1 Tim 1 - RUAC KUƆTH IN RƐL RƆ

¹ Ɛ ɣän Puɔl in la jak Kritho Yecu kɛ ruac Kuɔth in la Käändan, kɛnɛ Kritho Yecu min la ŋa̱thdan.

² Ɣän gɔ̱a̱rä ji̱ warɛgak, ji̱n Ti-mo-thi, gatdä min thuɔ̱k rɛy ŋäthä, A puɔ̱th kɛnɛ kɔ̱a̱c lɔaac, kɛ mal kä Kuoth in la Gua̱a̱ra kɛnɛ Kritho Yecu in la Kuääran tekɛ ji̱.

Luek kɛ kui̱ ŋi̱eecni ka̱a̱cni

³ Ɣän cä ji̱ com mëë wa̱a̱ kä Ma-tha-do-nia, ɛn ɣöö bi te kä Ɛ-pɛ-thäth, kɛ ɣöö tëëkɛ nɛy ti bi ŋi̱eec kɛ ɣöö /cikɛ ŋi̱i̱c mi göl bi ŋi̱eec.

⁴ Akɛ /ca car ni cäätni ti thil luɔt kɛnɛ ciööt käkni nath ti thil pek, tin nööŋkɛ ni ŋaknɔmni a /ca ŋi̱i̱c ni cär Kuɔth tin ŋa̱ckɛ kɛ ŋa̱th.

⁵ Kä luɔt ruac ɛmɔ ɛ nhök in bä raar rɛy lɔaac mi buɔy kɛnɛ ŋäc lɔaac mi gɔaa, kɛ ŋa̱th mi thuɔ̱k.

⁶ Tha̱a̱ŋ nath cikɛ bath kä ti̱ti̱, kä cikɛ rɔ̱ riet kä ti thil luɔt.

⁷ Go̱o̱r kɛn ɣöö bikɛ a ŋi̱eec ŋutdä, kä duundɛ ɣöö /ken rieetkiɛn cop lo̱cnikiɛn ɛn min lat kɛn ɛ kɛ ŋa̱th mi di̱i̱t.

⁸ Täämɛ ŋäc kɔn ɛ ɛn ɣöö gɔaa ŋut, mi ci raan ɛ la̱a̱t kɛ la̱t in dëë lätni jɛ.

⁹ Kä ŋäc kɔn ɛ ɛn ɣöö /ca ŋut lät kɛ kui̱ nɛɛni tin ji̱ cuŋni, duundɛ ɣöö la̱tkɛ jɛ kɛ kui̱ nɛɛni ti thil ŋut kɛnɛ nɛy ti thil luth kɛ kui̱ nɛɛni ti thil Kuoth ti ji̱ dueeri, kɛnɛ kui̱ nɛɛni ti /ca rɔ̱ lɛy ti ji̱ kueethä, kɛ kui̱ nɛɛni tin la na̱kɛ gua̱ni kɛnɛ mani, kɛ kui̱ nɛɛni ti luɔ̱ɔ̱c nath.

¹⁰ Kä la̱tkɛ jɛ kɛ kui̱ lëëri, kɛnɛ nɛy tin tɔ̱ɔ̱c kɛ rɔ̱ kä biɛl ɔ kɛl ɔ, kɛ nɛy tin kɔakɛ naath, kɛ ji̱ ka̱a̱cni, nɛy tin cɔalkɛ Kuoth kɛ kac, kɛ nɔ dɔ̱diɛn ɔ gua̱c kɛ ŋi̱i̱c in thuɔ̱k ɔ.

¹¹ Jɛn ŋi̱i̱c ɛmɔ jëkɛ jɛ kä thuk ti gɔw kɛ kui̱ Kuɔth in ca poth tëë ca ka̱m ɣä i̱ bä lat.

Tɛ̈th lɔaac kɛ kui̱ kɔ̱a̱c lɔaac

¹² La̱rä Kritho Yecu Kuääran tɛ̈th lɔaac, jɛn ram in ci ɣä moc buɔ̱m, kɛ ɣöö cɛ ɣä jek ala raan ŋäthä kä cɛ ɣä kuany lätädɛ.

¹³ A cäŋ ni mëë jɛ kɔŋ kuëth, kä cä jɛ moc riɛk, kä ɛ ɣän ram mi gua̱n köör. Kä duundɛ ɣöö cä kɔ̱a̱c lɔaac jek kɛ ɣöö cä lät ala ram mi kui̱c ŋu kɛ thil ŋäthä.

¹⁴ Kä ci puɔ̱th Kua̱ran ni Yecu ɣä thiäŋ kɛ ŋa̱th kɛnɛ nhök tin te rɛy Kritho Yecu.

¹⁵ Ɛ ruac mi thuɔ̱k pa̱ny, kä ɛ mi gɔaa ɛn ɣöö dëë nhɔk kɛɛliw, ɛn ɣöö Kritho Yecu cɛ ben rɛy ɣɔaa kɛ ɣöö bɛ ji̱ dueeri ben kän, tin jiäk ni ɣän rɛydiɛn ɛlɔ̱ŋ.

¹⁶ Kä kɛ cio̱o̱k ɛmɔ cä kɔ̱a̱c lɔaac jek, ɛn ɣöö dee Yecu Kritho li̱ep bitädɛ nyoth rɛydä, ɣän min leny naath kɛ dueer, derɛ ɣä la̱t ala nyuuth kɛ kui̱ nɛɛni diaal tin bi jɛ ŋäth kä bi tëk mi do̱raar jek.

¹⁷ A Kuäär in di̱i̱t mi do̱raar, mi /ci bi met li̱w, mi /ca nɛn, Kuoth in kɛl kärɔa, tekɛ luth kɛnɛ puɔny amäni cäŋ kɛl. Inɔnɔ.

¹⁸ Ruac ɛmɛ la̱tdä jɛ ji̱, ji̱ Ti-mo-thi, gatdä, ce̱tkɛ ruaacni go̱o̱kä tëë ca lat ni mëë kɛ kui̱du, kɛ ɣöö mi cikɛ guɔ̱ɔ̱r deri ko̱r mi gɔaa tɛr,

¹⁹ kä tit ŋa̱thdu kɛnɛ ŋäc lɔaac mi gɔaa. Kɛ lo̱k ŋäcä lɔaac ci tha̱a̱ŋ nath ŋa̱thdiɛn kɔn ya̱r.

²⁰ Rɛydiɛn te Ɣay-mɛ-ni-äth kɛnɛ A-lek-dhan-der thi̱n, tin cä pa̱l gua̱n jiäkni, kɛ ɣöö dee kɛn ɛ ŋa̱c ɛn ɣöö /cikɛ Kuoth bi kuëth.