2 Kor 7 - RUAC KUƆTH IN RƐL RƆ

¹ Mäthnikä, kɛ ɣöö ta̱nɛ kɛ lääri ti̱ti̱, kuanɛ rɔ̱ lak kä ti diaal tin jakɛ puɔ̱ny kɛnɛ yiëë kä jiäk, kä jaknɛ ciaŋ gɔɔyä kä thil diw rɛy luthä Kuɔth.

Tɛ̈th lɔaac Puɔl

² Muɔcɛ nɛy gua̱a̱th rɛy lo̱cnikun. Thilɛ ram mi cakɔ duer duer, kä thilɛ ram mi cakɔ jakä nuɔɔr, kä thilɛ ram mi cakɔ mac.

³ /Cä mɛmɛ lar kɛ kuethnidun, kɛ ɣöö cä jɛ lar kɛ nhiam ɛn ɣöö ta̱yɛ lɔɔcda, kɛ ɣöö dënɛ li̱w kɛɛl kä dënɛ tëk kɛɛl.

⁴ Ta̱a̱ kɛ liak kɛ yɛ ni ciaŋ, kä ta̱a̱ kɛ liak mi di̱i̱t kɛ yɛ. Ci lɔcdä thia̱a̱ŋ kɛ buɔ̱m, rɛy riknikɔ diaal tɛth lɔcdä ɛlɔ̱ŋ.

⁵ Kä cäŋ ni mëë cakɔ cop kä Ma-tha-do-nia, /ken pua̱nykɔ lɔ̱ɔ̱ŋ kɛ ɣöö ca kɔ moc rik gua̱thni diaal, kä gak nɛy kɛ nɛy tin kɔ̱ŋ, kä te dual rɛyda.

⁶ Kä Kuoth in buum lo̱c nɛɛni ti jiɛth, cɛ kɔ bum kɛ ben Tay-täth,

⁷ kä /ciɛ kɛ bendɛ kärɔa, kä amäni cuɔ̱m ëë cia buum ni jɛ, kɛ ɣöö cɛ di̱t lɔaacdun kɛnɛ pa̱run, amäni ca̱run kɛ ɣä la̱r kɔ, kä inɔ ci tɛ̈th lɔaacdä cu di̱t.

⁸ A cäŋ ci lo̱ckun jiath kɛ warɛgakdä, /ci lɔcdä jiɛth cä gɔ̱r. Kä dee lɔcdä jiääk mëë cä nɛn ɛn ɣöö warɛgak ɛmɔ cɛ lo̱ckun jak kä jiɛth kɛ gua̱a̱th mi tɔt.

⁹ Kä täämɛ tɛth lɔcdä, kä /ciɛ ɣöö cä lo̱ckun jiath, kä ɛ ɣöö ci jiath lɔaacdun yɛ jakä rietdɛ rɔ̱ ciɛŋnikun kɛ ɣöö jiath lɔaac ɛmɔ no̱o̱ŋɛ Kuoth, a thilɛ riɛk mi cakɔ lät kä yɛ.

¹⁰ Kɛ ɣöö jiath lɔaac in lät Kuoth no̱ŋɛ naath riet kɛ rɔ̱ dueeri min bo̱th naath känä, kä thilɛ bɛ̈l mi no̱o̱ŋɛ, kä duundɛ ɣöö jiath lɔaac in no̱o̱ŋ ɣɔwɛ no̱o̱ŋɛ lia̱a̱.

¹¹ Nɛ̈nɛ jɛ ci Kuoth yɛ luäk i̱di kɛ jɛn jiath lɔaacdun ɛmɔ. Cɛ yɛ jakä bia duɔ̱ɔ̱r la̱t kɛ lɔcdun kɛɛliw. Kä cɛ yɛ jakä gak, kä cɛ yɛ jakä ŋa̱cɛ ciaaŋ jiääk. Kä cɛ yɛ jakä tekɛ gör kɛ lätni kä mi gɔaa kɛnɛ lo̱k kä mi jiääk! Kɛ gua̱th diaal cia rɔ̱ nyoth kɛ thuɔ̱k ɛn ɣöö thilɛ yɛ duer kɛ mɔmɔ.

¹² Kä ɛnɔ cäŋ ni mɔ cä yɛ gɔ̱r warɛgak ɔ, /ciɛ kɛ kui̱ raam in ci duer lat, kiɛ ram in ca lät kä duer ɔ, kä ɛ ɣöö ba di̱t lɔaacdun kɛ kɔ nyuɔ̱th yɛ nhiam Kuɔth.

¹³ Kä ɛnɔ cakɔ buɔ̱m jek. Kä a matkɔ cuɔ̱m bumäda thi̱n, ci lɔcda tɛɛth ɛlɔ̱ŋ kɛ kui̱ tɛthä lɔaac Tay-täth, kɛ ɣöö ci yɛn diaal lɔcdɛ jakä tɛth.

¹⁴ Kɛ ɣöö cä jɛ la̱r tha̱a̱ŋ liakädä kɛ yɛ, kä /ken yɛn ɣä jakä po̱c. Kä ce̱tnikɛ ruaacni diaal tëë cakɔ la̱t yɛ kɛ thuɔ̱ɔ̱k, inɔ ci lär liakädä nhiam Tay-täth cu a thuɔ̱k.

¹⁵ Kä lɔcdɛ tɛthɛ kɛ yɛ ɛlɔ̱ŋ, mɔ tiimɛ luthdun diaal kɛ jɛ, kɛnɛ nyuur ëë cia nyuur ni jɛ kɛ dual lathä.

¹⁶ Ɣän tɛth lɔcdä kɛ ɣöö ta̱a̱ kɛ ŋa̱th kɛ yɛ.