2 Kor 11 - RUAC KUƆTH IN RƐL RƆ

Puɔl kɛnɛ jaak ka̱a̱cni

¹ Ɣän dëë go̱r ni ɣöö bi yɛn ɣä rut, a cäŋ ɛ ɣän dɔ̱a̱r kä mi tɔt. Ruɔ̱tdɛ jɛ kɛ ɣä kɛɛl.

² Ɣän ta̱a̱ kɛ tiɛɛl kɛ kui̱dun, tiɛɛl mi bëë kä Kuoth. Ɣän cä jɛ lar ɛn ɣöö bä yɛ ka̱m Kritho, a thil diw ce̱tkɛ nyam mi ka̱mkɛ ni cɔwdɛ kärɔa.

³ Kä ɣän dualä ɛn ɣöö, ce̱tkɛ mëë ci thɔ̱l Iib mɛt kɛ ca̱p wän wäänädɛ, ba cärkun böth jɔ̱ɔ̱r kä nhök luthä Kritho in thuɔ̱k in lɛy lɛy.

⁴ Kä la yɛn rɔ̱ a päl piny mi tëëkɛ ram mi ci ben kä yɛ, kä lätdɛ yɛ ruac Yecu mi göl kä Yecu in cak ɔ la̱t yɛ. Kä nhɔk yɛn yiëë kiɛ thuk ti gɔw ti gööl kä yiëë kɛnɛ thuk tin gɔw tin cia jek kä kɔ.

⁵ Caarä jɛ ɛn ɣöö /ci kuiy ni ɣän kä jaak ti̱ti̱ tin kapkɛ rɔ̱ nhial.

⁶ A cäŋɛ mi /ciɛ ɣän ram mi ca ŋi̱eec kɛ ruac, /ciɛ ɣän ram mi kui̱c ŋɔak. Gua̱thni diaal cakɔ mɛmɛ jakä jɔc nhiamdun kɛ dup diaal.

⁷ Tëëkɛ duer mi cä dui̱r kɛ locdä kɛ rɔ piny, kɛ ɣöö bä yɛ kap nhial, kɛnɛ ɣöö cä thuk Kuɔth ti gɔw la̱t yɛ a thilɛ mi käm yɛn ɛ ɣä?

⁸ Ɣän cä duël Kuɔth kɔ̱kiɛn mac kɛ känidä kɛ luäk kä kɛ, kɛ ɣöö bä yɛ lätikä.

⁹ Kä mëë ta̱a̱ kɛɛl kɛ yɛ, kä ta̱a̱ kɛ mi göörä, thilɛ ram mi cä cuc, kɛ ɣöö tëë göörä cakɛ ka̱m ɣä ɛ dämanikɔn rɛy Kritho tëë bëë kä Ma-tha-do-nia. Kä ɛnɔ /cä yɛ bi cuc, kä thilɛ duɔ̱ɔ̱p kɛl mi bä cuc yɛ.

¹⁰ Ce̱tkɛ min te thuɔ̱k Kritho rɛydä, liakdä kɛ rɔ ɛmɛ /cɛ bi biɛt rɛy rööl A-ke-ya kɛɛliw.

¹¹ Kä ɛ kui̱ ŋukä? Kä derɛ a ɣöö /cä yɛ nhɔk? Ŋäc Kuoth ɛ ɛn ɣöö nhɔakä yɛ.

¹² Kä bi min la̱tdä, ŋot kɛ mi la̱tdä jɛ a wee wä nhiam, kɛ ɣöö göörä ɣöö bä nɛy ti latkɛ ɣöö la̱tdiɛn in liakɛ rɔ̱ päärɛ kɛ la̱tdan pën latdɛ.

¹³ Kɛ ɣöö kɛn nɛy tɔ̱ ji̱ liakä tɔ̱tɔ̱ kɛ jaak ti guäy, ti la̱a̱t mɛɛtdä, jakɛ rɔ̱ kä ce̱tkɛ jaak Kritho.

¹⁴ Kä thilɛ mi gääy naath! A cäŋɛ ni Cɛy-tan puɔ̱nydɛ, jakɛ rɔ kä ce̱tkɛ jääk buɔyä.

¹⁵ Kä ɛnɔ /cakɔ ga̱a̱c mi ci ji̱ la̱tdɛ rɔ̱ jakä la̱a̱t cuŋni bä. Bi guutdiɛn pa̱a̱r kɛ lätkiɛn.

Cuɔ̱c Puɔl ala jak

¹⁶ Ɣän nyɔakä jɛ kɛ lär, a thil ram mi caar jɛ ɛn ɣöö ɛ ɣän dɔ̱a̱r. Kä duundɛ ɣöö mi cär yɛn inɔ, nhɔakɛ ɣä ce̱tkɛ dɔ̱a̱r, kɛ ɣöö dëë rɔ liak kä mi tɔt bä.

