2 Kua̱r 14 - RUAC KUƆTH IN RƐL RƆ

Kuäär Juda ni Ä-mä-dhi-ya

¹ Kɛ rɛw runi ruec Yɛ-ɣo-ac gat Yɛ-ɣo-a-ɣadh kuäär I-thɛ-rɛl cu Ä-mä-dhi-ya gat Yo-ac a kuäär Juda.

² Tokɛ ruec a tëë kɛ run ti jiɛn da̱ŋ rɛw wi̱cdɛ dhieec, kä cuɛ ruec kä Jɛ-ru-tha-lɛm kɛ run ti jiɛn da̱ŋ rɛw wi̱cdɛ bäŋuan. Kä cɔal man i̱ Yɛ-ɣo-a-dan kä Jɛ-ru-tha-lɛm.

³ Kä cuɛ la̱t ni gɔy waaŋ Kuɔth Nhial, ɛni ɣöö /kenɛ ce̱tkɛ gua̱n ni Dee-bid. Cɛ ti diaal la̱t ce̱tnikɛ gua̱n ni Yo-ac.

⁴ Duundɛ ɣöö /ka̱n gua̱th pali kuthni guäyni däk. Cu naath ŋot thöpkɛ muc kä waŋkɛ wal tin kuɔ̱r kuɔ̱ɔ̱r thi̱n.

⁵ Kä niɛ min ci kuäär ti̱i̱l kä jɛ cuɛ ji̱ kɔarɛ tëë na̱kɛ gua̱n näk.

⁶ Duundɛ ɣöö /kenɛ gaat nɛɛni tëë na̱kɛ, gua̱n näk, ce̱tnikɛ min ca gɔ̱r rɛy buɔk ŋuɔ̱tni Muthɛ mëë ci Kuoth Nhial ɛ lar i̱, “/Ca gua̱ni gan bi näk kɛ kui̱ gankiɛn, kä /ca gaat bi näk kɛ kui̱ gua̱ni. Duundɛ ɣöö ba ramɔ näk kɛ kui̱ dueerikɛ.”

⁷ Kä cuɛ ji̱ Ɛ-dɔm ti bathdɔɔri wäl näk lo̱o̱lä milɛ kä kä cuɛ Thɛlɛ̈ ka̱n, kä cuɛ jɛ cɔli Yɔk-theel amäni walɛ.

⁸ Kä cu Ä-mä-dhi-ya naath jäk kä Yɛ-ɣo-ac gat Yɛ-ɣo-a-ɣadh gat Yeɣu kuäär I-thɛ-rɛl wee i̱, “Bër banɛ ben nyiëëny.”

⁹ Kä cu Yɛ-ɣo-ac kuäär I-thɛ-rɛl loc i̱, “Kä Lɛ-ba-nɔn ci thil luɔr kɔn jäk kä raan kä Lɛ-ba-nɔn wee i̱, ‘Kämni nyadu gatdä ala ciekdɛ.’ Kä cu ley ben kä Lɛ-ba-nɔn cuɛ thil ben dɔany piny.

¹⁰ Kɛ ɣöö ci ji̱ Ɛ-dɔm näk, a jɛn ci rɔ cu kap nhial ɔ. A lɔcdu tɛth kɛ jucdu kɛ naath, wurɛ teni cieŋ. Ɛŋu go̱o̱ri gak ɔ mi bi nöŋ ni ji̱ da̱k yɛnɛ nɛɛku?”

¹¹ Duundɛ ɣöö /ken Ä-mä-dhi-ya jɛ liŋ. Inɔ cu Yɛ-ɣo-ac kuäär thuk duëli kuec caam ben nyiëëny kɛnɛ Ä-mä-dhi-ya kuäär Juda kä Beth-cɛ-mɛc wec ji̱ Juda.

¹² Kä cua ji̱ Juda joc ɛ ji̱ thuk duëli kuec caam, kä cu ramɔ rɔ bar dhɔrɛ.

¹³ Kä cu kuäär I-thɛ-rɛl ni Yɛ-ɣo-ac Ä-mä-dhi-ya gat Yo-ac gat Ä-ɣɛ̈dh-yaa kuäär Juda Beth-cɛ-mɛc käp. Kä cuɛ ben kä Jɛ-ru-tha-lɛm, cuɛ pänydɛ mi jua̱th tetni in tëë ti kur ŋuaan däk, a känɛ ni thok rɛ̈ɛ̈k Ɛ-pa-rim cu mäni thok gɔŋtɔtdä.

