2 Kua̱r 13 - RUAC KUƆTH IN RƐL RƆ

Kuäär I-thɛ-rɛl ni Yɛ-ɣo-a-ɣadh

¹ Kɛ run ruëc Yo-ac gat Ä-ɣɛ̈dh-yaa kuäär Juda ti jiɛn da̱ŋ rɛw wi̱cdɛ diɔ̱k, cu Yɛ-ɣo-a-ɣadh gat Yeɣu a kuäär I-thɛ-rɛl kä Tha-mɛ-ria, kä cuɛ ruëc kɛ run wäl bärɔw.

² Kä cuɛ la̱t ni jiäk waaŋ Kuɔth Nhial, cuɛ guɔ̱ɔ̱r ni dueer Ya-rɔ-baam gat Nɛ-bat mëë jak I-thɛ-rɛl kä dui̱r. /Kenɛ kɛ päl.

³ Kä cu Kuɔth Nhial kɛ̈c kɛ I-thɛ-rɛl, kä cuɛ kɛ la̱th tetdä kua̱r Thi-ri-ya ni Ɣä-dha-el kɛnɛ tet Bɛn-a-dad gat Ɣä-dha-el.

⁴ Kä cu Yɛ-ɣo-a-ɣadh Kuoth Nhial pal, kä cu Kuoth jɛ liŋ. Kɛ ɣöö cɛ riɛk I-thɛ-rɛl nɛn, min ca lät kä kɛ ɛ kuäär Thi-ri-ya.

⁵ (Kɛ kui̱c ɛmɔ cu Kuoth Nhial I-thɛ-rɛl moc kɛ kään, kä cukɛ rɔ bar tetni ji̱ Thi-ri-ya. Kä cukɛ cieŋ dho̱rikiɛn ce̱tkɛ ta̱a̱ ëë wen.

⁶ Kä /kenkɛ duer dhɔaar Ya-rɔ-baam päl, mëë ci I-thɛ-rɛl jak kä dui̱r, kä cukɛ guɔ̱ɔ̱r nikɛ. Kä cu puɔ̱ny Ac-tar-te ŋot cuŋä kä Tha-mɛ-ria bä.)

⁷ Kä cuɛ thil rɛm mi di̱i̱t mi cu duɔth kä rɛm Yɛ-ɣo-a-ɣadh, cu duɔth ni jio̱ŋko̱o̱ri ti jiɛn dhieec, kɛ thurbiɛɛli da̱ŋ wäl, kɛ rɛm mi̱ bathdɔɔri wäl. Kɛ ɣöö ci kuäär Thi-ri-ya duɔthkiɛn nor ce̱tnikɛ tup döör.

⁸ Kä cua duɔth lätni Yɛ-ɣo-a-ɣadh gɔ̱a̱r rɛy buɔk kuɛ̈ɛ̈ni kua̱ri I-thɛ-rɛl.

⁹ Kä cuɛ li̱w, kä cua jɛ kony kä Tha-mɛ-ria. Kä cu gatdɛ ni Yo-ac ruec kɛ gua̱a̱thdɛ.

Kuäär I-thɛ-rɛl ni Yɛ-ɣo-ac

¹⁰ Kɛ run ruec Yo-ac kuäär Juda ti jiɛn diɔ̱k wi̱cdɛ bärɔw, cu Yɛ-ɣo-ac gat Yɛ-ɣo-a-ɣadh a kuäär I-thɛ-rɛl kä Tha-mɛ-ria, kä cuɛ ruec kɛ run bäkɛl.

¹¹ Kä cuɛ la̱t ni jiäk bä waaŋ Kuɔth Nhial. /Kenɛ dueer Ya-rɔ-baam gat Nɛ-bat päl, tëë cɛ I-thɛ-rɛl jak kä dui̱r, cuɛ guɔ̱ɔ̱r nikɛ.

¹² Kä cua duɔth lätni Yɛ-ɣo-ac gɔ̱a̱r rɛy buɔk kuɛ̈ɛ̈ni kua̱ri I-thɛ-rɛl.

¹³ Kä cu Yɛ-ɣo-ac li̱w, kä cu Ya-rɔ-baam kuäärɛ ka̱n. Kä cua Yɛ-ɣo-ac kony kɛɛl kɛ kua̱r I-thɛ-rɛl.