¹⁷ Min laarä kɛ kui̱ liakä nɛmɛ /cä jɛ lar kɛ buɔ̱m Kua̱r ni Yecu, kä duundɛ ɣöö ruac ni ɣän ce̱tkɛ dɔ̱a̱r.

¹⁸ Kä min tëë nɛy ti ŋuan ti liakɛ rɔ̱ kɛ ciaaŋ ran ɣän bä, bä rɔ liak.

¹⁹ Kɛ ɣöö la yɛn dɔa̱a̱r a ruut kɛ tɛ̈th lɔaac, kɛ ɣöö yɛn pua̱nykun pɛlɛ!

²⁰ Kä la yɛn ram mi ci yɛ jakä kuany, kiɛ ram mi pɛɛc yɛ, kiɛ mi mac yɛ, kiɛ mi kaaŋ yɛ, kiɛ ram mi pät yɛ nhiamdun a ruut.

²¹ Kä ɣän pöcä ɛn ɣöö bä jɛ lar, kɔn bä kɔ̱c kɔn kɛ jɛn nɔmɔ! Ɣän ruacä ce̱tkɛ dɔ̱a̱r, mi tëëkɛ mi liak raan rɔɔdɛ kɛ jɛ, amäni ɣän bä, bä rɔ liak kɛ jɛn nɔmɔ.

²² Kɛ kɛn ji̱ Ɣi-bɛ-ru? Amäni ɣän bä. Kä kɛn kɛ ji̱ I-thɛ-rɛl? Amäni ɣän bä? Kä kɛn kɛ kuay A-bɛ-ram? Amäni ɣän bä.

²³ Kä kɛn kɛ la̱a̱t Kritho? Ɣän ruacä ce̱tkɛ ram mi ci yɔ̱ŋ, gɔaa ni ɣän. Kä duundɛ ɣöö ci lät ni ɣän ɛlɔ̱ŋ, kä ca ɣä yiɛn nikä ti nyin ŋuan, kɛ yɔ̱a̱t ti /ca kuɛn, kä thia̱k ni lia̱a̱ gua̱thni diaal.

²⁴ Gua̱thni da̱ŋ dhieec ca ɣä moc yɔ̱a̱t ti jiɛn da̱ŋ diɔ̱k wi̱cdɛ bäŋuan ɛ ji̱ Juudh.

²⁵ Kä gua̱thni da̱ŋ diɔ̱k ca ɣä duäc kɛ kɛtni. Kä ca ɣä bök kɛ pääm kä kɛɛl. Gua̱thni da̱ŋ diɔ̱k cu murkäb töl, kɛ wäär kɛnɛ cäŋ däär lɔakä rɛy bar.

²⁶ Rɛy jäli ti ŋuan, cua̱ tekɛ rik rɛy kiɛri, kä cua̱ tekɛ rik kɛ ma̱a̱c, kɛ rik kä nɛɛkä, kɛ rik kä Jur, kɛ rik rɛy wec, kɛ rik rɛy dɔaar, kɛ rik rɛy bar, kɛnɛ rik kä nɛy tin thil ŋa̱th.

²⁷ Cua̱ tekɛ cuɔ̱c kɛnɛ riɛk, kɛ thil ni̱en kɛ wääri ti ŋuan, kɛ buɔth kɛnɛ rɛw, kɛ thil mi̱eth kɛ tha̱a̱ŋ gua̱thni, kɛ kɔ̱c, kä thilɛ ɣä bieyni.

²⁸ Kä a /ci ti diaal ti̱ti̱ te thi̱n tiamkɛ ɣä ɛ diɛɛr lɔaacdä kɛ kui̱ duëli ji̱ Kuɔth diaal.

²⁹ Ɛŋa ɛnɔ kɔ̱c ɔ, kä /cä kɔ̱c? Ɛŋa ɛnɔ ca jakä tɛth ɔ, kä /ci lɔcdä jiɛth ɔ?

³⁰ Mi bä rɔ liak, bä rɔ liak kɛ kui̱ ŋɔaani tin nyuɔ̱thkɛ kɔ̱a̱cdä.

³¹ Kuoth in la Gua̱n Kua̱r ni Yecu (ba jɛ puany amäni cäŋ kɛl!) ŋäcɛ jɛ ɛn ɣöö /cä lat ni kac.

³² Kä Da-math-kɛth cu kuäär in guur Kuäär ni A-re-täth rɛk Da-math-kɛth yien kɛ ɣöö bɛ ɣä käp,

³³ kä duundɛ ɣöö cua ɣä luay piny kɛ dep kɛ wernyin pa̱a̱ny a ta̱a̱ rɛy diëny, kä cua rɔ kual kä jɛ.