1 Thɛ 4 - RUAC KUƆTH IN RƐL RƆ

Tëk mi tɛɛth lɔc Kuɔth

¹ Gaatmaari cakɔ yɛ ŋi̱eec kɛ ciaaŋ in dee cieŋkɛ yɛ min dee lɔc Kuɔth jakä tɛth. Kä ɛ jɛn duɔ̱ɔ̱p in cieŋkɛ yɛ. Kä täämɛ la̱ŋkɔ yɛ kä cuɔmkɔ yɛ rɛy Kua̱r ni Yecu ɛn ɣöö dërɛ cieŋ inɔ kɛ ciaaŋ mi leny nɔmɔ.

² Kɛ ɣöö ŋäc yɛn ruac in cakɔ la̱t yɛ kɛ buɔ̱m Kua̱r ni Yecu.

³ Kɛ ɣöö nɛmɛ ɛ jɛn ciaŋ in nhɔk Kuoth ɛ, ɛn ɣöö bia rɔ̱ cu rɛl kä bia nɔ̱a̱n kä nyin leerä.

⁴ Kä ramɔ kä yɛ ŋäcɛ ciaŋ in derɛ jek ni rɔ ciek kɛ duɔ̱ɔ̱p mi gɔaa kä duɔ̱ɔ̱p luthä,

⁵ a /ciɛ duɔ̱ɔ̱p leerä mi jiääk ce̱tkɛ nɛy ti /ca Kuoth ŋäc.

⁶ Kä a jɛ thil ram mi dui̱r raan duer kiɛ mi mac däman kiɛ nyiman kɛ duɔ̱ɔ̱p ɛmɛ, kɛ ɣöö Kuäär ɛ jɛn cuul kä ŋɔaani ti̱ti̱ diaal, ce̱tkɛ mëë cakɔ la̱r yɛ kɛ nhiam kä cakɔ luekni yɛ.

⁷ Kɛ ɣöö /ken Kuoth kɔn cɔal ciɛɛŋä mi jiääk, cɔlɛ ni kɔn rɛy ciɛɛŋä mi rɛl rɔ.

⁸ Kɛ kui̱c ɛmɔ ram mi wä nɛmɛ wä lo̱k, /cɛ lo̱k ni buɔ̱m ran, lo̱kɛ ni Kuoth min ci Yiëëdɛ in Gɔaa in Rɛl Rɔ thöp yɛ.

⁹ Kä thilɛ ram mi go̱o̱r ɣöö bɛ yɛ gɔ̱a̱r warɛgak kɛ kui̱ nhökdun kɛ dämuɔɔrikun, kɛ ɣöö ca yɛ ŋi̱eec ɛ Kuoth ɛn ɣöö bia rɔ̱ nhɔk kamnikun.

¹⁰ Kä ɛpuc nhɔk yɛn dämuɔɔrikun diaal rɛy Kritho tin te kä Ma-tha-do-nia. Kä cuɔmkɔ yɛ, dämaari, ɛn ɣöö bia nhökdun kɛ kɛ rep,

¹¹ kɛ ɣöö bia cieŋ kɛ mal, kä bia lätkun la̱t, kɛnɛ ɣöö bia lät kɛ tetkun, ce̱tkɛ mëë cakɔ nyuɔ̱th yɛ.

¹² Kɛ lätni kä nɔmɔ dɔ̱ŋ dëë yɛ ka̱m luth ɛ nɛy tin /ci ŋa̱th, kɛnɛ ɣöö /cia rɔ̱ bi thi̱eŋ kä radɔ̱diɛn.

Ben Kua̱r ni Yecu

¹³ Kä /cakɔ jɛ go̱r, dämaari ɛn ɣöö bia ŋɔaani kui̱c, kɛ kui̱ nɛɛni tin ci li̱w, kɛ ɣöö /ci lo̱ckun bi jiääk ce̱tkɛ, nɛy tin kɔ̱kiɛn tin thil ŋa̱th.

¹⁴ Kɛ ɣöö min ŋa̱thnɛ jɛ ɛn ɣöö ci Yecu li̱w kä cɛ rɔ nyɔk kɛ jiëc, ce̱tkɛ inɔ bä, bi Kuoth nɛy tin ci li̱w jiɛc kɛ Yecu kɛɛl.

¹⁵ Kɛ ɣöö la̱rkɔ yɛ nɛmɛ kɛ ruac Kua̱r ni Yecu, ɛn ɣöö kɔn nɛy ti tëk ti, tin ca ba̱ny piny amäni cäŋ benä Kua̱r, /canɛ nɛy tin ci li̱w bi leny.

¹⁶ Kä bi Kuäär puɔ̱nydɛ ben piny nhial kɛ rɔal läärä, kɛ jɔw cio̱tdä jääkä nhial in di̱i̱t, kɛnɛ jɔw kaaŋä Kuɔth, kä bi nɛy tin ci li̱w rɛy Kritho rɔ̱ jiɛc kɛ nhiam.

¹⁷ Inɔ, ba kɔn tin tëk, tin ca ba̱ny piny cu kap nhial kɛ rɛy pua̱a̱ri kɛɛl kɛ nɛy tin ci li̱w, banɛ wä röm kɛ Kuäär rɛy jiɔam. Kä ɛnɔ banɛ cu te kɛɛl kɛ Kuäär ni Yecu amäni cäŋ kɛl.

¹⁸ Kɛ kui̱ ɛmɔ cuɔmɛ rɔ̱ kamnikun kɛ kɛn rieet ti̱ti̱.