Ruac Ɛ-li-cä in Jɔak kɛnɛ lia̱a̱dɛ

¹⁴ Kä mëë ci Ɛ-li-cä tekɛ juey mi bi jɛ näk, cu Yɛ-ɣo-ac kuäär I-thɛ-rɛl wä kä jɛ. Kä cuɛ wä nhiamdɛ i̱, “Gua̱di̱n! Bum ni ji̱n kä thurbiɛɛli I-thɛ-rɛl kɛnɛ jio̱ŋko̱o̱rikɛ!”

¹⁵ Kä cu Ɛ-li-cä jɛ jiök i̱, “Käni bäär kɛnɛ dɔwdɛ.” Kä cuɛ kɛ ka̱n.

¹⁶ Kä cu Ɛ-li-cä jɛ jiök i̱, “Läth ni dɔwdɛ thi̱n.” Kä cuɛ dɔwdɛ la̱th thi̱n. Kä cu Ɛ-li-cä tetdɛ la̱th jɔk tetni kua̱r.

¹⁷ Kä cuɛ kuäär jiök i̱, “Lɛp wernyin kuec känyä ca̱ŋ.” Kä cuɛ jɛ lɛp. Kä cu Ɛ-li-cä wee, “Yori jɛ.” Kä cuɛ jɛ yuɔr. Kä cu Ɛ-li-cä wee, “Ɛ bäär jucä Kuɔth Nhial, ɛ bäär jucä Thi-ri-ya! Kɛ ɣöö bi nyiëëny kɛ Thi-ri-ya kä Ä-pek amäni mi cikɛ Thum.”

¹⁸ Kä cuɛ kuäär jiök i̱, “Käni bääri.” Kä cuɛ kɛ ka̱n. Kä cuɛ kuäär I-thɛ-rɛl jiök i̱, “Duäc piny kɛ kɛ.” Cuɛ piny duäc kä diɔ̱ɔ̱k kä cuɛ cu päl.

¹⁹ Kä cu raan Kuɔth gaak kɛ jɛ, wee i̱, “Deri jɛ duäc nikä dhieec kiɛ kä bäkɛl. Kɛ ɣöö deri Thi-ri-ya däk amäni mi ciɛ thum, kä täämɛ biɛ däk kä diɔ̱ɔ̱k kärɔ.”

²⁰ Kä cu Ɛ-li-cä li̱w, kä cukɛ jɛ kony. Kä täämɛ tëë kɛ buɔ̱n ji̱ Mo-ab la mun ben a mackɛ kɛ ruel.

²¹ Kɛ cäŋ kɛl tëë kɛ ji̱ I-thɛ-rɛl ti kuɔnykɛ raan, cu buɔ̱n kɛ pärikä kä cua raan yuɔr kɔ̱k Ɛ-li-cä. Kä niɛ min cɛ cɔ̱w Ɛ-li-cä nyɔt, cuɛ tëk a bɛ cuɔ̱ŋ nikɛ ciökɛ.

Ko̱r kam I-thɛ-rɛl kɛnɛ Thi-ri-ya

²² Kä täämɛ cu Ɣä-dha-el kuäär Thi-ri-ya I-thɛ-rɛl ciɛŋ a jiäk kɛ ni̱n Yɛ-ɣo-a-ɣadh diaal.

²³ Duundɛ ɣöö te Kuoth Nhial kɛ nhök kɛnɛ pälikä kɛ kɛ, kä cuɛ kɛ luäk kɛ kui̱ matdä ruacdɛ kɛnɛ A-bɛ-ram kɛ Ay-dhɛk kɛ Je-kɔb, amäni walɛ /cɛ dëë nhɔk ɛn ɣöö bɛ kɛ däk kiɛ bɛ kɛ tuk nhiamdɛ.

²⁴ Kä min ci Ɣä-dha-el kuäär Thi-ri-ya li̱w, cu gatdɛ ni Bɛn-a-dad ruec kɛ gua̱a̱thdɛ.

²⁵ Kä cu Yɛ-ɣo-ac gat Yɛ-ɣo-a-ɣadh wi̱i̱ tëë ci Bɛn-a-dad gat Ɣä-dha-el kɛ ka̱n kä gua̱n ni Yɛ-ɣo-a-ɣadh kɛ ko̱r luɔ̱c jɔk. Kä diɔ̱ɔ̱k cu Yɛ-ɣo-ac Bɛn-a-dad joc kä cuɛ wi̱i̱ I-thɛ-rɛl nyɔk kɛ käni.