2 Kor 12 - RUAC KUƆTH IN RƐL RƆ

Tin ci Kuäär ni Yecu kɛ nyuɔ̱th Puɔl

¹ Ɣän bä rɔ liak, a cäŋ thilɛ mi gɔaa mi bä jek thi̱n, kä duundɛ ɣöö bi ɣän wee wä nhiam kɛ tin ci Kuäär ni Yecu kɛ nyuɔ̱th ɣä.

² Ɣän ŋa̱cä wut kɛl mi Krith-cin mi ca naŋ ni puɔ̱ɔ̱rä nhial kɛ run da̱ŋ wäl ŋuan tëë ci wä, ɣän kuecä jɛ mi puɔ̱nydɛ kɛnɛ mi ɛ nyuuth, ɛ Kuoth ŋäc jɛ mɔ.

^3-4 Kä ɣän ŋa̱cä jɛ ɛn ɣöö wut ɛmɛ ca jɛ naŋ cieŋ nhial. Kä duundɛ ɣöö kuecä jɛ mi ca jɛ naŋ kɛ puɔ̱nydɛ kɛnɛ mi ɛ nyuuth, ɛ Kuoth ŋäc jɛ mɔ. Jɛn ci ti /cɛ dee luäŋ kɛ lat liŋ, ti thilɛ thok raam mi dëë nhök ɣöö bɛ kɛ lat.

⁵ Kɛ kui̱ wutdä ɛmɛ bä rɔ liak, kä kɛ kui̱ pua̱a̱nydä /cä rɔ bi liak, bä rɔ liak nikɛ kɔ̱a̱cdä.

⁶ Kä mi göörä ɣöö bä rɔ liak, /cä bi a dɔ̱a̱r, kɛ ɣöö bä lat ni thuɔ̱k. Kä /cä rɔ bi liak kɛ ɣöö thilɛ ram mi bi ɣä car a leny ni min la̱tdä kiɛ min liɛŋkɛ kä ɣä.

⁷ Kä kɛ ɣöö /cä rɔ bi liak kɛ nyuuthni ti gɔw tin ca nyuɔ̱th ɣä, ca puɔ̱nydä moc kɛ gua̱r. Ce̱tkɛ kɛ jääk Cɛy-tan kɛ ɣöö bɛ ɣä cuc, kɛnɛ ɣöö /ci lɔcdä bi tɛɛth ɛlɔ̱ŋ.

⁸ Cä Kuäär ni Yecu läŋ ni kä diɔ̱ɔ̱k kɛ kui̱ kä mɛmɛ ɛn ɣöö derɛ ɣä päl.

⁹ Kä duundɛ ɣöö cuɛ ɣä jiök i̱, “Puɔ̱thdä ro̱ŋɛ kɛ ji̱, kɛ ɣöö buɔ̱mdä cɛ lät agɔaa rɛy kɔ̱cädu.” Kä inɔ bä rɔ liak kɛ tɛ̈th lɔaac kɛ kui̱ kɔ̱cädä, kɛ ɣöö dee buɔ̱m Kritho cieŋ rɛydä.

¹⁰ Kɛ kui̱c ɛmɔ ɣän tɛth lɔcdä mi kɔ̱a̱cä kä kuëthkɛ ɣä kä la̱tdä ɛlɔ̱ŋ, kä ciaŋkɛ ɣä a jiäk kɛnɛ rik kɛ kui̱ Kritho. Kɛ ɣöö mi kɔ̱a̱cä, ɣän bä buɔ̱m.

Diɛɛr Puɔl kɛ duel Kuɔth kä Ko-rinth

¹¹ Cu ɣän a dɔ̱a̱r! Cu yɛn ɣä kuɔk thi̱n. Kɛ thuɔ̱k kɛ yɛn dee ruac kɛ kui̱dä mɔ. Kɛ ɣöö /ci kuiy ni ɣän kä jaak ti̱ti̱ tin gɔw ni kɛn, a cäŋɛ ɣä baŋ.

