1 Tim 2 - RUAC KUƆTH IN RƐL RƆ

Pal duëël Kuɔth

¹ Kä nikɛ jio̱liɛn, la̱ŋä ji̱ ɛn ɣöö ba, pali, kɛnɛ thiecni, kɛ lär tɛthä lɔaac la̱t kɛ kui̱ nɛɛni diaal,

² kɛ kui̱ kua̱ri, kɛnɛ nɛy diaal tin te gua̱thni ti di̱t, kɛ ɣöö banɛ cieŋ kɛ tëk malä kɛ, ciaaŋ Kuoothä mi tekɛ luth gua̱thni diaal.

³ Mɛmɛ gɔaaɛ kä lotdɛ rɔ nhiam Kuɔth in la Käändan,

⁴ min go̱o̱r ɣöö bi nɛy diaal kään, kä bikɛ ben ŋäcä thukä.

⁵ Kɛ ɣöö Kuoth ɛ kɛl, kä ram kɛl a thi̱n mi te kam Kuɔth kɛnɛ naath, ɛ jɛn raan ni Kritho Yecu,

⁶ min ci rɔ thöp ala lueel nɛɛni diaal, kä a jɛn thuɔ̱k in ci jɔɔc kɛ gua̱a̱thdɛ.

⁷ Kɛ kui̱ ɛmɛ ca ɣä mɛk ala dääk thukni ti gɔw kä bi ɣä a jak. Ɛ ɣän ŋi̱i̱c Juri rɛy ŋäthä kɛnɛ thuɔ̱k. (Ɣän latdä ni thuɔ̱k. /Ci ɣän kac ni kac.)

⁸ Ɣän göörä jɛ ɛn ɣöö dee wutni pal gua̱thni diaal a kapkɛ tet ti rɛ̈lkɛ rɔ̱ nhial a thil jiäk lɔaac kiɛ ŋaknɔm.

⁹ Kä dee män rɔ̱ moc kɛ bieyni ti gɔw ti nyin luthä a /ciɛ ta̱k mi̱emni kiɛ läth dääpä, kɛnɛ dɔ̱a̱kni, kiɛ bieyni ti di̱t kökdiɛn.

¹⁰ Kä akɛ la̱tkɛ ni lät ti gɔw ti ro̱ŋ kɛ män ti palkɛ Kuoth.

¹¹ A ciek ŋäc ŋɔak bitdä, kä bɛ rɔ jakä kuiy kɛ ciɛŋkɛ diaal.

¹² Cä jɛ ŋok ɛn ɣöö a thil ciek mi ŋi̱i̱c wutni kiɛ mi bi kɛ ruac, a jɛ bit.

¹³ Kɛ ɣöö kɔaŋ cak ni A-dam, kä Iib,

¹⁴ kä /ka̱n A-dam mɛt, kä ca ciek mɛt, kä cuɛ cu tekɛ duer.

¹⁵ Kä ŋotdɛ ba ciek kän kɛ kui̱ däpä gan, a wä ni kɛn nhiam rɛy ŋäthä kɛnɛ nhök kɛ ciaaŋ mi rɛl rɔ ni thiɛkä.