1 Tim 6 - RUAC KUƆTH IN RƐL RƆ

¹ A nɛy diaal tin la kuaany ka̱mkɛ kua̱rkiɛn luth, kɛ ɣöö /ca ciöt Kuɔth kɛnɛ ŋi̱i̱cdan dee kuëth.

² Kɛn kuaany tin te kua̱rkiɛn kɛ ŋa̱th, akɛ /ca kua̱rkiɛn nyuth thil luthä kɛ ɣöö kɛ ji̱ ŋäthä, akɛ la̱tkɛ kua̱rkiɛn ikä ɛlɔ̱ŋ, kɛ ɣöö kɛn nɛy tin jëkɛ duɔ̱ɔ̱r kɛ la̱tdiɛn kɛ ji̱ ŋäthä, kä kɛ ji̱ nho̱kä. Ŋi̱i̱cni kä com lät ti̱ti̱.

Ŋi̱i̱c kacä kɛnɛ ria̱ŋ in thuɔ̱k

³ Mi tëëkɛ ram mi tekɛ ŋi̱i̱c mi dɔ̱ŋ mi /ci mät kɛ ruaacni Kua̱ran ni Yecu Kritho tin thuɔ̱k, kɛnɛ ciaŋ Kuoothä.

⁴ Jɛn cɛ kɔ̱p kɛ liak, kä thilɛ mi ŋäcɛ, kä di̱t lɔcdɛ kɛ nyuɔɔn jiäkni kɛnɛ ŋaknɔmni kɛ kui̱ rieetni. Kɛn tɔ̱tɔ̱ nööŋkɛ tiɛɛl, ko̱r, guer kɛnɛ diɛw diɛɛwni,

⁵ kɛ gak gaakni rɔlä kam nɛɛni tin jiäk ca̱riɛn kä ci thuɔ̱k bath. Car kɛn ɛ lätni Kuɔth ikä ɛ duɔ̱ɔ̱p mi jëkɛ ria̱ŋ.

⁶ Kɛ thuɔ̱k, lätni Kuɔth ikä no̱o̱ŋɛ ria̱ŋ, mi canɛ ro̱ŋ kɛ tin tekɛ kɔn.

⁷ Kä kɛ ɣöö thilɛ mi canɛ nööŋ rɛy ɣɔaa, thilɛ duɔ̱ɔ̱r mi banɛ naŋ kä ɣɔw.

⁸ Kä mi ta̱nɛ kɛ mi̱eth kɛnɛ bieyni, kɛ kɛn tɔ̱tɔ̱ bi kɔn ro̱ŋ ɔ.

⁹ Kä nɛy tin görkɛ ɣöö bikɛ a ria̱ŋ tɔ̱ pɛnkɛ rɛy ɣɔmä, kä ka̱pkɛ kɛ ɛ cär di̱tdä lo̱cni tin thil luɔt, kɛnɛ gör jiäkni tin yär naath kä däkɛ.

¹⁰ Kä nhök yio̱o̱ni ɛ jɛn tuk jiäkni diaal. Kä kɛ göriɛn kɛ göriɛn kɛ ria̱ŋ, cu tha̱a̱ŋkiɛn ciɛc raar rɛy ŋäthä, cikɛ nöŋ ni tɔ̱ bɛ̈c bɛ̈ɛ̈c ti ŋuan.

Ruaacni kɛ kui̱ ran

¹¹ Kä kɛ kui̱du, ji̱n raan Kuɔth, nɔ̱ɔ̱ni rɔɔdu kɛ ti̱ti̱ diaal, go̱r ni ciaŋ cuŋni, ciaŋ Kuɔth, ŋa̱th, nhök, dhieel, amäni ciaŋ gɔɔyä.

¹² Tɛr ko̱r ŋäthä mi gɔaa. Käp tëk mi do̱raar min ca ciöl ji̱, mi latdi thuɔ̱k nhiam nɛɛni diaal.

¹³ Nhiam Kuɔth in käm ŋɔaani diaal tëk, kɛnɛ nhiam Kritho Yecu min ci thuɔ̱k lat mëë tëë nhiam Pɔn-tiäth Pay-lɛt, ɣän la̱tdä ji̱ ruac

¹⁴ ɛn ɣöö yop luek a thil mi jiääk kiɛ bɛ̈ɛ̈l amäni ben Kua̱ran ni Yecu Kritho.

¹⁵ Kä bi Kuoth nɛmɛ jakä tuɔɔk kɛ gua̱a̱thdɛ pa̱ny. Jɛn ram in ca poth jɛn Bo̱o̱th kärɔa, Rueec Ruëëcni, kä Kuäär Kua̱ri.

¹⁶ A luth kɛnɛ ruec mi do̱raar tekɛ jɛ kärɔa, jɛn ram min /ci bi met li̱w, kä cieŋ buɔyä mi /ci raan dee cop thi̱n, mi thilɛ ram mi /ciɛ met nɛn kiɛ dee jɛ nɛn. Inɔnɔ.

¹⁷ Kɛ kui̱ nɛɛni tin te rɛy ɣɔaa ɛmɛ tin riäŋ, luëëkä kɛ, ɛn ɣöö /cikɛ rɔ̱ bi liak, kä /cikɛ ŋa̱th lo̱cnikiɛn bi ka̱m ria̱ŋ mi tekɛ diw, kä ba la̱th ni ŋa̱thdiɛn kä Kuoth min riäŋ kɔn kɛ ŋɔak diaal tin bi lo̱ckɔn tɛɛth kɛ kɛ.

¹⁸ Kɛn bikɛ gɔy la̱t, kɛ ɣöö bikɛ ria̱ŋ kɛ lät ti gɔw, kä bikɛ muɔ̱c kɛ ɣöö bikɛ ŋɔak nyuak.

¹⁹ Kɛ kɛn lät tɔ̱tɔ̱, duɔ̱lkɛ ni rɔ̱ ria̱ŋ mi gɔaa kɛ gua̱a̱th in bi ben, kɛ ɣöö deekɛ tëk in la tëk in thuɔ̱k jek.

²⁰ Ti-mo-thi, gaŋ mi ca ka̱m ji̱. Nɔ̱a̱ni kɛ ruac lop loopä mi baŋ mi thil ciaŋ mi gɔaa kɛnɛ ruaacni tin cɔɔl tha̱a̱ŋ nath kɛ ŋäc ŋɔaani.

²¹ Kä nikɛ läriɛn kɛ jɛ ci tha̱a̱ŋ nath duɔ̱ɔ̱p ŋäthä dui̱r. A puɔ̱th Kuɔth tekɛ ji̱.