1 Tim 4 - RUAC KUƆTH IN RƐL RƆ

Ŋi̱eec kacä

¹ Täämɛ ci Yiëë ɛ lat ɛn ɣöö gua̱a̱th in ŋot jɔk bi tha̱a̱ŋ nath ŋa̱th lo̱k kɛ li̱eŋdiɛn kɛ yiey kacä, kɛnɛ ŋi̱eec kuthni ti jiäk.

² Kä jɛn ŋi̱i̱c ɛmɔ bëë ruac mɛɛtdä ji̱ ka̱a̱cni tin ci ŋäc lɔaacdiɛn jiääk ce̱tkɛ mi ca jɛ waŋ ɛ ladiit mi ci leeth.

³ Kɛn pënkɛ naath kuën, kä pënkɛ naath tha̱a̱ŋ mi̱thni tin ci Kuoth kɛ cak, kɛ ɣöö dëëkɛ cam kɛ tɛ̈th lɔaac ɛ nɛy tin ŋa̱th kä ŋa̱ckɛ thuɔ̱k.

⁴ Kɛ ɣöö tin diaal ti ci Kuoth kɛ cak gɔwkɛ, kä thilɛ mi dëë lo̱k thi̱n, mi ca jɛ nhɔk kɛ tɛ̈th lɔaac.

⁵ Kɛ ɣöö ca jɛ jakä rɛl rɔ kɛ riet Kuɔth kɛnɛ pal.

Läät Kritho Yecu mi gɔaa

⁶ Mi ci ruaacni ti̱ti̱ la̱th nhiam ganmuɔɔri, bi ji̱n a läät Kritho Yecu mi gɔaa, mi ca mi̱eth kɛ ruaacni ŋäthä kɛnɛ ŋi̱i̱c in gɔaa min ci guɔ̱ɔ̱r.

⁷ /Cu tekɛ mi lätdi kɛ cäätni dɔ̱ɔ̱rä tëë wal tin gua̱c kɛ Kuoth. Ŋi̱i̱cni rɔɔdu kɛ ɣöö bi Kuoth lätikä.

⁸ Kɛ ɣöö yɔ̱k pua̱ny tëëkɛ luɔt, kä lät Kuɔth ikä te ni jɛn kɛ luɔt kä ti diaal, kɛ ɣöö no̱ŋɛ ji̱ puɔ̱th rɛy teekä ɛmɛ kɛnɛ tëk in bi ben bä.

⁹ Ɛ ruac mi thuɔ̱k pa̱ny, kä ro̱ŋɛ kɛ ɣöö ba jɛ nhɔk kɛɛliw.

¹⁰ Kä kɛ pek kä nɛmɛ lät kɔn, kä kui̱i̱r kɔn, kɛ ɣöö canɛ ŋa̱thdan kuëŋ kä Kuɔth in tëk, min la Kään nɛɛni diaal, min kulɛ di̱t kä nɛy tin ŋa̱th.

¹¹ Kä ti̱ti̱ kɛ kɛn tin bi dhil la̱t kä bi ŋi̱eec.

¹² A thil ram mi lat ji̱ jɔ̱ɔ̱r kɛ ɣöö ɛ ji̱n ŋuɛ̈t, kä lapni a nyuuth kä ji̱ ŋäthä rɛy ruacdu kɛnɛ ciaaŋdu, kɛ rɛy nho̱kä, kɛnɛ rɛy ŋäthä, rɛy wic wiicä.

¹³ Amäni mi wa̱a̱ wä cop lapni ruaacni Kuɔth a kuɛɛni nhiam nath, kä latkɛ, kä ŋi̱i̱cni kɛ.

¹⁴ Kä /cu muc in te rɛydu guic jɔ̱ɔ̱r, mëë ca ka̱m ji̱ kɛ ruac go̱o̱kä, kɛ läth bööthni kɛ tetkiɛn wi̱i̱du.

¹⁵ Läätni kɛn ti̱ti̱. Läthni rɔɔdu thi̱n, kɛ ɣöö dee nɛy diaal wädu nhiam nɛn.

¹⁶ Tit rɔɔdu kä tit ŋi̱i̱cdu. Kä lätni ti̱ti̱, kɛ ɣöö kɛ la̱tdu kɛ nɛmɛ, bi puɔ̱nydu kɛnɛ nɛy tin liɛŋkɛ ji̱ kän.