2 Kor 9 - RUAC KUƆTH IN RƐL RƆ

Luäk kɛ kui̱ Krith-cini tin te kä Jɛ-ru-tha-lɛm

¹ Täämɛ thilɛ luɔt mi bä yɛ gɔ̱a̱r warɛgak kɛ jɛ, kɛ kui̱ luäkä mi dëë jäkä nɛɛ Kuɔth tin cɛ lɛy.

² Kɛ ɣöö ŋa̱cä jɛ go̱o̱r yɛn ɣöö bia luäk, a cä yɛ liak nhiam ji̱ Ma-tha-do-nia, cä la̱rkɛ ɛn ɣöö ci ji̱ A-ke-ya rɔ̱ rialikä kɛ luäk ni thaar. Kä cu görun kɛ luäk ri̱wdiɛn jakä cär kɛ ɣöö bikɛ muɔ̱c.

³ Kä ja̱kä dämanikɔn rɛy Kritho kä yɛ, kɛ ɣöö /ci liakda kɛ yɛ bi a baŋ rɛy kä mɛmɛ, kä dee yɛn rɔ̱ rialikä ce̱tkɛ min cä lar kɛ kui̱dun.

⁴ Kä mi cä ben kɔnɛ tha̱a̱ŋ ji̱ Ma-tha-do-nia, kä dëëkɔ yɛ jek a /ka̱nɛ rɔ̱ rialikä, bakɔ pöc amäni yɛn bä bia pöc, kɛ ɣöö bakɔ cu pöc kɛ ŋa̱thda kɛ yɛ.

⁵ Kä inɔ cä jɛ car ɛn ɣöö bä dämanikɔn läŋ kɛ wädiɛn kä yɛ kɛ nhiam kɛ ɣöö bikɛ muc in cia lar wä rialikä. Kä ɛnɔ dërɛ jɛ rialikä ala muc mi laar yɛn, a /ci mɔ a kok.

⁶ Mɛmɛ ɛ jɛn luɔtdɛ, ram mi pi̱th a kuiy, bɛ ŋɛɛr a kuiy bä, kä ram mi wä pi̱eth a di̱t, bɛ ŋɛɛr a di̱t bä.

⁷ Bi ramɔ dhil muɔ̱c ce̱tkɛ min cɛ car a /ci mɔ akɛ tha̱a̱ŋ lɔaac kiɛ kɛ kok, kɛ ɣöö nhɔk Kuoth ram mi muc kɛ tɛ̈th lɔaac.

⁸ Kä te Kuoth kɛ lua̱ŋ kɛ ɣöö bɛ yɛ moc puth diaal ti ŋuan, kɛ ɣöö bia tekɛ mi ro̱ŋ kɛ min görɛ ciaŋ, kɛ ɣöö dee yɛn kɛ nyuak rɛy lätni diaal ti gɔw.

⁹ Ce̱tkɛ min ca gɔ̱r i̱, “Jɛn mocɛ nɛy ti can, kä ciaŋ cuŋnidɛ tëë thi̱n a thil pek.”

¹⁰ Kä Kuoth in käm pi̱i̱th kuay kä käm jɛ juray kɛ kui̱ mi̱eth, bɛ nyinkun ka̱m yɛ kä bɛ kɛ jakä ŋuan, kä bɛ ŋër ciɛŋä cuŋnikun rep.

¹¹ Ba yɛ jakä riäŋ kɛ ŋɔaani diaal, kɛ lɔar tetdun, min bi Kuoth nöŋ tɛ̈th lɔaac kɛ kɔ.

¹² Kɛ lätni lua̱k ɛmɛ min käm yɛnɛ nɛy tin ci Kuoth kɛ lɛy, jakɛ naath kä la̱rkɛ Kuoth tɛ̈th lɔaac ɛlɔ̱ŋ.

¹³ Kɛ ɣɔ̱n la̱t lua̱k ɛmɛ, cia Kuoth liak kɛ luthdun kɛ ŋa̱thdun kɛ thuk ti gɔw kɛ kui̱ Kritho, kä kɛ muɔ̱cdun kɛ tet ti lɔr kɛ kɛ amäni kɛ kui̱ nɛɛni tin kɔ̱kiɛn diaal.

¹⁴ Kä mi palkɛ kɛ kui̱dun la görkɛ ni ɣöö deekɛ te kɛɛl kɛ yɛ kɛ kui̱ puthä Kuɔth in di̱i̱t in cɛ ka̱m yɛ.

¹⁵ A liak tekɛ Kuoth kɛ kui̱ mucädɛ min di̱i̱t min /ca dee luäŋ kɛ lär.