2 Kua̱r 10 - RUAC KUƆTH IN RƐL RƆ

Näk Yeɣu kɛ ji̱ dhɔaar Ɛ̈-ɣab

¹ Täämɛ te Ɛ̈-ɣab kɛ gaat ti jiɛn bärɔw kä Tha-mɛ-ria. Kä cu Yeɣu warɛgakni gɔ̱a̱r, kä cuɛ kɛ jäk kä Tha-mɛ-ria jäkɛ kɛ kä Yidh-rɛɛl, kɛnɛ bööth, kɛ ga̱a̱ŋ gan Ɛ̈-ɣab, wee i̱,

² “Niɛ mɔ bia warɛgakni ti̱ti̱ jekɔ, min ta̱yɛ kɛɛl kɛ gaat kua̱run kä ta̱yɛ kɛ thurbiɛɛlikun, kɛ wi̱i̱ ti buɔ̱m buɔ̱ɔ̱m, kɛ mac,

³ kuanyɛ ram in gɔaa ni jɛn kä gaat kua̱run, kä la̱thɛ jɛ gua̱a̱th gua̱n. Kä nyiëënyɛ kɛ dhɔr kua̱run.”

⁴ Duundɛ ɣöö cukɛ dual ɛlɔ̱ŋ, kä cukɛ wee, “Nɛ̈nɛ jɛ /ken kua̱r rɛw ɛ luäŋ i̱ bikɛ cuɔ̱ŋ nhiamdɛ. Banɛ ku lɛ cuɔ̱ŋ i̱di?”

⁵ Kä cu nɛy tin guɛckɛ duel kua̱r kɛnɛ bööth, kɛ ga̱a̱ŋ gan Ɛ̈-ɣab rɔ̱ mat, kä cukɛ Yeɣu jäk kä raan wäkɛ i̱, “Kɛ kɔn ji̱ kɔaaru, kä ba̱kɔ tin diaal tin bi la̱rkɔ la̱t. Thilɛ ram kɛl mi ba̱kɔ jak kä kuäär. Lätni ni mɔ gɔaa waaŋdu mɔ.”

⁶ Kä cuɛ kɛ gɔ̱a̱r warɛgak in rɛwdɛ wee i̱, “Mi te yɛn kui̱dä, kä bia ɣä luɔ̱th, ŋuɔ̱kɛ wuɔ̱th gan kua̱run, kä nöŋɛ kɛ ɣä kɛ gua̱a̱th mi ce̱tkɛ nɛmɛ iruun kä Yidh-rɛɛl.” Kä täämɛ gaat kua̱r kɛ jiɛn bärɔw cieŋkɛ kɛɛl kɛ bööth wec, tin rɔmkɛ.

⁷ Kä min ci warɛgak cop kä kɛ, cukɛ gaat kua̱r ti jiɛn bärɔw näk. Kä cukɛ wuɔ̱thkiɛn la̱th rɛy diëny cua kɛ jäk kä Yeɣu kä Yidh-rɛɛl.

⁸ Kä min ci ja̱a̱k ɛ ben la̱r jɛ i̱, “Ci nɛy wuɔ̱th gan kua̱r nööŋ,” cuɛ wee, “La̱thɛ kɛ kä bun da̱ŋ rɛw thok wec amäni runwaŋ.”

⁹ Kä min cɛ wä raar kɛ runwaŋ. Cuɛ cuɔ̱ŋ kä cuɛ nɛy diaal jiök i̱, “Thilɛ mi ŋäc yɛn ɛ. Ɛ ɣän ɛ nëë cäp kuäärä kä mi jiäk, kä cua̱ jɛ näk. Kä ɛŋa näk kɛn nɛy ti diaal ti̱ti̱ mɔ?

¹⁰ Kä ŋa̱cɛ jɛ ɛn ɣöö thilɛ ruac mi ci Kuoth Nhial ɛ lar kä /cɛ bia̱ thuɔ̱k kɛ kui̱ dhɔaar Ɛ̈-ɣab. Kɛ ɣöö ci Kuoth Nhial mëë cɛ lat kɛ ja̱ŋdɛ ni Ɛ-li-cä la̱t.”

