2 Kor 1 - RUAC KUƆTH IN RƐL RƆ

¹ Ɛ ɣän Puɔl, jak Yecu Kritho kɛ ruac Kuɔth, kɔnɛ dämandan ni Ti-mo-thi, Gɔ̱a̱rkɔ jɛ duel Kuɔth in te kä Ko-rinth, kɛnɛ nɛy diaal tin ci Kuoth kɛ lɛy rɛy rööl A-ke-ya kɛɛliw.

² A puɔ̱th tekɛ yɛ kɛnɛ mal kä Kuoth in la Gua̱a̱ra kɛnɛ Kuääran ni Yecu Kritho.

Lär Puɔl kɛ Kuoth tɛ̈th lɔaac

³ A liak tekɛ Kuoth in la Gua̱n Kua̱ran ni Yecu Kritho, kä Gua̱n kɔ̱cä lɔaac, kä Kuoth in buum lo̱c nɛɛni diaal!

⁴ Jɛn la buumɛ kɔn rɛy rikni kɔn diaal, kɛ ɣöö dee kɔn tekɛ lua̱ŋ kɛ buɔ̱m nɛɛni kɔ̱kiɛn tin tekɛ rik, kɛ buɔ̱m in ca bum kɔn ɛ Kuoth.

⁵ Kɛ ɣöö ce̱tkɛ min nyuaknɛ bɛ̈c bɛ̈ɛ̈c Kritho ti ŋuan, inɔ bä, nyuaknɛ buɔ̱m lo̱cnikɔn ti ŋuan kɛ Kritho.

⁶ Mi cuɔ̱ckɔ, ɛ kui̱ bumädun kɛnɛ ka̱ndun, kä mi ca kɔ bum, ca yɛ bum bä min ci yɛn ɛ jek, mëë ruɔ̱tdɛ cuɔ̱c bitdä mi ce̱tkɛ cuɔ̱c ëë ci cuuc kɛ kɔ.

⁷ Ŋa̱thda kɛ yɛ thilɛ mi wany jɛ, kɛ ɣöö ŋa̱ckɔ jɛ, ɛn ɣöö ci yɛn cuɔ̱cda nyuak kɛɛl kɛ kɔ, inɔ bä cia buɔ̱mda nyuak kɛɛl kɛ kɔ.

⁸ /Cakɔ jɛ go̱r, dämaari, ɛn ɣöö bia riɛk in ci tuɔɔk kä kɔ kä E-cia kui̱c. Cuɔ̱c ëë tekɛ kɔ di̱tdɛ ɛlɔ̱ŋ kä thiɛkɛ a cua kɔ lo̱c ɛn ɣöö dëë kɔ tëk.

⁹ Kɛ thuɔ̱k cakɔ jɛ jek ɛn ɣöö cakɔ kum kɛ lia̱a̱, kɛ ɣöö /cakɔ bi ŋäth ni pua̱nykɔ bakɔ ŋäth ni Kuoth in jiɛc naath li̱th.

¹⁰ Cɛ kɔ kän kä riɛk li̱eth, kä bɛ kɔ kän. Cakɔ ŋa̱thda la̱th kä jɛ, ɛn ɣöö jɛn bɛ kɔ nyɔk kɛ ka̱n,

¹¹ Ce̱tkɛ min cia kɔ luäk bä kɛ palun, kɛ kui̱ kä ɣöö bi nɛy ti ŋuan Kuoth la̱r tɛ̈th lɔaac kɛ kui̱da, kɛ kui̱ puthä mi ca ka̱m kɔ ala luɔc pali nɛɛni ti ŋuan.

Gër Puɔl kɛ ca̱rɛ

¹² Nɛmɛ ɛ jɛn min liak nɛy ɛ ni rɔ̱, kä bä jɛ lat kɛ ca̱r mi thil duer. Rɛy kä ti diaal tin cakɔ la̱t rɛy ɣɔaa, cakɔ jɛ la̱t kɛ thuɔ̱k kɛ lɔc mi gɔaa rɛy. Lät nɛy ɛ kɛ puɔ̱th Kuɔth a /ci mɔ a pɛl ɣɔaa, kä kɛn diaal ɛ kui̱dun.

