1 Thɛ 5 - RUAC KUƆTH IN RƐL RƆ

Riali rɔ ikä kɛ cäŋ benä Kua̱r

¹ Kä täämɛ dämaari thilɛ mi go̱o̱r nɛy ɛ ɛn ɣöö dëë gɔ̱a̱r yɛ kɛ kui̱ gua̱a̱thä kɛnɛ pek runä.

² Kɛ ɣöö ŋäc yɛn pua̱nykun agɔaa ɛn ɣöö bi Cäŋ Kuɔth ben pa̱ny ce̱tkɛ cuer kɛ wäär.

³ Gua̱a̱th in wä naath i̱, “Ci ɣɔw tekɛ mal kɛnɛ thil rikä,” ni ɛn guäth ɛmɔ bi riɛk cu ben kä kɛ, ce̱tkɛ min la mäc dapä a bä kä ciek, kä bɛ cu thil ram mi leny rɔ!

⁴ Kä /cia te rɛy muɔ̱th dämaari, kɛ ɣöö dee Cäŋ ɛmɔ yɛ mam ce̱tkɛ cuer.

⁵ Kɛ ɣöö yɛn diaal lapɛ gaat buɔyä kɛnɛ cäŋ däär, /ci kɔn a ji̱ wa̱r kiɛ ji̱ muɔ̱th.

⁶ Inɔ, /cuarnɛ lɛ niɛɛn ce̱tkɛ nɛy tin kɔ̱kiɛn, kuanɛ te jinä, kä tiɛtnɛ ciaaŋdan,

⁷ kɛ ɣöö nɛy tin ni̱n la ni̱nkɛ kɛ wäär, kä nɛy tin yɔ̱ŋ kɛ kɔaaŋ, la yɔ̱ŋkɛ kɛ wäär bä.

⁸ Kä kɛ ɣöö lapnɛ ji̱ ca̱ŋ da̱a̱r tiɛtnɛ ciaaŋdan, kä la̱thnɛ ŋa̱th kɛnɛ nhök ce̱tkɛ ko̱t yieethä baapdan, kä la̱thnɛ ŋa̱th känä wi̱i̱dan, ce̱tkɛ kum yieethä.

⁹ Kɛ ɣöö /ken Kuoth kɔn kuany kɛ kui̱ waŋä lɔaac, cɛ kɔn kuany kɛ ɣöö banɛ ka̱n jek kɛ Kuäär ni Yecu Kritho,

¹⁰ min ci li̱w kɛ kui̱dan. Kɛ ɣöö cäŋ jiɛnɛ kiɛ canɛ niɛɛn dɔ̱ŋ dënɛ cieŋ kɛɛl kɛ jɛ.

¹¹ Kɛ kui̱ ɛmɔ buɔ̱mɛ lo̱ckun kamnikun, kä lua̱kɛ rɔ̱ ce̱tkɛ min lät yɛn ɛ täämɛ.

Ruaacni tin jɔak kɛnɛ ner

¹² Kä la̱ŋkɔ yɛ dämaari, ɛn ɣöö luɔ̱thɛ nɛy tin lät rɛydun, tin böthkɛ yɛ rɛy Kua̱r ni Yecu, kä ŋi̱eeckɛ.

¹³ Kä luɔ̱thɛ kɛ ɛlɔ̱ŋ rɛy nho̱kä kɛ kui̱ la̱tdiɛn. Kä ta̱yɛ kɛ mal kamnikun.

¹⁴ Kä cuɔmkɔ yɛ, dämaari, ɛn ɣöö luëkɛ nɛy tin nyuur baaŋ, kä buɔ̱mɛ nɛy tin jiɛth lo̱ckiɛn, kä lua̱kɛ nɛy tin kɔ̱c ŋa̱thdiɛn, kä pa̱lɛ lo̱ckun piny kɛ kɛn diaal.

¹⁵ Nɛ̈nɛ jɛ ɛn ɣöö thilɛ ram kɛl kä yɛ mi bi mi jiääk col kɛ mi jiääk, kä ni ciaŋ görɛ ni la̱t kä mi gɔaa kamnikun amäni nɛy diaal.

¹⁶ A lo̱ckun tɛth ni ciaŋ.

¹⁷ Palɛ Kuoth a thil lɔ̱a̱ŋ.

¹⁸ La̱rɛ jɛ tɛ̈th lɔaac rɛy ciɛŋni diaal, kɛ ɣöö mɛmɛ ɛ jɛn min go̱o̱r Kuoth ɛ rɛy Kritho Yecu kɛ kui̱dan.

¹⁹ /Cuarɛ Yiëë in Gɔaa in Rɛl Rɔ gaŋ jɔk.

²⁰ /Cuarɛ rieet göökni lo̱k,

²¹ kä ɣɔ̱a̱nɛ ŋɔaani diaal, ka̱pɛ lät ti gɔw a bum,

²² kä pa̱lɛ lät diaal tin jiäk.

²³ A Kuoth malä puɔ̱nydɛ jak yɛ kä lɛ̈y lɛ̈ɛ̈y, kä a yiëëdun, kɛ tieydun, kɛ pua̱nykun ba yop a puɔth a thil bɛ̈l kɛ cäŋ benä Kua̱ran ni Yecu Kritho.

²⁴ Ram in cɔɔl yɛ ɛ ram mi ro̱ŋ kɛ ŋa̱th, kä bɛ jɛ la̱t.

²⁵ Dämaari, palɛ Kuoth kɛ kui̱da.

²⁶ Nërɛ dämanikɔn diaal kɛ ci̱em nho̱kä mi rɛl rɔ.

²⁷ Kɛ ciöt Kua̱r ni Yecu ɣän la̱rä jɛ yɛ ɛn ɣöö ba warɛgak ɛmɛ kuën dämanikɔn diaal.

²⁸ A puɔ̱th Kua̱ran ni Yecu Kritho te kɛɛl kɛ yɛ.