2 Kua̱r 11 - RUAC KUƆTH IN RƐL RƆ

Kuäär ciek Juda ni Ä-thɛ̈l-yaa

¹ Kä mëë ci Ä-thɛ̈l-yaa man Ä-ɣɛ̈dh-yaa gatdɛ nɛn cɛ li̱w, cuɛ dho̱r kua̱ri diaal däk.

² Duundɛ ɣöö cu Yɛ-ɣo-cɛ-ba nya kua̱r ni Yo-ram, nyiman Ä-ɣɛ̈dh-yaa Yo-ac gat Ä-ɣɛ̈dh-yaa ka̱n rɛy gan kua̱r tin görkɛ näkdiɛn. Cuɛ jɛ ka̱n kɛnɛ ro̱o̱mdɛ cuɛ kɛ tɔ̱w duëël tɔ̱ɔ̱cä nhial kä Ä-thɛ̈l-yaa, cuɛ cu kään /ka̱n jɛ näk.

³ Kä cu te tɔ̱ɔ̱wä kɛɛl jɛ kɛ run bäkɛl rɛy luaak Kuɔth Nhial, guäth ëë ruac Ä-thɛ̈l-yaa wec.

⁴ Kä kɛ bärɔw runi cu Yɛ-ɣo-ya-da bööth ga̱a̱ŋni cɔl, kä cukɛ ben kä jɛ luaak Kuɔth Nhial. Kä cuɛ ruac mat kɛ kɛ, kä cuɛ kɛ jak kä yac kɛ rɔ rɛy luaak Kuɔth Nhial, kä cuɛ kɛ nyuɔ̱th gat kua̱r.

⁵ Kä cuɛ kɛ jiök i̱, “Nɛmɛ ɛ min bia la̱t. Kä yɛn diɔ̱ɔ̱k bunä tin bi wä lät kɛ cäŋ lɔ̱ŋä, bi tha̱a̱ŋkun dhɔr kua̱r gaŋ.

⁶ (Kä bi duɔthkun te thok kal kä bi tin kɔ̱ŋ te thok in te jɔk ga̱a̱ŋni) bia dhɔr kua̱r gaŋ.

⁷ Kä yɛn bua̱a̱n da̱ŋ rɛw tin kɔ̱ŋ tin /cia̱ lät kɛ cäŋ lɔ̱ŋä bia luak Kuɔth Nhial ga̱ŋ kuäär.

⁸ Bia kuäär go̱l kä te ram ɔ yio̱o̱yɛ tetkädɛ. Kä mi ram mi wä ben puɔ̱nydun na̱kɛ jɛ. Ta̱yɛ kɛɛl kɛ kuäär gua̱thni tin wëë thi̱n.”

⁹ Kä cu bööth ɛ la̱t ce̱tnikɛ min ci Yɛ-ɣo-ya-da bo̱o̱th palä jɛ lar, kä cu ramɔ nɛɛkɛ tin /ci wä lät kɛnɛ tin wä lät kɛ cäŋ lɔ̱ŋä nööŋ, kä cukɛ ben kä bo̱o̱th palä ni Yɛ-ɣo-ya-da.

¹⁰ Kä cu bo̱o̱th palä kɛ ka̱m yio̱w kɛnɛ köötni tëë la nyin kua̱r ni Dee-bid, tëë te luaak Kuɔth Nhial.

¹¹ Kä cu ga̱a̱ŋ cuɔ̱ŋ te ramɔ yio̱o̱kɛ tetädɛ, a känɛ ni cuëëc luaak cu mäni cam luaak, göl yi̱k kɛnɛ duel.

¹² Kä cuɛ gat kua̱r nööŋ raar, kä cuɛ kum kuäärä la̱th wi̱cdɛ, kä cuɛ jɛ ka̱m bok ŋuɔ̱t ni. Kä cukɛ jɛ jak kä kuäär, cukɛ tetkiɛn pat kä wäkɛ i̱ “Bikɛ kuääri jääny tëkdu!”

¹³ Kä min ci Ä-thɛ̈l-yaa rɔal ga̱a̱ŋni kɛnɛ naath liŋ, cuɛ wä luaak Kuɔth Nhial kä naath.

¹⁴ Kä min cɛ guic cuɛ kuäär nɛn cuŋä gekä thi̱er ɛ, ce̱tkɛ ŋuɔ̱t, kä te bööth kɛnɛ kuɔ̱th kaaŋni gekä kua̱r, kä ji̱ wec diaal ŋarkɛ kä kuɔthkɛ kaaŋni. Kä cu Ä-thɛ̈l-yaa bi̱i̱dɛ rɛ̈t kä cuɛ wee i̱, “Ɛ ca̱p mi jiäk! Ɛ ca̱p mi jiäk!”

¹⁵ Kä cu Yɛ-ɣo-ya-da bo̱o̱th palä bööth rɛmni jiök i̱, “Ka̱mɛ jɛ raar kam bëëri. Kä na̱kɛ jɛ kɛnɛ ji̱ kɔarɛ.” Kä cu bo̱o̱th palä wee, “/Cuarɛ jɛ näk luaak Kuɔth Nhial.”

¹⁶ Kä cukɛ jɛ käp, kä min cɛ cop guäth jio̱ŋko̱o̱rikɛ gekä dhɔaar kua̱r, cua jɛ näk ɛn wi̱ni.

Riali Yɛ-ɣo-ya-da kɛ pali Juda ikä

¹⁷ Kä cu Yɛ-ɣo-ya-da mat ruac lat kam Kuɔth Nhial kɛnɛ kuäär kɛ naath, kɛ ɣöö bi ka nɛɛ Kuɔth Nhial. Kä cuɛ mat ruac lat bä kam kua̱r kɛnɛ naath.

¹⁸ Kä cu nɛy diaal wä duëël kuɔth Baal, kä cua jɛ da̱k piny. Cua yi̱kdɛ kɛnɛ puɔ̱nydɛ tiëëth ni ŋëëtni, kä cukɛ bo̱o̱th palä kuɔth Baal ni Ma-tan näk nhiam yi̱kni. Kä cu Yɛ-ɣo-ya-da bo̱o̱th palä thok luaak Kuɔth Nhial moc ga̱a̱ŋ.

¹⁹ Kä cuɛ bööth kɛnɛ ga̱a̱ŋ kɛ ji̱ wec diaal naŋ. Kä cua kuäär wä nööŋ luaak Kuɔth Nhial bäkɛ kɛ thok ga̱a̱ŋni naŋkɛ jɛ duëël kua̱r. Kä cuɛ nyuur wi̱i̱ kɔam kuäärä.

²⁰ Kä cu nɛy diaal lo̱ckiɛn tɛɛth. Kä cu wec rɔ pa̱l piny mëë ca Ä-thɛ̈l-yaa näk dhɔr kua̱r.

²¹ Cu Yo-ac a Kuäär a tëë run bärɔw.