¹⁴ Kä cuɛ da̱a̱pni diaal kɛnɛ ciɛk in bo̱r ka̱n, kɛ kuak diaal tin cɛ jek rɛy luaak Kuɔth Nhial kɛnɛ duel kua̱r, kä cuɛ naath käp bä kä cuɛ loc kä Tha-mɛ-ria.

¹⁵ Kä cua duɔth lätni Yɛ-ɣo-ac gɔ̱a̱r rɛy buɔk kuɛ̈ɛ̈ni kua̱ri I-thɛ-rɛl.

¹⁶ Kä cuɛ li̱w, kä cua jɛ kony kä Tha-mɛ-ria kɛɛl kɛ kua̱r I-thɛ-rɛl. Kä cu gatdɛ ni Ya-rɔ-baam ruec kɛ gua̱a̱thdɛ.

Lia̱a̱ kua̱r Juda ni Ä-mä-dhi-ya

¹⁷ Kä cu kuäär Juda ni Ä-mä-dhi-ya gat Yo-ac lɔ̱ tëk kɛ run wäl dhieec kɛ kɔr li̱eth Yɛ-ɣo-ac gat Yɛ-ɣo-a-ɣadh kuäär thuk duëli kuec caam.

¹⁸ Kä cua duɔth lätni Ä-mä-dhi-ya gɔ̱a̱r rɛy buɔk kuɛ̈ɛ̈ni kua̱ri Juda.

¹⁹ Kä cua Ä-mä-dhi-ya moc ca̱p mi görkɛ näkdɛ thi̱n kä Jɛ-ru-tha-lɛm, kä cuɛ rɔ bar kä La-kic. Duundɛ ɣöö cua naath lɔ̱ jäk kä kɔrɛ kä cua jɛ wä näk ɛn wi̱ni.

²⁰ Kä cua jɛ nööŋ kɛ jio̱o̱k tuɔ̱ruɔ̱k. Kä cua jɛ ben kony kä Jɛ-ru-tha-lɛm kɛɛl kɛ gua̱ni därwec Dee-bid.

²¹ Kä cu ji̱ Juda diaal gat ni Ä-dhar-yaa jak kä kuäär kɛ gua̱a̱thdɛ a tëë run wäl bäkɛl.

²² Kä cuɛ E-lɛ̈th täth, kä cuɛ luɔ̱c kä Juda kɛ kɔr li̱eth gua̱n.

Kuäär I-thɛ-rɛl ni Ya-rɔ-baam in rɛwdɛ

²³ Kɛ wäl dhieec runi ruëc Ä-mä-dhi-ya gat Yo-ac kuäär Juda, cu Ya-rɔ-baam gat Yɛ-ɣo-ac a kuäär I-thɛ-rɛl, kä Tha-mɛ-ria. Kä cuɛ ruec kɛ run ti jiɛn ŋuaan wi̱cdɛ kɛl.

²⁴ Kä cuɛ la̱t ni jiäk waaŋ Kuɔth Nhial. Kä /kenɛ duɔ̱ɔ̱p Ya-rɔ-baam gat Nɛ-bat päl, mëë jak I-thɛ-rɛl kä dui̱r.

²⁵ Kä cuɛ key I-thɛ-rɛl luɔc jɔk ni cothä nath kä Lɛbo-ɣä-mat aräth ni baar Ä-ra-ba, ce̱tnikɛ ruac Kuɔth Nhial Kuoth I-thɛ-rɛl, mëë cɛ lat kɛ thok jäŋädɛ ni Jona gat Ä-mi-tay min gök, raan Gɛ̈th-ɣe-pɛr.

²⁶ Kɛ ɣöö ci Kuoth Nhial riɛk I-thɛ-rɛl nɛn cɛ bɛ̈c ɛlɔ̱ŋ, thilɛ ram mi ci duɔth kä di̱eel wec kiɛ ja̱ŋ, kä thilɛ mi bi I-thɛ-rɛl luäk.

²⁷ Duundɛ ɣöö /ken Kuoth Nhial ɛ lar i̱ bi kɛk I-thɛ-rɛl bath wi̱i̱ muɔ̱ɔ̱n. Inɔ cuɛ kɛ kän kɛ Ya-rɔ-baam gat Yɛ-ɣo-ac.

²⁸ Kä cua duɔth lätni Ya-rɔ-baam gɔ̱a̱r rɛy buɔk kuɛ̈ɛ̈ni kua̱ri I-thɛ-rɛl.

²⁹ Kä cuɛ li̱w, kä cua jɛ kony kɛɛl kɛ kua̱r I-thɛ-rɛl. Kä cu gatdɛ ni Dhɛ-kar-yaa ruëc kɛ gua̱a̱thdɛ.