2 Kor 8 - RUAC KUƆTH IN RƐL RƆ

Muc Krith-cini

¹ Dämaari görkɔ ɣöö bia puɔ̱th Kuɔth in ca kam ji̱ duëël Kuɔth in te kä Ma-tha-do-nia ŋa̱c,

² kɛ ɣöö cakɛ ɣɔ̱n kɛ rik ti bɛ̈c bɛ̈ɛ̈c, kä duundɛ ɣöö di̱t tɛ̈th lɔaacdiɛn a cukɛ muɔ̱c kɛ tet ti lɔr a cäŋni mëë kɛ can ti di̱t.

³ Kä ce̱tkɛ min dëë lar cikɛ muɔ̱c kɛ pek luäŋädiɛn, kiɛ a leny min tekɛ kɛ, nikɛ pek cärä lɔaacdiɛn.

⁴ Kä cukɛ kɔ la̱ŋ kɛ thuɔ̱k, ɛn ɣöö dee kɛ tekɛ kui̱c nɛɛni tin ci Kuoth kɛ lɛy.

⁵ Kä cukɛ mi /ci nɛy ɛ dee met car ŋun, cikɛ rɔ̱ ka̱m Kuäär ni Yecu kɛ nhiam, kä kɛ kɔrɛ cukɛ rɔ̱ ka̱m kɔn nikɛ ruac Kuɔth.

⁶ Kä inɔ, cuakɔ Tay-täth com mëë kɔŋ la̱t ɛmɔ tok, kɛ ɣöö bɛ yɛ luäk kɛ thuɔ̱k la̱t puthä mɔmɔ rɛydun.

⁷ Täämɛ yɛn ria̱ŋɛ kɛ ti diaal, ria̱ŋɛ rɛy ŋäthä, kɛnɛ lat ruaacni, kɛ rɛy ŋäcä ŋɔaani, kɛnɛ görun kɛ luäk nath, kɛ nhökdun kɛ kɔ. Kɛ jɛn duɔ̱ɔ̱p ɛmɔ buɔ̱mɛ bä rɛy puthä mucä mɛmɛ.

⁸ /Ci ɣän mɛmɛ lat ce̱tkɛ ŋuk, kä ɛ ɣöö bä nhökdun ŋa̱c kɛ thuɔ̱k kɛ cäätdun kɛ nɛy tin kɔ̱kiɛn tin görkɛ luäk nath.

⁹ Kɛ ɣöö yɛn ŋa̱cɛ puɔ̱th Kua̱ran ni Yecu Kritho, kä cäŋ ni mëë riäŋɛ cɛ ben a can kɛ kui̱dun, kä kɛ ciaŋ canädɛ dee yɛn a nɛy ti ria̱ŋ ria̱a̱ŋ.

¹⁰ Kä kɛ kui̱ kä mɛmɛ ɣän ka̱mɛ yɛ lui̱kdä. Kä lui̱kdä lotdɛ rɔ kɛ ɣöö bia mëë cia tok thaar thuk kɛ la̱t. Kä kɛ yɛn nɛy tëë nhiam a /ci mɔ a ɣöö bia duɔ̱ɔ̱r la̱t, kä duundɛ ɣöö bia go̱r i̱ bia duɔ̱ɔ̱r la̱t.

¹¹ Kä ɛn täämɛ thuɔ̱kɛ jɛ kɛ la̱t, kɛ ɣöö bi görun kɛ la̱tdɛ cu pa̱a̱r thuɔ̱kdu kɛ jɛ kɛ min tekɛ yɛ.

¹² Kä mi go̱o̱ri ɣöö bi muɔ̱c, ba mucdu nhɔk, kä ba nhɔk ni min te thi̱n, a /ci mɔ a min thil kä jɛ.

¹³ Kä /cä lot ni ɣöö bi nɛy tin kɔ̱ŋ lɔar, bia kulɛ cuuc, duundɛ ɣöö go̱o̱r nɛy ti diaal i̱ bikɛ pa̱a̱r.

¹⁴ Kä ɛn täämɛ te yɛn kɛ ti ŋuan, kä dëë nɛy tin kɔ̱ŋ luäk tin thil ŋu, kɛ ɣöö dee ria̱ŋdiɛn yɛ luäk kɛ gua̱a̱th in thilɛ yɛ ŋu, kä inɔ dee pa̱a̱r cu te thi̱n.

¹⁵ Ce̱tkɛ min ca gɔ̱r i̱, “Ram mi tekɛ ti ŋuan /ci nyinkɛ ŋuan ɛlɔ̱ŋ, kä ram mi tekɛ ti tɔt /ci nyinkɛ kuiy ɛlɔ̱ŋ.”

Tay-täth kɛnɛ ji̱ ja̱lɛ

¹⁶ A tɛ̈th lɔaac tekɛ Kuoth in ci nhök mi ce̱tkɛ min tekɛ ɣä la̱th lɔɔc Tay-täth.

¹⁷ Kä /ciɛ ɣöö cɛ cuɔ̱mda nhɔk kärɔa, kä ɛ gör lɔaacdɛ kɛ wä kä yɛ kɛ ca̱r lɔaacdɛ.

¹⁸ Kɔn ja̱kɔ jɛ kɛɛl kɛ ram mi dämandan rɛy Kritho, mi di̱t kɛ̈kdɛ ɛlɔ̱ŋ rɛy duëli Kuɔth diaal kɛ kui̱ latädɛ kɛ thuk ti gɔw.

¹⁹ Kä /ciɛ jɛn nɔmɔ kärɔa, ca jɛ kuany ɛ duël Kuɔth ɛn ɣöö bɛ ja̱l kɛ kɔ kɛɛl min naŋkɔ muc ti̱ti̱ kɛ kui̱ buɔyä Kua̱r, kɛnɛ ɣöö bakɔ jɛ nyoth ɛn ɣöö go̱o̱r nɛy luäk nath.

²⁰ Görkɔ jɛ ɛn ɣöö bɛ thil ram mi bi kɔ bɛl kɛ kui̱ mucä mɛ di̱i̱t ɛmɛ mɛ la̱tkɔ mɛ,

²¹ kɛ ɣöö kɔn luɔtkɔ ni lätni kä mi gɔaa a /ci mɔ a nhiam Kua̱r ni Yecu kärɔa kä duundɛ ɣöö amäni nhiam nath bä.

²² Kä ja̱kɔ dämaara mi cakɔ ɣɔ̱n kɛ ti ŋuan kɛɛl kɛ kɛ, kä cakɔ jɛ jek go̱o̱rɛ luäk nath kɛ ŋɔaani ti ŋuan, kä täämɛ tëëkɛ gör lua̱k mi leny ni görɛ mëëdan kɛ kui̱ ŋäthädɛ in di̱i̱t kɛ yɛ.

²³ Kä kɛ kui̱ Tay-täth, jɛn ɛ rɛwdä mi nyuakɔ la̱t kɛɛl bɛ yɛ luäk, kä kɛ kui̱ dämanikɔn, kɛn kɛ ja̱a̱k duëli Kuɔth tin nöŋkɛ buay Kritho.

²⁴ Kɛ kui̱ ɛmɔ nyuɔthɛ nhökdun, a ba jɛ nɛn nhiam ɛ ji̱ duëli Kuɔth diaal kä ba jɛ ŋa̱c ɛn luɔt liakäda kɛ yɛ.