2 Kua̱r 12 - RUAC KUƆTH IN RƐL RƆ

Kuäär Juda ni Yo-ac

¹ Kɛ bärɔw runi ruec Yeɣu, cu Yo-ac a kuäär, kä cuɛ ruëc kɛ run ti jiɛn ŋuan kä Jɛ-ru-tha-lɛm. Kä cɔal kɛ man i̱ Dhiba kä Ber-cɛ-ba.

² Kä cu Yo-ac la̱t ni gɔy nhiam Kuɔth Nhial kɛ ni̱nkɛ diaal, kɛ ɣöö ca la̱t ruac ɛ Yɛ-ɣo-ya-da.

³ Kä duundɛ ɣöö /ka̱n gua̱th pali kuɔth Baal däk. Cu naath ŋot thöpkɛ muc, kä waŋkɛ wal tin kuɔ̱r kuɔ̱ɔ̱r thi̱n.

⁴ Kä cu Yo-ac bööth palä jiök i̱, “Matdɛ yio̱w ŋɔaani diaal tin ca lɛy tin ca nööŋ luaak Kuɔth Nhial, kɛnɛ tin matkɛ kuenä nath, kɛnɛ tin ŋuɔ̱nkɛ kɛ ya̱c, kɛ muc tɛthä lɔaac ran kɛ kui̱ luak Kuɔth Nhial.

⁵ A bo̱o̱th palä mɔ rɔ moc kä nyinkɛ. Akɛ buɔtkɛ luak Kuɔth Nhial gua̱th tɔ̱ görkɛ botni tɔ̱.”

⁶ Kä kɛ jiɛn da̱ŋ rɛw wi̱cdɛ diɔ̱k runi kua̱r ni Yo-ac cuɛ thil mi ca la̱t rɛy luaak Kuɔth Nhial ɛ bööth palä.

⁷ Kɛ kui̱c ɛmɔ cu kuäär ni Yo-ac bo̱o̱th palä ni Yɛ-ɣo-ya-da cɔl kɛnɛ bööth tin kɔ̱ŋ kä cuɛ kɛ jiök i̱, “Ɛŋu /ken yɛn luak buɔt ɔ? Kɛ kui̱c ɛmɔ /cuarɛ yio̱w ti kɔ̱ŋ kän kä nyinkun, thöpɛ kɛ kɛ kui̱ botni luaak.”

⁸ Kä cu bo̱o̱th palä jɛ nhɔk ɛn ɣöö thilɛ yio̱w ti ba ka̱n kä naath, kä /ca luak bi lɛ bany.

⁹ Kä cu Yɛ-ɣo-ya-da bo̱o̱th palä thanduk ka̱n kä cuɛ kuumdɛ wuth, kä cuɛ jɛ la̱th gekä yi̱kä kui̱c cuëëc mi wi̱i̱ rɛy luak Kuɔth Nhial. Kä cu bööth palä tin guic thok luaak yio̱w diaal tin ca nööŋ luaak Kuɔth Nhial tɔ̱w rɛy thandukä.

¹⁰ Kä mɔ cikɛ jɛ ŋa̱c ɔ i̱ ci thanduk tekɛ yio̱w ti ŋuan, la bulkamiini kua̱r kɛ bo̱o̱th palä min di̱i̱t yio̱w ben a kuɛɛn, kä ba yio̱w tin ca jek rɛy luaak Kuɔth Nhial yian kä bakɛ la̱th rɛy ki̱thni.

¹¹ Kä la kɛ a ka̱mkɛ nɛy tin guɛckɛ la̱a̱t luaak Kuɔth Nhial. Kä bakɛ wä ka̱m ŋa̱a̱t jiɛn, kɛnɛ ta̱a̱th tin lät rɛy luak Kuɔth Nhial.

¹² Kɛ kuëëc päämni kɛnɛ ta̱th pa̱nyni, kɛ ɣöö bakɛ kɔk jiɛn, kɛnɛ pääm ti ba bany luak Kuɔth Nhial, kɛnɛ tin diaal tin la̱tkɛ go̱lä.

¹³ Kä kɛn yio̱w tin ca nööŋ rɛy luaak Kuɔth Nhial /ka̱n kɛ kɔk ni li̱eeri cikä min bo̱r, took, kaaŋni, kiɛ kuak dääpä.

¹⁴ Kä cua ka̱m nikɛ nɛy tin banykɛ luak Kuɔth Nhial.

¹⁵ Kä /ken kɛ nɛy tin ca ka̱m yio̱w kɛ ɣöö bikɛ kɛ ka̱m la̱a̱t diw kɛ ɣöö lätkɛ ni luthä.

¹⁶ Kä /ka̱n yio̱w cutdä kɛnɛ yio̱w dui̱rä nööŋ luaak Kuɔth Nhial. Kɛ nyin bööthni palä.

¹⁷ Ɛn guäth ɛmɔ cu kuäär Thi-ri-ya ni Ɣä-dha-el wä nyiëëny kɛ Gɛ̈th, kä cuɛ ka̱n. Duundɛ ɣöö min cɛ wee bɛ wä nyiëëny kɛ Jɛ-ru-tha-lɛm,

¹⁸ cu Yo-ac kuäär Juda muc diaal tëë ci gua̱ni ni Yo-ca-pat, kɛnɛ Yo-ram, kɛ Ä-ɣɛ̈dh-yaa kua̱r Juda kɛ lɛy kɛ muckɛ, nikɛ da̱a̱p kɛɛliw min te rɛy luaak Kuɔth Nhial kɛnɛ duel kua̱r ka̱n. Kä cuɛ kɛ jäk kä Ɣä-dha-el kuäär Thi-ri-ya. Kä cu Ɣä-dha-el rɔ ri̱t kä Jɛ-ru-tha-lɛm.

¹⁹ Kä cua duɔth lätni Yo-ac gɔ̱a̱r rɛy buɔk kuɛ̈ɛ̈ni kua̱ri Juda.

²⁰ Kä cu ji̱ kɔarɛ jɛ ca̱p mi jiäk kä cua jɛ näk duëël in ca la̱t gekä duɔ̱ɔ̱p in wä piny kä Thila.

²¹ Kä cua jɛ näk ɛ ji̱ kɔarɛ ni Yo-dha-kar gat Cim-ath kɛnɛ Yɛ-ɣo-dha-bad gat Co-mer kä cukɛ jɛ kony kɛɛl kɛnɛ gua̱ni däärwec Dee-bid. Kä cu gatdɛ ni Ä-mä-dhi-ya ruec kɛ gua̱a̱thdɛ.