2 Kua̱r 16 - RUAC KUƆTH IN RƐL RƆ

Kuäär Juda ni A-ɣadh

¹ Kɛ wäl bärɔw runi ruëc Peka gat Rɛ-mɛ̈l-yaa. Cu A-ɣadh gat Yo-tham kuäär Juda ruec tok.

² Mëë tookɛ ruec tëë kɛ run ti jiɛn da̱ŋ rɛw, kä cuɛ ruëc kä Jɛ-ru-tha-lɛm kɛ run wäl bäkɛl. Kä duundɛ ɣöö/kenɛ la̱t ni mi gɔaa nhiam Kuɔth Nhial in Kuothdɛ, ce̱tkɛ mëë ca la̱t ɛ gua̱n ni Dee-bid.

³ Kä cuɛ guɔ̱ɔ̱r ni duɔ̱ɔ̱p kua̱r thuk duëli kuec caam. Kä cuɛ thöp ni gatdɛ ala muc, ce̱tnikɛ jiäk tëë la̱tkɛ ɛ döör tëë joc Kuoth Nhial kɛ raar nhiam ji̱ I-thɛ-rɛl.

⁴ Kä cuɛ muc thöp kä waaŋɛ wal tin kuɔ̱r kuɔ̱ɔ̱r gua̱thni pali kuthni guäyni kɛnɛ wuɔ̱th päämni, kɛnɛ thär jiɛn diaal tin tɔ̱ɔ̱c.

⁵ Kä cu kuäär Ä-ram ni Rɛ-dhin kɛnɛ kuäär I-thɛ-rɛl ni Peka gat Rɛ-mɛ̈l-yaa Jɛ-ru-tha-lɛm ma̱k kɛ ko̱r, kä cukɛ A-ɣadh go̱l, duundɛ ɣöö /ka̱n ɛ joc.

⁶ Ɛn guäth ɛmɔ cu Rɛ-dhin kuäär Thi-ri-ya E-lɛ̈th ka̱n. Cuɛ ji̱ Juda juɔc raar thi̱n. Kä cukɛ jɛ ciɛŋ amäni walɛ.

⁷ Kä cu A-ɣadh kuäär A-thi-ri-ya ni Tig-lath-pi-lɛ-thɛr jäk kä naath wëë i̱, “Ɛ ɣän läätdu kä gatdu. Bër luäk ɣä kä kuäär Thi-ri-ya, kɛnɛ kuäär I-thɛ-rɛl ti ca ɣä ma̱k ti̱.”

⁸ Kä cuɛ da̱a̱p kɛnɛ ciɛk in bo̱r in te luaak Kuɔth Nhial kɛnɛ dhɔr kua̱r jäk kä kuäär A-thi-ri-ya ala muc.

⁹ Kä cu kuäär A-thi-ri-ya jɛ liŋ. Cuɛ Da-math-kɛth wä ma̱k kä cuɛ jɛ käp. Cuɛ ji̱ kɛ naŋ wi̱c kä Kir ala pɛ̈ɛ̈c, kä cuɛ Rɛ-dhin näk.

¹⁰ Kä mëë ci kuäär ni A-ɣadh wä kä Da-math-kɛth wëë jëk kɛ kuäär A-thi-ri-ya ni Tig-lath-pi-lɛ-thɛr, cuɛ yi̱k in te kä Da-math-kɛth nɛn. Cuɛ bo̱o̱th palä ni U-ri-yaa jäk kä raan kɛ ta̱a̱ yi̱kä nikɛ la̱t in ca lät ni jɛ kɛɛliw.

¹¹ Kä cu bo̱o̱th palä ni U-ri-yaa yi̱k täth, ce̱tnikɛ min ca jäk kä jɛ ɛ kuäär ni A-ɣadh kä Da-math-kɛth. Kä cuɛ la̱t a /ken kuäär ni A-ɣadh luny jɔk kä Da-math-kɛth.

¹² Kä mëë ci kuäär luny jɔk kä Da-math-kɛth, cuɛ yi̱k nɛn. Kä cuɛ wä thi̱n.

¹³ Kä cuɛ mucdɛ min waŋkɛ, kɛnɛ muc bɛɛl, kɛ muc kɔaŋ, kɛ riɛm mucä nyuaakädɛ thöp wi̱i̱dɛ.

¹⁴ Kä cuɛ yi̱k yieethä min yian in te nhiam Kuɔth Nhial woc thok luaak Kuɔth, kam yi̱kädɛ kɛnɛ luak Kuɔth Nhial, kä cuɛ jɛ la̱th caam yi̱kädɛ.

¹⁵ Kä cu kuäär ni A-ɣadh ruac kɛ bo̱o̱th palä ni U-ri-yaa i̱ “Wi̱i̱ yi̱kä mi di̱i̱t ɛ mi, tho̱pni muc ruɔ̱nwaaŋ tin waŋkɛ thi̱n, kɛnɛ muc bɛɛl thiaŋ, kɛ muc kua̱r tin waŋkɛ, kɛnɛ muc bɛɛlkɛ, kɛɛl kɛ muc nɛɛni diaal tin waŋkɛ, muc bɛɛlkiɛn, kɛ muc kɔaŋnikiɛn. Kä yori riɛm mucni diaal tin waŋkɛ wi̱i̱dɛ, kɛnɛ riɛm luuri diaal. Duundɛ ɣöö yi̱k yieethä min yian ba duŋdä mi bä Kuoth thiecä thi̱n.”

¹⁶ Kä cu bo̱o̱th palä ni U-ri-yaa ti diaal ti̱ti̱ la̱t, ce̱tkɛ min ca lar ɛ kuäär ni A-ɣadh.

¹⁷ Kä cu kuäär ni A-ɣadh tuɔ̱ŋ yi̱kä kɛnɛ kuak woc puɔ̱ny yi̱kä, kä cuɛ thak, puɔkä ka̱p piny jɔk thääkni tin te pinydɛ, kä cuɛ jɛ la̱th wi̱i̱ dööli päämni.

¹⁸ Kä cuɛ duɔ̱ɔ̱p in la jäl kɛ naath kɛ cäŋ la̱t rɛy luaak kɛnɛ duɔ̱ɔ̱p kua̱r, woc luaak Kuɔth Nhial kɛ kui̱ kua̱r A-thi-ri-ya.

¹⁹ Kä cua duɔth lätni A-ɣadh diaal gɔ̱a̱r rɛy buɔk kuɛ̈ɛ̈ni kua̱ri Juda.

²⁰ Kä cu A-ɣadh li̱w, kä cua jɛ kony kɛɛl kɛnɛ gua̱ni därwec Dee-bid. Kä cu gatdɛ ni Ɣidh-ki-yaa ruëc kɛ gua̱a̱thdɛ.