¹³ Thilɛ ruac dɔ̱diɛn mi gɔ̱a̱rkɔ yɛ, ɛ ni min dee yɛn ɛ kuɛn, kä dee cop lɔɔcdun kä dee gɔaa ni mi dërɛ cop lo̱cnikun amäni guut.

¹⁴ Ce̱tkɛ min ci tha̱a̱ŋda cop lɔɔcdun, kɛ ɣöö bia tekɛ liak kɛ kui̱da, ce̱tkɛ min bakɔ tekɛ liak kɛ kui̱dun kɛ cäŋ Kua̱r ni Yecu.

¹⁵ Kä min cä ŋa̱c ɛpuc, ɛn ɣöö bä yɛ ben gui̱l kɛ nhiam kɛ ɣöö dee lo̱ckun tɛɛth kä rɛɛw.

¹⁶ Cä jɛ car ɛn ɣöö bä yɛ gui̱l kɛ wädä kä Ma-tha-do-nia, kä bä luny jɔk kä yɛ kä Ma-tha-do-nia kɛ ɣöö dee yɛn ɣä ben nam dupdä wädä kä Ju-dia.

¹⁷ Kä caar yɛn ɛ ɛn ɣöö la̱tdä cär ɛ ti /cä lot ni jɛ? Kiɛ diiw yɛnɛ la̱tdä cär ti̱ti̱ ce̱tkɛ min lät ɣɔw ɛ, a dëë wee “Ɣɔ̱ɔ̱n” kä dëë wee “Ëëy” ni ɛn guäth ɔ kɛl ɔ?

¹⁸ Ce̱tkɛ min ro̱ŋ Kuoth kɛ ŋa̱th a thil diw, ruacda kɛ yɛ a /kenɛ a ɣöö “Ɣɔ̱ɔ̱n” kɛnɛ “Ëëy”.

¹⁹ Kɛ ɣöö Gat Kuɔth ni Yecu Kritho min cakɔ la̱t yɛ ɣän, kɔnɛ Thil-ba-näth kɛ Ti-mo-thi, /kenɛ a ɣöö “Ɣɔ̱ɔ̱n” kɛnɛ “Ëëy”, duundɛ ɣöö kä Yecu gua̱thni diaal ɛ “Ɣɔ̱ɔ̱n”.

²⁰ Kɛ ɣöö ɛ jɛn ɛn ni̱n nyin Kuɔth diaal tin cɛ lar ɛ ɣöö “Ɣɔ̱ɔ̱n” rɛydɛ. Kä ɛ Kritho ɛ ni̱n latnɛ ni ɣöö “Inɔnɔ”, kɛ kui̱ gɔɔyä puɔnyä Kuɔth.

²¹ Kä täämɛ ɛ jɛn Kuoth ɛ ni̱n jak kɔ kɛnɛ yɛ kä bum rɛy Kritho. Kä cɛ kɔ kuany ala nɛɛkɛ.

²² Jɛn cɛ ciötdɛ gɔ̱a̱r wi̱i̱da, kä cɛ Yiëëdɛ jäkä rɛy lo̱cnikɔn ala min nhiam kä tin cɛ tɔ̱w kɛ kui̱dan.

²³ Kä ɣän cä Kuoth cɔl ɛn ɣöö bɛ a neen kä ɣä. Kä kɛ ɣöö /ca yɛ bi duäc, cä lar ɛn ɣöö /cä bi ben kä Ko-rinth.

²⁴ Kɔn /cakɔ kuk ni yɛ min bia ŋäth, kɔn ŋa̱ckɔ jɛ ɛn ɣöö bum yɛn rɛy ŋäthädun. Duundɛ ɣöö kuakɔ la la̱a̱t kɛɛl kɛ yɛ kɛ kui̱ tɛthä lɔaacdun.