2 Kor 6 - RUAC KUƆTH IN RƐL RƆ

¹ Kɛ ɣöö min la̱tkɔ kɛɛl kɛ jɛ, inɔ, la̱ŋkɔ yɛ i̱ /cia puɔ̱th Kuɔth bi ka̱n baaŋ.

² Kɛ ɣöö cɛ lar i̱, “Kɛ gua̱a̱th mi ro̱ŋ cä yɛ liŋ, kä kɛ cäŋ känä cä yɛ luäk.” Nɛnɛ, mɛmɛ ɛ jɛn gua̱a̱th in ro̱ŋ, kä nɛnɛ, ɛn wa̱lɛ ɛ cäŋ känä!

³ Thilɛ mi bum mi cakɔ la̱th dup ran, kɛ ɣöö bɛ thilɛ bɛ̈l mi ba jek kä la̱tda.

⁴ Kä duundɛ ɣöö ce̱tkɛ ji̱ läätdä Kuɔth nyuɔthkɔ rɔ̱ kä ti diaal, kɛ dhi̱eel mi di̱i̱t, rɛy rikni, kɛnɛ ciaaŋ jiääk, kɛ ti bɛ̈c bɛ̈ɛ̈c,

⁵ kɛ duäc, kɛnɛ yiɛni, kɛ rɔal, kɛnɛ lät ti bɛc, kɛ thil ni̱en, kɛnɛ buɔth.

⁶ Kä kɛ ciaaŋda mi wic wic, kɛnɛ ŋäc ŋɔaani, kɛ päl, lɔaac piny, kɛ gɔɔy, kɛ yiëë mi rɛl rɔ, kɛnɛ nhök mi thuɔ̱k,

⁷ kɛ ruac mi thuɔ̱k, kɛnɛ buɔ̱m Kuɔth, kä yio̱w kööran ɛ ciaaŋ cuŋni kɛ kui̱ tetdä cuëëc kɛnɛ tet caam.

⁸ Luɔ̱thkɛ kɔn, kä jakɛ kɔn kä po̱c, kuëthkɛ kɔn kä liakɛ kɔn. Ciaŋkɛ kɔ ce̱tkɛ ji̱ kacä, kä ŋotdɛ latnɛ ni thuɔ̱k,

⁹ kä ce̱tkɛ nɛy ti kueckɛ, kä ŋotdɛ ŋa̱ckɛ kɔ agɔaa, kä ce̱tkɛ mi cakɔ li̱w, kä nɛnɛ, tëk kɔ, kä ce̱tkɛ ti ca duäc, kä ŋuɔtkɔ /ka̱nkɔ näk,

¹⁰ ciaŋkɛ kɔ ce̱tkɛ nɛy ti jiɛth lo̱ckiɛn, kä tɛth lo̱ckɔ ni ciaŋ, ce̱tkɛ nɛy ti can, kä ŋotdɛ ria̱ŋkɔ nɛy ti ŋuan, kä ce̱tkɛ nɛy ti thil ŋu, kä ŋotdɛ ta̱kɔ kɛ ti diaal.

¹¹ Kä cakɔ ruac kɛ yɛ kɛ thuɔ̱k, yɛn ji̱ Ko-rinth, kɔn cakɔ lo̱ckɔ lëp yɛ.

¹² Kɔn /ka̱nkɔ yɛ gaŋ, ɛ nhök lɔaacdun ɛn nɔ gaŋ yɛ mɔ.

¹³ Kä ɣän ruacä kɛ yɛ ce̱tkɛ mi ruacä kɛ gaatkä. Yɛn bä nyuɔ̱thɛ kɔ ɛn ciaaŋ ɛmɔ. Lɛ̈pɛ lo̱ckun bä.

Lui̱k kɛ kui̱ ŋi̱i̱cä nɛɛni ti thil Kuoth

¹⁴ /Cuarɛ rɔ̱ mat kɛ nɛy tin thil ŋa̱th. Kɛ ɣöö ɛ ma̱t in mi̱th te kam ŋuɔ̱tni mɔ kɛnɛ ciaŋ cuŋni? Kiɛ ɛ mat in mi̱th te kam buɔyä kɛnɛ muth ɔ?

¹⁵ Kä ɛ mat ŋukä te kam Kritho kɛnɛ Be-lay-al min la gua̱n jiäkni? Kiɛ ɛ nyuaak ŋukä mi te kam gua̱n ŋäthä kɛnɛ ram mi thil ŋa̱th?

¹⁶ Ɛ mat ruac ŋukä te kam luaak Kuɔth kɛnɛ kuth guäyni mɔ? Kɛ ɣöö lapnɛ luaak Kuɔth in tëk, kä ce̱tkɛ min ca lar ɛ Kuoth i̱, “Bi ɣän cieŋ rɛydiɛn, kä bä ja̱l kamdiɛn, kä bi ɣän a Kuothdiɛn, kä bikɛ a nɛɛkä.

¹⁷ Kɛ kui̱ ɛmɔ bia raar kä kɛ kä bia a gööl kä kɛ, ruac ni Kuäär. /Cuarɛ mi jiääk gueer, kä ɛnɔ bä yɛ nyuɔ̱ɔ̱r agɔaa.

¹⁸ Kä bi ɣän a guurun, kä bi yɛn a dhɔɔlkä kɛnɛ nyieekä, ruac ni Kuäär in Leny Buɔ̱mdɛ ti Diaal.”