¹² Kɛ li̱ep bitdä ca nyuuthni ti nyuɔthkɛ ɣöö ɛ ɣän jääk mi thuɔ̱k la̱t rɛydun, kɛ nyuuthni kɛnɛ ti ga̱ykɛ naath, kɛ lät ti buɔ̱m buɔ̱ɔ̱m.

¹³ Ɛ duɔ̱ɔ̱p in mi̱th /ka̱n yɛ lätikä ce̱tkɛ duël Kuɔth tin kɔ̱ŋ kɛ jɛ mɔ? Ɛ derɛ ku la ɣöö ɣän puɔ̱nydä /ka̱n yɛ thiec kɛ duɔ̱ɔ̱r? Pa̱lɛ ɣä ikä kɛ ɣöö /ka̱n yɛ pa̱a̱r!

¹⁴ Täämɛ ɣän ɛn cä rɔ rialikä kɛ ɣöö bä ben kä yɛ kɛ ben in diɔ̱ɔ̱kdiɛn. Kä /ci ɣän bi a riɛk kä yɛ, kɛ ɣöö /cä go̱r ni nyinkun, göörä ni yɛ. Kɛ ɣöö /ci gaat ŋɔak dol kɛ kui̱ diëëthnikiɛn, duundɛ ɣöö kɛ diëëth la ŋɔak a dol ɔ kɛ kui̱ gankiɛn.

¹⁵ Ɣän bi lɔcdä tɛɛth kɛ ɣöö bä ti diaal thöp kɛ kui̱dun amäni puɔ̱nydä. Mi nhɔakä yɛ ɛlɔ̱ŋ, dërɛ ɣä lɛ nhɔk kɛ nhök mi kuiy ni jɛn?

¹⁶ Kuanɛ jɛ car ɛn ɣöö /ka̱n yɛ riɛk. Ŋotdɛ lat yɛn ɛ i̱ pɛlɛ, kä cä yɛ cam kɛ kac.

¹⁷ Ɣän tëëkɛ mi cä mac ni yɛ kɛ nɛy tëë cä jäkä yɛ?

¹⁸ Ɣän cä Tay-täth com ɛn ɣöö bɛ wä, kä cä dämandan mi Krith-cin ja̱k kɛ jɛ kɛɛl. A ku yɛn lat ni ɣöö ci Tay-täth yɛ mac /ka̱nkɔ ku lät kɛ yiëë kɛl? Kä /ka̱nkɔ cieŋ kɛ jɛn duɔ̱ɔ̱p ɔ kɛl ɔ?

¹⁹ A ci yɛn ɛ ku car kɛ gua̱a̱th mi bäär ɛn ɣöö gaŋkɔ ni rɔ̱ nhiamdun? Kɔn ruac nɛy rɛy Kritho nhiam Kuɔth. Kä ti diaal tin la̱tkɔ mäthnikä, la̱tkɔ kɛ kɛ kui̱dun.

²⁰ Kɛ ɣöö ɣän dualä mi wa̱a̱ wä ben, dɔ̱ŋ bä yɛ jek a /ci yɛn tekɛ ta̱a̱ in göörä, kä /ci yɛn ɣä bi jek kɛ ta̱a̱ in go̱o̱r yɛn ɛ. Kä ɣän dualä ɛn ɣöö dɔ̱ŋ bɛ tekɛ gak, kɛ tiɛɛl, waŋ lɔaac, rɛɛŋ, guer, lom, lat jɔ̱ɔ̱r, kɛ liak, kɛnɛ nyuɔɔn.

²¹ Ɣän dualä ɛn ɣöö mi wa̱a̱ rɔ nyɔk kɛ ben, bi Kuothdä ɣä jakä po̱c nhiamdun, kä bä ben pa̱r kɛ ruɔ̱t kɛ kui̱ nɛɛni ti ŋuan tëë ci duer mëëdan, kä /ka̱n rɔ̱ ri̱t nyuɔɔni, kɛ ciaŋ leerä, kɛnɛ nyin po̱cä tin jiäk tin ci kɛn kɛ la̱t.