¹¹ Kä cu Yeɣu tëë ci duɔth dhɔr Ɛ̈-ɣab kä Yidh-rɛɛl näk, nɛɛkɛ diaal tin bum, kɛnɛ mäthnikɛ tin ŋäcɛ, kɛ bööth palä, amäni mëë cuɛ thil mi ci duɔth.

Näk ji̱ maarä kua̱r ni Ä-ɣɛ̈dh-yaa

¹² Kä cu Yeɣu wä kä Tha-mɛ-ria. Kä min cɛ cop guäth in la yieen deet a mät thi̱n.

¹³ Cuɛ röm kɛ ji̱ maarä Ä-ɣɛ̈dh-yaa kuäär Juda, kä cuɛ kɛ thiec i̱, “Kɛ yɛn ŋaani?” Kä cukɛ jɛ loc i̱, “Kɛ kɔn ji̱ maarä Ä-ɣɛ̈dh-yaa, bä nɛy ben gui̱l ni ji̱ dhɔaar kua̱r kɛnɛ man ciek in kuäär.”

¹⁴ Kä cu Yeɣu wee, “Naŋɛ kɛ a tëk.” Kä cukɛ kɛ naŋ a tëk, kä cukɛ kɛ näk puul Beth-ekɛd. Nɛy ti jiɛn ŋuaan wi̱cdɛ rɛw cua kɛ näk ni kɛn diaal.

Näk duɔthni ji̱ maarä Ɛ̈-ɣab diaal

¹⁵ Kä min cɛ jiɛn ɛ wi̱ni cuɛ röm kɛ Yɛ-ɣo-na-dab gat Re-kab bëë jɛ ben lor. Kä cuɛ jɛ lät kä malɛ, kä cuɛ jɛ jiök i̱, “Te lɔcdu kɛɛl kɛ ɣä, ce̱tkɛ mi te lɔcdä kɛɛl kɛ ji̱ mi?” Kä cu Yɛ-ɣo-na-dab ɛ loc i̱, “Tëë nɔ.” Kä cu Yeɣu wee, “Kä mi tëë nɔ, kä jëk nɛ.” Kä cukɛ jëk. Kä cu Yeɣu jɛ naŋ rɛy thurbiɛɛl kɛɛl kɛ jɛ.

¹⁶ Kä cuɛ jiök, “Wanɛ kɛɛl, guic di̱t lɔacdä kɛ Kuoth Nhial.” Kä cukɛ kɔt kɛɛl rɛy thurbiɛɛlɛ.

¹⁷ Kä min cɛ cop kä Tha-mɛ-ria cuɛ duɔth ji̱ maarä Ɛ̈-ɣab kä Tha-mɛ-ria diaal näk, cuɛ kɛ thum, ce̱tnikɛ ruac Kuɔth Nhial ëë latdɛ kɛ ja̱ŋdɛ ni Ɛ-li-cä.

Näk nɛɛni tin palkɛ kuoth Baal

¹⁸ Kä cu Yeɣu nɛy diaal dol, kä cuɛ kɛ jiök i̱, “Ɛ̈-ɣab cɛ kuoth Baal pal kä mi tɔt. Duundɛ ɣöö ɣän bä pal ɛlɔ̱ŋ.

¹⁹ Kɛ kui̱c ɛmɔ täämɛ ciölɛ ɣä go̱o̱k kuɔth Baal, kɛ pa̱a̱lkɛ diaal, kɛ bööth palädɛ diaal. A thil ram mi te jɔ̱ɔ̱r kɛ ɣöö bä kuoth Baal thöp muc mi di̱i̱t. Kä ram wä te jɔ̱ɔ̱r /cɛ bi tëk.” Lät Yeɣu nɔmɔ kɛ ca̱p kɛ ɣöö bɛ pa̱a̱l kuɔth Baal näk.

²⁰ Kä cuɛ wee, “Cɔalɛ duɔl palä kɛ kui̱ kuɔth Baal.” Kä cukɛ jɛ cɔl.

²¹ Kä cu Yeɣu ji̱ I-thɛ-rɛl diaal jäk kä naath. Kä cu pa̱a̱l kuɔth Baal diaal ben. Kä cukɛ wä duëël kuɔth Baal, kä cu duel thia̱a̱ŋ kui̱cɔ kɛnɛ kui̱c ɔ.

²² Kä cuɛ bööth palä min lät bieyni rɛy duëël jiök i̱, “No̱o̱ŋni bieyni raar kɛ kui̱ nɛɛni diaal tin palkɛ Baal.” Kä cuɛ kɛ nöŋ bieyni.

