2 Kua̱r 1 - RUAC KUƆTH IN RƐL RƆ

E-li-yaa kɛnɛ kuäär ni Ä-ɣɛ̈dh-yaa

¹ Kɛ kɔr li̱eth Ɛ̈-ɣab, cua Mo-ab lɔ̱ɔ̱ la̱t kɛ kui̱ I-thɛ-rɛl.

² Kä täämɛ cu Ä-ɣɛ̈dh-yaa pɛ̈ɛ̈n guäth nyuurädɛ duëël nhial kä Tha-mɛ-ria, kä cuɛ cu tɔ̱ɔ̱c kɛ juey. Kä cuɛ naath ja̱k jio̱kɛ kɛ i̱ “Wiaa thiëcɛ Baal-dhɛ-bub kuoth ji̱ Ɛk-ron, mi bä gɔaa kä juey ɛ mi.”

³ Duundɛ ɣöö cu jääk Kuɔth Nhial E-li-yaa raan Tic-be jiök i̱ “Jiɛc rɔ wër ro̱mni kɛ ja̱a̱k kua̱r Tha-mɛ-ria, kä jio̱k nikɛ i̱, ‘Ɛ ɣöö thilɛ Kuoth kä I-thɛ-rɛl mɔ wä yɛn thiec ni Baal-dhɛ-bub kuoth Ɛk-ron ɔ?’

⁴ Kɛ kui̱c ɛmɔ täämɛ nɛmɛ laarɛ Kuoth Nhial i̱, ‘/Ci rɔ̱ bi jiɛc dhaŋä mɔ ti̱i̱ thi̱n ɔ, ɛ ni ɣöö bi li̱w ɛ thuɔ̱k.’ ” Kä cu E-li-yaa wä.

⁵ Kä cu ja̱a̱k loc kä kuäär, kä cuɛ kɛ jiök i̱, “Ɛŋu cia rɔ riet jɔk ɔ?”

⁶ Kä cukɛ jɛ loc i̱, “Tëë kɛ wut mi ci ben röm kɛ nɛy, kä cɛ nɛy jiök i̱, ‘Luɔcɛ kä kuäär in jäk yɛ, kä la̱rɛ jɛ i̱ ɛ Kuoth Nhial i̱ ɛ thil Kuɔth kä I-thɛ-rɛl mɔ jäki naath ɔ wa Baal-dhɛ-bub kuoth ji̱ Ɛk-ron thiec ɔ? Kɛ kui̱c ɛmɔ /ci rɔ bi jiɛc wi̱i̱ dhaŋä mɔ ti̱i̱ thi̱n ɔ, ɛni ɣöö bi li̱w kɛ thuɔ̱k.’ ”

⁷ Kä cu kuäär kɛ thiec i̱, “Kä ɛ ram mi tëë di ci röm kɛ yɛ mɔ kä ci yɛ la̱t ti̱ti̱?”

⁸ Kä cukɛ jɛ loc i̱, “Ɛ ram mi ciɛŋ ni bi̱i̱ mieem, kä te lɛdɛ kɛ la̱a̱k gupä.” Kä cu kuäär wee, “Ɛ E-li-yaa raan Tic-be.”

⁹ Kä cu kuäär ɛ jäk kä rɛm mi̱ jiɛn dhieec kɛ bo̱o̱thdiɛn. Kä cuɛ wä kä E-li-yaa, kä E-li-yaa tëë nyuurä nhial wi̱i̱ pa̱a̱m, kä cuɛ jiök i̱, “Raan Kuɔth, ji̱ Ɛ kuäär i̱, ‘Bër piny.’ ”

¹⁰ Kä cu E-li-yaa jɛ loc i̱, “Mi ɛ ɣän raan Kuɔth, ɛ mac bëë piny nhial mi bi ji̱ pɛt yɛnɛ nɛɛku.” Kä cu mac ben piny nhial kä cuɛ jɛ waŋ kɛnɛ nɛɛkɛ.

¹¹ Kä cu kuäär bo̱o̱th nyɔk kɛ jäkni kɛnɛ nɛɛkɛ ti jiɛn dhieec. Kä cuɛ ben kä E-li-yaa, kä cuɛ jiök i̱, “Raan Kuɔth, laar kuäärɛ i̱, ‘Bër piny kɛ pɛ̈th.’ ”

¹² Kä cu E-li-yaa jɛ loc i̱, “Mi ɛ ɣän raan Kuɔth, ɛ mac bëë piny nhial bɛ ji̱ ben pɛt yɛnɛ nɛɛku.” Kä cu mac Kuɔth ben piny nhial kä cuɛ ben waŋ kɛnɛ nɛɛkɛ.

¹³ Kä cu kuäär bo̱o̱th in diɔ̱ɔ̱kdiɛn nyɔk kɛ jäkni kɛnɛ nɛɛkɛ ti jiɛn dhieec. Kä cuɛ rɔ ben ka̱m mua̱a̱l nhiam E-li-yaa, kä cuɛ wee “Raan Kuɔth, la̱ŋä ni ji̱, kɛ tëkdä kɛnɛ tëk nɛɛni ti̱ti̱, akɛ gɔw waaŋdu.

¹⁴ Nɛnɛ, ci mac ben piny nhial kä cɛ bööth rɛmni da̱ŋ rɛw waŋ kɛ rɛmkiɛn ti jiɛn dhieec kɛɛl. Kä täämɛ a tëkdä gɔaa waaŋdu.”

¹⁵ Kä cu jääk Kuɔth Nhial E-li-yaa jiök i̱, “Wiaa kɛɛl yɛnɛ jɛ. Cu dual kɛ jɛ.” Kä cu E-li-yaa wä kɛɛl kɛ jɛ kä kuäär,

¹⁶ Kä cuɛ kuäär jiök i̱, “Nɛmɛ laarɛ Kuoth Nhial i̱, ‘Kɛ ɣöö ci naath ja̱k wa Baal-dhɛ-bub, kuoth ji̱ Ɛk-ron thiec (kuɛ la ɣöö thilɛ Kuoth kä I-thɛ-rɛl mi dëë ruacdɛ thiec?) kɛ kui̱c ɛmɔ /ci rɔ bi jiɛc wi̱i̱ dhaŋä mɔ ti̱i̱ thi̱n ɔ, ɛ ni ɣöö bi li̱w ɛ thuɔ̱k.’ ”

¹⁷ Kä cuɛ li̱w ce̱tnikɛ ruac Kuɔth Nhial in ca lat ɛ E-li-yaa. Kä cu Yo-ram a kuäär kɛ gua̱a̱thdɛ kɛ rɛw runä ruec Yo-ram gat Yo-ca-pat, kuäär Juda, kɛ ɣöö thilɛ Ä-ɣɛ̈dh-yaa gat.

¹⁸ Kä cua duɔth lätni Ä-ɣɛ̈dh-yaa gɔ̱a̱r rɛy buɔk kuɛ̈ɛ̈ni kua̱ri I-thɛ-rɛl.