä a yɛ /cɛ jak kä ŋa̱thɛ ni Kuoth Nhial, kɛ ɣöö jio̱kɛ yɛ bi Kuoth Nhial kɔn dhil kän, kä /cɛ wec ɛmɛ bi ka̱m kuäär A-thi-ri-ya.’ 31 A yɛn /cuarɛ ruac Ɣidh-ki-yaa liŋ. Kɛ ɣöö ci kuäär A-thi-ri-ya jɛ lar i̱, ‘Bia kä ɣä banɛ mal ben lat. Kä bi ramɔ bɛl kakädɛ cu cam, kä bi ramɔ cu maath rɛy jiɛwdɛ. 32 Amäni mi cä yɛ ben naŋ muun mi ce̱tkɛ mundun, mun bɛɛl kɛnɛ liɛɛth, kɛ tuaar, kä bia cu tëk /cia bilɛ li̱w. /Cuarɛ Ɣidh-ki-yaa liŋ kɛ ɣöö bathɛ yɛ i̱ bi Kuoth Nhial kɔn luäk. 33 Tëë kɛ döör ti ci kuthkiɛn kɛ kɔŋ kän tetdä kua̱r A-thi-ri-ya? 34 Kuth ji̱ Ä-math kɛnɛ ji̱ Ar-pad a nikä? Kä ji̱ Thɛ-par-wa-yim, kɛnɛ Ɣenɛ̈, kɛ iwaa a nikä? /Cikɛ Tha-mɛ-ria kän tetkädä? 35 Ɛ kuoth indiɛn kä kuth dööri mɔ ci wecdiɛn kän ɔ tetkädä, mɔ dëë Kuoth Nhial Jɛ-ru-tha-lɛm kän tetkädä mɔ?’ ” 36 Duundɛ ɣöö cu naath biɛt /ka̱n jɛ loc kɛ riet, kɛ ɣöö ci kuäär kɛ jiök i̱, “/Cuarɛ jɛ loc.” 37 Kä cu Ɛl-ya-kim gat Ɣil-ki-yaa gui̱i̱c cieŋ, kɛnɛ Cɛb-naa in la bolith, kɛ Yowa gat A-thap min la bulkamiin ben kä Ɣidh-ki-yaa kɛ bieyni ti ci rɛ̈t kɛ jiath lɔaac, kä cukɛ jɛ la̱t ruac Rɛ̈b-ca-kee. |
Nuer Bible © Bible Society in South Sudan 1998,2012.
Bible Society in South Sudan