2 Kor 4 - RUAC KUƆTH IN RƐL RƆ

Ria̱ŋ yieekä rɛy dha̱a̱ri muɔ̱ɔ̱n

¹ Kɛ kui̱ ɛmɔ, min ɛ kɔ̱a̱c lɔaac Kuɔth ɛn min la̱tdɛ la̱t ɛmɔ ci lɔcdan bi baath.

² Canɛ ciaŋ po̱cä tin la̱tkɛ kɛ tɛ̱̈ɛ̱̈ lo̱k. Kä lo̱k kɔn la̱t wän wäänä, kä canɛ ruac Kuɔth bi cäkikä. Kä kɛ ruac thukä mi jɔc, cakɔ rɔ̱ nyuɔ̱th yɛn diaal rɛy ŋäcä lo̱cnikun a jɔc nhiam Kuɔth.

³ Kä a cäŋ ca thuk Kuɔth ti gɔw kɛ kui̱dan kum, kuɔ̱mkɛ kɛ kɛ kui̱ nɛɛni tin li̱w kärɔ̱.

⁴ Kɛ kui̱ nɛɛni ti̱ti̱ ci kuoth ɣɔaa ɛmɛ ca̱r nɛɛni tin thil ŋa̱th cɔr, kɛ ɣöö bɛ kɛ pën guec buɔyä thukni ti gɔw kɛ kui̱ buɔyä Kritho, min la cät Kuɔth.

⁵ Kɛ ɣöö /ka̱nkɔ lat ni pua̱nykɔ, latkɔ ni Yecu Kritho ɛn ɣöö ɛ Kuäär, kä kɛ kɔn la̱a̱tkun kɛ kui̱ Yecu.

⁶ Kɛ ɣöö ɛ Kuoth ɛn ni̱n lar jɛ i̱, “A buay riaw kä muth,” ɛ jɛn Kuoth ci buaydɛ jakä buɔy rɛy lo̱cnikɔn, kɛ ɣöö bɛ kɔn nöŋ ŋäc buɔyä Kuɔth min buɔy nhiam Yecu Kritho.

⁷ Kä ta̱nɛ kɛ ria̱ŋ yieekä ɛmɛ kɔn nɛy ti ce̱tkɛ dha̱a̱ri muɔ̱ɔ̱n, kɛ ɣöö ba jɛ jakä jɔc agɔaa ɛn ɣöö buɔ̱m ɛ di̱i̱t ɛmɛ, /ciɛ duŋdan, ɛ duŋ Kuɔth.

⁸ Cakɔ moc riɛk kɛ dup diaal, kä duundɛ ɣöö /ka̱n kɔ riac, kä yi̱cɛ wuɔ̱thkɔ kä duundɛ ɣöö /ci lo̱ckɔ bath.

⁹ Kä cakɔ ciɛŋ a jiäk, kä duundɛ ɣöö /ka̱n kɔ päl, cakɔ duäc a bɛc, kä duundɛ ɣöö /ka̱n kɔ näk.

¹⁰ Kä rɛy pua̱nyni ni ciaŋ kapnɛ lia̱a̱ Yecu, kɛ ɣöö dënɛ tëk Yecu jakä jɔc rɛy pua̱nynikɔn bä.

¹¹ Kɛ ɣöö min ŋuɔtnɛ kɛ tëk, la ka̱mkɛ kɔn lia̱a̱ ni ciaŋ kɛ kui̱ Yecu, kɛ ɣöö dee tëk Yecu jɔɔc rɛy pua̱nynikɔn tin la li̱w.

¹² Lia̱a̱ lätdɛ rɛydan inɔ, kä duundɛ ɣöö tëk lätdɛ rɛydun.

¹³ Kɛ ɣöö te kɔn kɛ jɛn yiëë ŋäthä mɔ kɛl ɔ ce̱tkɛ min lat bok ɛ i̱, “Ɣän ŋa̱thä, kä cä cu ruac inɔ,” kɛ kui̱c ɛmɔ ta̱kɔ kɛ ŋa̱th ɛmɔ bä, kä ruackɔ inɔ.

¹⁴ Ŋa̱ckɔ jɛn ɛn ɣöö jɛn ram min ci Kuäär ni Yecu jiɛc li̱th bɛ kɔ jiɛc bä kɛ Yecu kɛɛl, kä bɛ kɔ naŋ nhiamdɛ kɛ yɛ kɛɛl.

¹⁵ Kä ŋɔak diaal ti̱ti̱ ɛ kui̱dun, kɛ ɣöö ce̱tkɛ min räth puɔ̱th Kuɔth kä nɛy kɔ̱kiɛn ti ŋuan, kɛ ɣöö dee liak tɛthä lɔaac buɔyä Kuɔth rɔ rep.

Tëk kɛ ŋa̱th

¹⁶ Kä inɔ /ci lo̱ckɔn baath. A cäŋ wä puɔ̱nydan kɛ thuɔ̱k, ŋotdɛ la ciaaŋ yieekädan a nyɔakɛ kɛ muɔc lua̱ŋ ni ciaŋ.

¹⁷ Kä rik pua̱a̱nydan ɛ tɔt ɛmɛ, rialɛ kɔn ikä kɛ kui̱ buɔyä mi do̱raar mi /canɛ dee luäŋ kɛ thëm.

¹⁸ Kɛ ɣöö /canɛ guic ni ŋɔaani tin la nɛ̈nkɛ, guic kɔn ni ŋɔaani tin /ca nɛn, kɛ ɣöö ŋɔaani tin nɛ̈nkɛ la thukɛ, kä ŋɔaani tin /ca nɛn kɛ do̱raari.