2 Kor 2 - RUAC KUƆTH IN RƐL RƆ

¹ Ɣän cä ca̱rä nyɔk ɛn ɣöö /cä bi ben kä yɛ, /cä lɔcdun bi jak kä jiäk.

² Kɛ ɣöö mi jakä lo̱ckun kä jiäk, ɛŋa mi bi lɔcdä jakä tɛth, /cɛ bia ni jɛn ram in cä lɔcdɛ jakä jiäk?

³ Kä cä mɛmɛ gɔ̱a̱r yɛ, kɛ ɣöö mi wa̱a̱ wä ben, /cä dee lɛ cuuc kä nɛy tin dee ɣä moc kɛ tɛ̈th lɔaac. Kä ta̱a̱ kɛ ŋa̱th kɛ yɛn diaal pa̱ny ɛn ɣöö bi tɛ̈th lɔaacdä tekɛ yɛn diaal.

⁴ Kɛ ɣöö ɣän cä yɛ gɔ̱rikä kɛ riɛk mi di̱i̱t, kɛnɛ jiath lɔaac kɛ mer ti ŋuan, kä /ciɛ ɣöö bä yɛ moc kɛ jiääk lɔaac, ɛ ɣöö yɛn nhökdä min di̱i̱t kɛ yɛ ŋa̱c.

Pälikä raam mi tekɛ duer

⁵ Kä mi tëëkɛ ram mi moc yɛ kɛ riɛk, /cɛ moc ni ɣä kɛ riɛk, kɛ tha̱a̱ŋdɛ kɛ yɛn diaal, kä /ca jɛ lat ɛlɔ̱ŋ.

⁶ Kɛ kui̱ raam mi ce̱tkɛ ɛnɔ tɔ̱a̱ŋ in cia ka̱m jɛ ro̱ŋɛ,

⁷ inɔ täämɛ dërɛ päl ni jɛ ikä kä dërɛ jɛ com, kɛ ɣöö /ci jiath lɔaac ɛ dee lɛ tiam.

⁸ Kɛ kui̱c ɛmɔ ɣän la̱ŋä yɛ kɛ ɣöö bia nhökdun kɛ jɛ dhil la̱r jɛ.

⁹ Cä yɛ gɔ̱rikä kɛ kui̱ kä mɛmɛ kɛ ɣöö bä yɛ ɣɔ̱n, kɛ ɣöö dëë jɛ ŋa̱c mi te yɛn kɛ luth kɛ ti diaal.

¹⁰ Ram mɔ bia pälikä mɔ, bä jɛ pälikä bä. Mi tëëkɛ mi cä pälikä, pa̱lä jɛ ikä kɛ kui̱dun nhiam Kritho,

¹¹ kɛ ɣöö bɛ Cɛy-tan gaŋ kä ɣöö bɛ thil lua̱ŋ mi bɛ jek kɔn, kɛ ɣöö ŋäc kɔn ca̱a̱p tin te lɔɔcdɛ.

Diɛɛr Puɔl kä Ti-ro-ath

¹² Mëë cä cop kä Ti-ro-ath kɛ ɣöö bä thuk Kritho ti gɔw lat, ca ɣä lëp thi̱i̱k kɛ kui̱ Kua̱r ni Yecu.

¹³ Kä /ken ca̱r wecdä rɔ pa̱l piny, kɛ ɣöö /ka̱n dämaar ni Tay-täth jek ɛn wi̱ni. Kä ɛnɔ cua kɛ ba̱ny mal, kä cua räth kä Ma-tha-do-nia.

Juc kɛ Kritho

¹⁴ Duundɛ ɣöö a tɛ̈th lɔaac tekɛ Kuoth, min bo̱th kɔn rɛy jucä kɛ Kritho min ci ŋäcdɛ dääk gua̱thni diaal kɛ kɔn ce̱tkɛ ŋuäny mi gɔaa.

¹⁵ Kɛ ɣöö lapnɛ wäl mi waŋkɛ kɛ Kritho kɛ kui̱ Kuɔth rɛy nɛɛni tin ca kän kɛnɛ rɛy nɛɛni tin ci bath.

¹⁶ Kɛ kui̱ nɛɛni tin ci bath ɛ ŋuäny li̱eth mi näk naath, kɛ nɛy tin tëk ɛ ŋuäny teekä mi no̱o̱ŋ tëk. Ɛŋa mi ro̱ŋ kɛ kɛn ŋɔaani ti̱ti̱?

¹⁷ Kä /ci kɔn ruac Kuɔth kɔk, ce̱tkɛ tha̱a̱ŋ nɛɛni tin kɔ̱kiɛn. Kä duundɛ ɣöö rɛy Kritho ruackɔ nhiam Kuɔth ala nɛy ti ji̱ thukä, ti ci Kuoth kɛ ja̱k.