²³ Kä cu Yeɣu wä rɛy duëël kuɔth Baal kɛnɛ Yɛ-ɣo-na-dab gat Re-kab. Kä cuɛ pa̱a̱l kuɔth Baal jiök i̱, “Go̱rɛ rɛydun mi thilɛ raan Kuɔth Nhial mia̱a̱ rɛydun, a te ni pa̱a̱l kuɔth Baal thi̱n nikä rɔ.”

²⁴ Kä cukɛ wä rɛc waa muc thöp kɛnɛ muc tin waŋkɛ. Kä täämɛ Yeɣu cɛ nɛy ti jiɛn bädäk la̱th raar, kä cɛ kɛ jiök i̱ “Mi wä raan raan päl kä yɛ a /cɛ näk kä nɛy ti cä la̱th tetnikun ti̱, ba jɛ näk.”

²⁵ Kä niɛ min cɛ thuɔ̱k kɛ thöp mucni kɛnɛ muc tin waŋkɛ, cuɛ yiëën kɛnɛ ji̱ kɔarɛ jiök i̱, “Wiaa rɛc na̱kɛ kɛ. A thil ram mi bar rɔ.” Kä min cikɛ thuɔ̱k kɛ näkdiɛn, cukɛ kɛ yuɔr raar kä cukɛ wä duëël rɛci duëël kuɔth Baal.

²⁶ Kä cukɛ puɔ̱ny in te rɛci duëël kuɔth Baal nööŋ raar kä cua waŋ.

²⁷ Kä cukɛ puɔ̱ny kuɔth Baal kɛnɛ duelɛ däk, ca jak kä di̱r amäni walɛ.

²⁸ Inɔ cu Yeɣu kuoth Baal woc kä I-thɛ-rɛl.

²⁹ Duundɛ ɣöö /ken Yeɣu duer Ya-rɔ-baam gat Nɛ-bat mëë ci ji̱ I-thɛ-rɛl jak kä dui̱r päl kɛ kui̱ palä tha̱a̱k dääpä kä Beth-ɛl kɛnɛ Daan.

³⁰ Kä cu Kuoth Nhial Yeɣu jiök i̱, “Kɛ ɣöö ci mi gɔaa la̱t waaŋdä, kɛ ɣöö ci dhɔr Ɛ̈-ɣab lät kä tin diaal tin te lɔcdä, bi kuayku kä käth in ŋuaandiɛn a kuäär kä I-thɛ-rɛl.”

³¹ Duundɛ ɣöö /ken Yeɣu guɔ̱r ni dup Kuɔth Nhial Kuoth I-thɛ-rɛl kɛ lɔcdɛ kɛɛliw. /Kenɛ duer Ya-rɔ-baam mëë cɛ ji̱ I-thɛ-rɛl jak kä dui̱r kɛ jɛ päl.

Lia̱a̱ Yeɣu

³² Ɛn ni̱ni tɔ̱tɔ̱ cu Kuoth Nhial ɛ tok kɛ mi wocɛ tha̱a̱ŋ I-thɛ-rɛl. Cu Ɣä-dha-el kɛ joc rɛy muɔ̱ɔ̱n I-thɛ-rɛl.

³³ Nikä Jɔr-dɛn nhiam ɣɔaa amäni mun Gil-yad kɛɛliw, ji̱ Gad, ji̱ Rɛ-u-bɛn, kɛ ji̱ Ma-na-thɛ a känɛ nikä Ä-ro-er min thiek kɛ lo̱o̱l Ar-non, min la Gil-yad kɛnɛ Ba-can.

³⁴ Kä cua duɔth lätni Yeɣu gɔ̱a̱r rɛy buɔk kuɛ̈ɛ̈ni kua̱ri I-thɛ-rɛl.

³⁵ Kä cu Yeɣu li̱w, kä cua jɛ kony kä Tha-mɛ-ria. Kä cu gatdɛ ni Yɛ-ɣo-a-ɣadh ruec kɛ gua̱a̱thdɛ.

³⁶ Cu pek ëë ruaac Yeɣu ɛ I-thɛ-rɛl kä Tha-mɛ-ria a run ti jiɛn da̱ŋ rɛw wi̱cdɛ bädäk.